Zyɔbi 12 - Cebaara Bible 2010

Zyɔbi syɛɛnlurugori: Kolocɔlɔɔ i nyɛ syɛɛngbaɔn, syɔɔn a gbǎn wi kàriga í

¹ A Zyɔbi wi yari:

² «Ki i wéle móō kányɛʔɛ na yele má syɔɔn ye jóomi nyɛ, ní yele ní sícilimi a pínɛ kùu.

³ Mii si na, sícilimi myɛ wɔ́ɔ i nyɛ mii ma àmɛɛ yele nyɛ lè, mii ga cɛ́rɛ n sɔ̀lɔ yele na í. Wìí wi nyɛ wi o kérigèle naa cánvɔlɔ í?

⁴ Mii n baa pye syɔɔnwaa wee wi nyɛ lè kataanra yála wi tàannyɛnnɛ ma, lǎli ni mii ga ni mii Kolocɔlɔɔ mɛ́ɛgi yiri lè jàngó wi lóʔo mii ma. Syɛɛnsinw wi nyɛ lè kajoolo fun, wi n baa pye kataanra yála!

⁵ Wɔʔɔgɔfɔw ga yɛlɛ yarigaa na í kapye faʔari ban í! Bele be nyɛ sìi na yɛɛ̀nyinge na lè, koro gi nyɛ be sɔ̀nguri. Pe i koro fíigi bele ma, poro bele tɔ́lɔyɔ yi kpírigi lè.

⁶ Bi gi taa bele be yáriri nɛnɛ ni syoo lè, yɛɛ̀nyinge i nyɛ be fànikpaayi ni. Bele be kapeegèle pingi Kolocɔlɔɔ na lè, pe n tɛ́ɛn ŋɔ́ndaala na, ní bele myɛ pe be fǎngi pye lè pe Kolocɔlɔw.

⁷ Mi si yaweeri yíbe, ti a mɔ tama, ní nyɛ̀ʔɛni féjɛɛngèlē, ke a kérigèle tɛ̀ɛn mɔ na.

⁸ Mi joo ní tári ní, ti a mɔ tama, sólomi lɔ̀ʔɔ fàala a gi joo tɛ̀ɛn mɔ na.

⁹ Toro myɛ níngi ni, gìí gi nyɛ ki ga gi cán Yawe kɔ́gi gi gee bee myɛ kpéʔele í?

¹⁰ Yala o yala li nyɛ sìi na lè, woro kɔ́gi ni li sìíw nyɛ, ní syɔɔn ye céri myɛ ŋɔ́ngara.

¹¹ Ki o nyuu kánmi naa na ì níì jo: ‹Líiweeli i syɛ́ɛnri sɛʔɛ ni cángi, àmɛɛ nyínni yaliiri tàanma cángi lè ì?›

¹² Sícilimi i nyɛ wolɛɛbèle ma, cánni si i taagi sìinɛʔɛw ni.

¹³ Kolocɔlɔɔ má sícilimi ní séew nyɛ. Woro má láliiw, ní cánni nyɛ.

¹⁴ Wi ga yarigaa jaa, ki a ní gbǎn faan í. Wi ga syɔɔn tɔ́n, pe a ní gbǎn wi múgu í.

¹⁵ Wi ga lǒyi cò, ki n pye waama. Wi ga yi yaʔa, yi n tári nyìn.

¹⁶ Woro má fǎngi ní kérigèle cánna nyɛ. Wee wi pùuni lè wàlá a wi i pèle pùuní, woro má be nyɛ.

¹⁷ Wi i yarifɔbèle kɔ́ri ni tórogi púlori na. Wi i kútiijoobèle yákirii nyáʔami.

¹⁸ Wi i fànʔafɔbèle fànya sánʔana be na, ní i mɛnɛyɛ téeri ni be pwoo sárigèle ni.

¹⁹ Wi i sáriga-wòlobèle kɔ́ri ni tórogi púlori na. Ní i fǎngi fɔ̀ɔlɔ cáan, bele be sámaga n télege lè.

²⁰ Bele be sámaga n tága peyɛɛ na lè, wi i poro syɛ́ɛnri syoo be ma. Wi i kérigèle sɛʔɛ-mí-cánna yirigi wolɛɛbèle ni.

²¹ Wi i faʔara wáa mɛ́ɛyi fɔ̀ɔlɔ na. Wi i woniribèle yakpalira syoo be ma.

²² Wi i yébilimi kalaragēle múru ni yaari, wi i kùúw nyínmɛ yirigi gbɛ̀ɛ́nmi na.

²³ Wi i kàa taari syɛɛnfeleyi na, ní i yi kúu. Wi i syɛɛnfeleyi nɛʔɛgi, ní i yi caragi.

²⁴ Wi i cánni yirigi tári syɛ̀ɛnnɛ kundigibéle ni. Wi i be yaari pe i curugu ni máari fìimɛ tára ni, kologo fun ni.

²⁵ Pe i tala ni máari yébilimi ni, gbɛ̀ɛnmɛ fun. Pe i fági ni máari móō singbaadinbéle bɛɛ.