Zyɔbi 11 - Cebaara Bible 2010

Sofari jooli: Lúru mi pan Kolocɔlɔɔ ma

¹ Sofari wi lè Naama ye wów, a woro syɛ́ɛnri láa n gi joo níì jo:

² «Syɛɛnlurugoro ga yɛlɛ bi taa syɛɛnnɛʔɛri naa na ì? Nyɔɔtaangi lé gi yɛlɛ bi tànʔa kaan syɔɔn ma?

³ Mɔ joonɛʔɛgi í syɛ́ɛnbèle kaan lé be pyèri? Mɔ í ra miyɛɛ nyɛ́nɛ lé syɔɔn si a kɔ́ fɛ̀ɛrɛ wáa mɔ na í?

⁴ Mɔ n jo: ‹Mii tamani i nyɛ dìgire fun, mii n fílige mɔ yɛ́ʔɛ ma.›

⁵ Ee! Kolocɔlɔɔ ga maa ni caa bi joo, bi wi nyɔɔsaliyi múgu bi syɛɛnlurugori kaan mɔ ma,

⁶ wi ga maa wi sícilimi kalaragēle tɛ̀ɛn mɔ na, bee bi sɔ̀lɔ cánni na lè, mɔ a dée gi cán Kolocɔlɔɔ ga mɔ wɔʔɔ n yɛlɛ ní mɔ kolomi ní í.

⁷ Kolocɔlɔɔ kérigèle ge cùru lè cama ni, a mɔ a gbǎn ge cán lé? A mɔ a gbǎn Séew Myɛ Kàfɔlɔ kèlē myɛ cán lé?

⁸ Ke n léeli n sɔ̀lɔ nyɛ̀ʔɛgèle na, nyàʔá mɔ a pye? Ke n cùru n sɔ̀lɔ kúbèle tɛɛkòrogo na, nyàʔá mɔ a cán?

⁹ Ke tímanaganmi n tɔnɔ n sɔ̀lɔ tári na, níì kpɔ́ʔɔ n sɔ̀lɔ sólomi lɔ̀ʔɔ na.

¹⁰ Wi ga ni sɔ̀lɔ́, wi ga syɔɔn le kàso ni, wi ga syɔɔn yeri wi kútiiw ma, wìí wi a gbǎn cée?

¹¹ Níì cán woro wi gbanzan syɛ́ɛnbèle cán n wàli. Wi i kolomi nyaagi sɛʔɛwelele fun ni.

¹² Kàjáa nyùnbiremɛ fun sícilimɛ bi nyɛ syɔɔn ma, syɔɔn n see àmɛɛ seʔe jofani pya nyɛ lè.

¹³ Mɔ na, mɔ ga mɔ fúngi kàriga Kolocɔlɔɔ ma, níì mɔ kɔ́yi yìrige wi ma,

¹⁴ mɔ ga sìnzinmi léeli mɔ kɔ́gi na, mɔ si ga fɔ̀lɔ sìnzinmi na bi kòro mɔ fanikpaayi ni í,

¹⁵ lǎli bee ni mɔ a mɔ yɛ́ɛgi yìrige fɔɔnrɔ fun, mɔ a sámaga yére, si pye fyáara fun.

¹⁶ Níì cán mɔ a fɛ̀ʔɛ mɔ fɔrɔgi na, mɔ a sɔ̀ngí taa gi na yagana àmɛɛ lɔ̀ʔɔ nyɛ, gee gi fóo n sɔ̀lɔ lè.

¹⁷ Mɔ sìíw a gbɛ̀ɛnmɛ taa bi sɔ̀lɔ cânvulɛɛli na, yébilimi a pye àmɛɛ nyǐngi nyɔ́ɔ nyɛ lè.

¹⁸ Mɔ a nyìn nànzorori na níì cán sɔ̀ngumɔ tɛɛtaʔaga a pye yaà. Mɔ a wéle bi miyɛɛ màʔa, si sínɛ yɛɛ̀nyinge na.

¹⁹ Syɔɔn faala a mɔ fígiri mɔ larizinɛni ni í, syɛ̀ɛnnɛ saʔa a ra kacànna nyɛ́ɛri bàā kaangi mɔ ma.

²⁰ Kàjáa syɛɛnpeebèle nyapiigéle a kálagi. Pe a tɛɛlaraga taa í. Kùúw wi a pye be sɔ̀ngumi tɛɛtaʔaga.»