Zyɔbi 1 - Cebaara Bible 2010

Zyɔbi sɛʔɛweleli wozelile

¹ Nànwaa maa pye yaà Usi tári ni, pe i wi yiri Zyɔbi. Wi maa tɔ̀nɔ n pye kajoolo fun syɔ́ɔn, níì sín. Wi maa ni fɛ̀ɛgí Kolocɔlɔɔ na, ní i còʔoró kapeebyeri na.

² Wi maa nànbiigéle kɔrɔsiin ní calipiigèlē taanri see.

³ Wi yaweeri n pye bàala selebingéle taanri ní saala kagunɔ, ní fàlibaaya selebinnɛ ní saala kagunɔ, ní nìpɛ́ɛribéle saala siin ní dabata, ní jòfanicaaya saala siin ní dabata, á wi falipyebèle wɔ́ɔ̀ nɛʔɛ gbanʔama. Nǎnw bee maa kpɔ́ʔɔ n sɔ̀lɔ canʔafolomɔ syɛ́ɛnbèle myɛ na.

⁴ Wi nànbiigèle maa ni lìigboloyo líi ní peyɛɛ ní ni sɔ̀lɔ́ peyɛɛ kpaaya ma taʔalagèlē taʔalagèlē, ní i tungu pe senyɛnjebèle taanri ma a pe ba ni pìnɛ́ ni líi ní i gbo ní poro ní.

⁵ Lìigboloyi bee canya ga foro, Zyɔbi n tun pe n sáà wi jáabèle yeri, wi n baa be sámaga-nyɔɔni fáli kpéʔele. Wi i gáà sɔ̀li n yìri n sáriga-sórigoo wòlo pe myɛ nibin nibin kéele na. Zyɔbi i gáà jo: «Dɔ̀ʔɔ́ mii jáabèle n kapeele pye, níì dánga syɛ́ɛnrɛ joo n wáa Kolocɔlɔɔ na be fúngi ni.» Koro Zyɔbi da tàli ni kpéʔele.

⁶ A ki ga pye cangaa, a Kolocɔlɔɔ pìíbèle pan n baa yére Yawe yɛ́ʔɛ ma, a Sutanaw wɔ́ɔ̀ pan n baa yére be níngi ni.

⁷ A Yawe Sutanaw pye: «Sán mɔ yìri?» A Sutanaw Yawe yari: «Tári mii fé ni forogi ni nyaari ni máari di ni.»

⁸ A Yawe Sutanaw pye: «A mɔ mii falipyew Zyɔbi kɔ̀rɔsíi lé? Syɔɔnwaa o nyɛ wi felege tári na í. Wi i nyɛ kajoolo fun, níì sín. Wi i fɛ̀ɛgí Kolocɔlɔɔ na, ní i còʔoró kapeebyeri na.»

⁹ A Sutanaw Yawe yari: «A Zyɔbi i fɛ̀ɛgí lé Kolocɔlɔɔ na gbanzan?

¹⁰ Mɔ ga tɛʔɛ̀ sùlu n wi ní wi kpáagi wòolo, ní wi yáriri myɛ màʔa n kpàra ì? Mɔ n dùba taʔa wi kɔ́yi fáli na. A wi yaweeri yàli n màʔa tári ni.

¹¹ Kàjáa mɔ kɔ́gi sánʔa mi tánga mi wéle yáriri myɛ na di nyɛ wi ma lè. Mii n tága gi na wi a dánga syɛ́ɛnrɛ joo bi wáa mɔ na mɔ nyɛ́nɛ na.»

¹² A Yawe Sutanaw pye: «Wéle, yáriri myɛ di nyɛ wi ma lè ti i nyɛ mɔ kɔ́lɔ na, kàjáa mɔ a kɔ́ kɔlɔ̀ taʔa wi na í.» A Sutanaw fala n núngo Yawe yɛ́ʔɛ ma.

¹³ Cangaa n Zyɔbi nànbiigèle, ní wi calipiigèle yaʔa ke i líi ní i dùvɛɛnw gbo ke yɛʔɛfɔlɛɛw kpaʔa ni,

¹⁴ a tunduɔn pan Zyɔbi ma n baa wi pye: «Nǐyi maa pye ni fála, á jòfanicaayi si i líi yi taana,

¹⁵ a Saba ye baa foo n too di na, n di cò, níì falipyebèle kpóo ní ŋɔséew ní. Mii nibin wi fàn n syɔɔ n pan ba gi joo mɔ ma.»

¹⁶ N woro yaʔa jooli na, a wàa nikwɔɔ pan n baa jo: «Kolocɔlɔɔ náagi n yìri nyɛ̀ʔɛni na n baa too n yaweeyiligèle ní falipyebèle sórigo mɛnɛ mɛnɛ. Mii nibin wi fàn n syɔɔ n pan ba gi joo mɔ ma.»

¹⁷ N woro yaʔa jooli na, a wàa nikwɔɔ níì pan n baa jo: «Kalide ye n peyɛɛ tíla kabiya taanri n baa too fàlibaayi na n yi cò, níì falipyebèle kpóo ní ŋɔsée ní, á mii nibin fàn n syɔɔ n pan ba gi joo mɔ ma.»

¹⁸ N woro yaʔa jooli na, a wàa nikwɔɔ pan n baa jo: «Mɔ nanbiigèle ní mɔ calipiigèle maa pye ni líi ní i dùvɛɛnw gbo ke yɛʔɛfɔlɛɛw kpaʔa ni,

¹⁹ wéle a káfalakpɔʔɔ yìri fìími tára kabaan na n baa kpáagi jɛ̀ɛ́ngéle myɛ sicɛrɛ kpúmɔn, a gi too wojáribèle na, a be kùu. Mii nibin wi fàn n syɔɔ n pan ba gi joo mɔ ma.»

²⁰ Lǎli bee ni a Zyɔbi yìri n wi burogbɔɔgi sulugu, níì wi nyúngi kùnu, níì tìgi n too tári na, n kpɔ̀ʔɔrɔli kpéʔele,

²¹ níì jo: «Mii n yiri mii nɔ́ɔw láʔa ni níbori, mii si a wɔ́ɔ lúru kári yaà níbori. Yawe wi gi kaan, Yawe si wi wɔ́ɔ̀ gi syɔɔ. Yawe mɛ́ɛgi gi yɛlɛ kaa kpɔ̀ʔɔrɔ́!»

²² Gee bee myɛ fúngo ni Zyɔbi ga kapeele pye í, wi ga joobeemɛ joo n wáa Kolocɔlɔɔ na í.