Zyɔbi 13 - Cebaara Bible 2010

Zyɔbi syɛɛnlurugori i syée: Wi i caa bi pínɛ joo ní Kolocɔlɔɔ ní

¹ «Ɔnhɔ́n! Mii nyapili n koro myɛ nyaa. Mii líiweeli n gi lóʔo níì gi kɔ́rɔw cán.

² Gee yele cán lè, mii n wɔ́ɔ̀ gi cán, mii ga cɛ́rɛ n sɔ̀lɔ yele na í.

³ Kàjáa Séew Myɛ Kàfɔlɔ má mii a joo. Mii i caa bi mii táangi joo Kolocɔlɔɔ yɛ́ʔɛ ma.

⁴ Yele si na, jànvaaw yagana yele tímana, yele myɛ i nyɛ gbanzan nìngbumɔnbéle.

⁵ Yele ga maa pyèri tábi, koro ki a dée pye yele ma sícilimi.

⁶ Mii i ye nyɛ́ɛri, ye mii táangi jóomɔ lóʔo. Yé líiyi cáan ye mii nyɔ́ɔwari kayaʔa jóomɔ lóʔo.

⁷ A yele i sɔ̀ngí lé yele a sìnzinmɛ syɛ́ɛnrɛ joo bi Kolocɔlɔɔ dɛ̀ɛmɛ? Gee gi nyɛ lè jànvaa, yele í koro joo lé wi kéeli na?

⁸ Wi kàbangi na lé yele nyɛ? Kolocɔlɔɔ lé yele a joo syɔɔ?

⁹ Wi ga yele sɛʔɛ, a wi a dée yacanga nyaa lé? Wàlá a yele a gbǎn wi fáana lé àmɛɛ be syɔɔn fáana lè?

¹⁰ Yele ga ni syɔɔnwaa yirigi wàa ni làrama ni, wi a tɔ̀nɔ́ fúlo yele na.

¹¹ Wi kpɔ́ʔɔri a fyáara wáa yele na ì? Wi fyáakpɔɔri a yele cò ì?

¹² Yele sɔ̀ngudaari kajoo-mí-cerigéle i nyɛ cɔnʔɔ kajoo-mí-cerigéle. Yele tɛɛlarayi i nyɛ cóoro tɛɛlaraya yagana.

¹³ Ye pyèri yaà, ye mii yaʔa! Mii wi a joo! Gee ga naà mii taa lè, koro ki a mii taa.

¹⁴ Nyàʔá na gi yɛlɛ mii í mii céri kpàra ní mii gǎngèle ní, si mii sìíw kwɔ́ɔ ní mii kɔ́gi ní?

¹⁵ Alí wi ga maa jo bi mii kpóo woro má mii wéle. Mii si a mii tánʔaganmi kéele joo tɛ̀ɛn wi yɛʔɛ̀ ma.

¹⁶ Gee bee tiimaa a gbǎn pye mii ma syɔɔlɔ kéele. Níì cán Kolocɔlɔɔ yɛ́ʔɛnaa-sìnvyaaɔ a gbǎn wiyɛɛ dɛ̀ɛn wi yɛʔɛ̀ ma í.

¹⁷ Ye lóʔo, ye mii syɛ́ɛnri lóʔo. Dee mii nyuu ni tèé lè, ki n yɛlɛ di jée yele líiweegèle ni.

¹⁸ Wéle, mii i caa bi mii sínni joo tɛ̀ɛn. Mii n gi cán mii má tàángi nyɛ.

¹⁹ Wìí wi caa bi pye kútii na ní mii ní? Lǎli bee ni mii a fɔ̀lɔ́ pyèri si kùu.

²⁰ Tɛ́nɛ mi yariya siin kpéʔele mii ma, mii si a niyɛɛ làriga mɔ na í.

²¹ Mɔ kɔ́gi ki mii serige lè, ki láʔa nya mii na, mɔ fyáakpɔɔri a ní kɔ́ zɔ̀nviikɔnirɔ wáa mii na í.

²² Mí yeri, mii a syɛ́ɛnri láa, wàlá mii a joo, mɔ si syɛɛnlurugori kaan.

²³ Jòorí mii kolomi kèlē, ní mii kapeegèle nyɔ́ɔ nyɛ? Mii céemi, ní mii kapeeli tɛ̀ɛn mii na.

²⁴ Nyàʔá na mɔ mɔ yɛ́ɛgi làragí, ní i mii córo mɔ nígoo?

²⁵ Wawaagee káfalagi lée lè, a mɔ caa lé bi gi kaan kaa cɛ̀lɛ́? A mɔ i caa lé bi taʔa nyàákanwaagi na bàā nɛnɛ?

²⁶ Níì cán mɔ i syɛɛnsororo sɛ́bɛ mii kánmi na, mɔ sèʔé i mii cárimi kolomɔ kele córo mii kurugo.

²⁷ Mɔ n kpɛ̀ʔɛlɛyɛ le mii tɔ́lɔyi na, ní i mii tɛɛsɔ̀lɔgèle myɛ kɔ̀rɔsíi, n tɛɛ̀laʔala kúun n kaan mii nyɔ̌ngèle ma.

²⁸ Mii i waragi ni ŋuu àmɛɛ yafɔnʔɔgɔ nyɛ lè, wàlá àmɛɛ burogo nyɛ, gee káfyaan kpóo lè.