Zyɔbi 10 - Cebaara Bible 2010

Zyɔbi syɛɛnlurugori i syée: Kolocɔlɔɔ ga mii sámaga yarigaa kánma na kapye bi mii kálagi ban í

¹ «Mii sìíw láa n kwɔ́ɔ mii ni. Mii a mii káyaagi jóomɔ yaʔa pi mii kánmi joo tɛ̀ɛn. Mii funnyɛnigɛtɔw a ra nyuu.

² Mii n Kolocɔlɔɔ pye: ‹Mɔ a kɔ́ mii kolo í. Kéelee na mɔ mii túngu lè, li tɛ̀ɛn mii na.

³ A gi mɔ dɛ́nɛ lé bi fǎngi gbàn, bi mɔ kɔ́yi fáli faʔa, si fɔ̀lɔ syɛɛnpeebèle katimanagéle na?

⁴ Cere nyapiigéle lé ge nyɛ mɔ na? Mɔ wéleganmi i nyɛ lé àmɛɛ syɔɔn wéleganmi nyɛ lè?

⁵ Mɔ cányi i nyɛ lé àmɛɛ syɔɔn wóyi nyɛ, wi lè yakuugo? Ba mɔ yɛ́ɛgèle i nyɛ lé àmɛɛ syɔɔn cányi nyɛ lè,

⁶ mɔ í náa mii tɛɛtooli caa wéle, si náa yíbege kpéʔele mii kapeeli kéele na?

⁷ Mɔ n gi cán ncan mii i nyɛ tɛɛlɛ fun. Wàa faala si a gbǎn mii yirige mɔ kɔ́gi ni í.

⁸ Mɔ kɔ́yi yi mii kpéʔele, yoro yi mii sámaga woboo ní, mɔ si ní i caa bi mii kálagi!

⁹ Sɔ̀ngi mi taa gi na mi cán mɔ n mii sámaga àmɛɛ be cóoro fánʔari lè, mɔ si ní i caa lé bi mii lúrugo kàriga támiige?

¹⁰ Mɔ ga mii wo àmɛɛ nɔ́nɔ nyɛ lè ì? Mɔ ga mii pye àmɛɛ furomazyi nyɛ lè ì?

¹¹ Mɔ n saliga, ní cere le mii na. Mɔ n mii tìin ní kaceleye, ní kapanra ní.

¹² Mɔ n fɔ̀lɔ mii ma sìíw ní kpɔ́ʔɔri na, mɔ i sɔ̀ngí ni taagi mii na ni mii sìíw kpáa wéle.

¹³ Kàjáa gee naa mɔ da làriga mɔ fúngi ni, mii n gi cán gee ki da pye mɔ sɔ̀nguri ni lè.

¹⁴ Mii ga ni kapeele pingi, mɔ nyɛ́nɛ i mii na. Mɔ a mii córo tɛɛlɛ fun syɔ́ɔn ní mii kolomi ní í.

¹⁵ Mii ga kolo, wɔʔɔlɔ i nyɛ mii na! Mii ga sín mii a fɔ̀lɔ́ nyǔngi yìrige í, ncan faʔari n mii tín, mii fɔ̀rɔgi i mii yɛ́ɛgi wóo.

¹⁶ Mii ga tíi níì mii nyúngi yìrige, mɔ i nyɛ mii kurugo àmɛɛ càaraɔ nyɛ lè. Mɔ i mii kpúmɔn níìgēle ní kakpoloyo ní.

¹⁷ Mɔ ní i séerafɔvɔnbéle yìrigí mii kánmi na, kàa i fàrá mɔ fundanʔagbɔɔri na mii kánmi na, sùlasiibéle i peyɛɛ fɛ̀ɛ́ ni tuun mii na.

¹⁸ Ee! Nyàʔá na mɔ mii yirige mii nɔ́ɔw láʔa ni? Mii mǎà dée kùu, nyapile faala a dée mii nyaa í.

¹⁹ Mii mǎà dée pye mɔ a jo mii da pye beè í, mii woguuw pe a dée see bi fala ní mii ní nyángi ma.

²⁰ Mii sìíw canya nyɔ́ɔ wi nyɛ jòorí? Wi mii yaʔa nya! Wi léeli nya mii na, mii si fundaanra taa pye cɛɛri,

²¹ sáni mii í kári bi sa jée lè yébilimi tára ni, ní kùúw nyínmɛ ni, mii si a ní lúru pan í,

²² beè yébilimi nyɛ àmɛɛ yébiliwɔɔlɔ tára nyɛ lè, kùúw nyínmɛ, beè kanyaʔamiri nyɛ fǎngi na lè, beè gbɛ̀ɛ́nmi nyɛ àmɛɛ yébilimɛ nyɛ lè.› »