Zyɔbi 14 - Cebaara Bible 2010

Zyɔbi syɛɛnlurugori kwɔ́ɔmɔ: Syɔɔn ye funbɛɛnri kanma

¹ «Syɔ́ɔnwee cɔlɔɔ see lè, wi sìíw n kpere, níì nyìn wɔʔɔgi na.

² Wi n yiri àmɛɛ fílɛɛri nyɛ lè, á be wi ceri. Wi i fé ni sɔ̀lɔ́ àmɛɛ kànyinnɛ nyɛ lè, wi o yèré í.

³ Woro ni mɔ nyapili le, mɔ n mii kɔ́ri ni syée kútii na ní miyɛɛ ní!

⁴ Wìí wi a gbǎn yamunugo yirige yanɔnʔɔgɔ ni? Syɔɔn faala.

⁵ Amɛɛ mɔ wi siiw canya nyɔ́ɔ tímana n kwɔ́ɔ lè, ní wi yéyi nyɔ́ɔ kánma, ní àmɛɛ mɔ tɛɛ̀laʔali kúun n kwɔ́ɔ, lee li lè wi a gbǎn li kána í,

⁶ nyapiigèle yirige nya wi ni, wí ŋɔ́ndaa, jàngó wi fundaanra taa àmɛɛ sàrana-falipyeo nyɛ lè wi cángi kwɔ́ɔmɔ na.

⁷ Sɔ̀ngumɔ tɛɛtaʔaga i nyɛ tiige ma: Pe ga gi kpúmɔn, ki n níì fùn, ki fíinyi a kòro yaà í.

⁸ Alí ki nǐnri ga lɛɛ tári ni, ki nyúngi ga kùu tári ni,

⁹ ki ga lɔ̀ʔɔ núngo taa, ki n fùn bi káganbiire yirige àmɛɛ tiipungo nyɛ lè.

¹⁰ Kàjáa syɔɔn ga kùu, wi fǎngi n kwɔ́ɔ. Syɔɔn ga fígi, sán wi nyɛ lǎli bee ni?

¹¹ Sólomi lòyo a gbǎn waʔa yiri yaà, cábiyi i syɔɔnri ni jǐn bi waʔa.

¹² Kánmi bee na syɔɔn sìnɛ́, wi si a ní yìri í, wi a ní nyán í fwɔɔ bi taa nyɛ̀ʔɛgèle í ba kwɔ́ɔ, wi a yìri wi ŋúnɔmi na í.

¹³ Ee! Ki maa yɛlɛ mɔ í mii làriga kúbèle tɛɛkòrogo ni, bi mii yaʔa yaà wolarigaɔ ní fwɔɔ bi taa mɔ fundanʔari í ba kwɔ́ɔ, si làlaa tɛ̀ɛn mii na, lee ni mɔ a sɔ̀ngí taa mii na lè.

¹⁴ Syɔɔn ga kùu, wi a ní gbǎn yìri lé bi pye sìi na? Mii a dée kòro sigeli na mii fáliw canya myɛ ni, fwɔɔ bi taa pe mii kàriga kavɔn.

¹⁵ Lǎli bee ni mɔ a dée yeri, mii si syɔɔ mɔ ma, yárigee mɔ kɔ́yi sámaga lè ki láagi a dée pye mɔ na gbanʔama.

¹⁶ Kàjáa tɔ́ɔliw ni mɔ i mii nyɔ̌ngèle córo, mɔ a ní da mii kapeeli córo í.

¹⁷ Mii kapeeli a dée pwɔɔ tɔ́n gɔ̀nvaʔaga ni, mɔ mǎà dée mii kolomi tɔ́n.

¹⁸ Kàjáa nyanbelege i tuun ni caragi, fálaga i yìrigí ni núngu gi tɛ́ɛgi ni.

¹⁹ Lǒyi i kàdɛnɛyi líile, yi fóoli i tári lée ni syée. Kánmi bee na mɔ syɔɔn sɔngumi tɛɛtaʔaga kálagi.

²⁰ Mɔ n wi cáan a gi kòro nya, wi si i syée. Mɔ i wi yɛ́ɛgi kàragí, si wi tórigo.

²¹ A pe wi jáabèle kpɔ́ʔɔ yoo, wi ga kàa cán koro ni í. A pe be faʔa yoo, wi o nyɛ koro cánma ni í.

²² Wi tiimaa céri ni wi wɔʔɔ, wi pǐli i nyɛ kùu káyaʔa na wi tiimaa kéeli na.»