Jàbɔbèle 8 - Cebaara Bible 2010

Efirayimi ye fúnbɛɛnw kéele

¹ A Efirayimi nǎnbèle wi pye: «Kɔ́rɔwìí na mɔ gee naa kpéʔele nya ní wolo ní? Lǎli ni mɔ da ni syée sa kapɛɛnni kpúmɔn ní Madyan ye ní lè, nyàʔá na mɔ da wolo yeri í?» A be kàsii cò ní wi ní gbanʔama.

² A wi be yari: «Nyàʔá mii kpéʔele tɔ́ɔliw ni, gee gi nyɛ bi gbǎn tímana ní yele wógi ní lè? Ɛrɛzɛn kɔ́ri yele Efirayimi ye caa lè, toro ga sɔ̀lɔ Abyezɛɛri ɛrɛzɛncɛnɛw na ì?

³ Yele kɔ́yi ni Kolocɔlɔɔ Madyan ye kùndigibèle le pe lè Orebi, ní Zeebi. Nyàʔá si mii gbàn n kpéʔele, gee gi nyɛ bi gbǎn tímana ní yele wógi ní lè?» Lǎli ni wi joo n kwɔ́ɔ kánmi bee na lè, a be fúnyi tìgi wi kurugo.

Zyedeyɔn, Zyuridɛnw canʔafolomɔ ma

⁴ Zyedeyɔn ní nǎnbèle sirakele ní dabata be pye ní wi ní lè, a be sáà nan Zyuridɛnw na, níì wi jeli. Pe si maa tɔ̀nɔ n fɔ̀rɔ, ní sèʔê taʔa pe nigoobèle na ni nɛnɛ.

⁵ A wi sáà Sukɔti syɛ́ɛnbèle pye: «Mii i yele nyɛ́ɛri, ye búrukuruyo kaan syɛ́ɛnbèle ma be nyɛ ní mii ní lè, níì cán pe n fɔ̀rɔ. Madyan ye fànʔafɔbèle kurugo mii nyɛ ni nɛnɛ, pe lè Zeba ní Salimuna.»

⁶ A Sukɔti kùndigibèle wi yari: «Zeba ní Salimuna lé mɔ kɔ́ɔ̀ taa n cò n kwɔ́ɔ á gi nyaa wolo í búru kaan mɔ sulasiibèle ma?»

⁷ A Zyedeyɔn jo: «Awá, lǎli ni Yawe ga sáà Zeba ní Salimuna le mii kɔ́yi ni lè, mii a ba yele kpúmɔn cɛnɛ ní fìími tára solovinge, ní wúuro ní.»

⁸ A wi ga yiri beè, a wi lúgu n kári Penuwɛli ma n ní sáà nyɛ́ɛrigi wonijanga nyɛ́ɛri poro ma. Syɛɛnlurugori Sukɔti syɛ́ɛnbèle da kaan wi ma lè, a Penuwɛli wóbèle wɔ́ɔ̀ dee bee wonijanra kaan wi ma.

⁹ A wi wɔ́ɔ̀ Penuwɛli syɛ́ɛnbèle pye: «Mii ga lúru n pan yɛɛ̀nyinge na, mii a ba kpaataʔa-tɔ́nɔgi naa cáan.»

¹⁰ Zeba ní Salimuna, ní be kapɛɛnkpumɔnbèle si maa pye Karikɔɔri ni. Pe n pye nànbēle selebingéle kɔrɔsiin ní saala kagunɔ félege. Bele myɛ pe da kòro canʔafolomɔ kabangi kapɛɛnkpumɔnbéle myɛ ni lè, poro bɛɛ. Pe maa nànbēle sirakamayɛ kɔrɔni kpóo be ni, be pye lè ŋɔséebéle fɔɔlɔ.

¹¹ A Zyedeyɔn lúgu n sɔ̀lɔ fànikpaayi kòrofɔɔlɔ kólogo ni, Noba ní Yogbeha canʔafolomɔ kabangi na n sáà tɛɛ̀tɛ́ɛngee wòolo jáa, poro bele pe da ni sɔ̀ngí lè yafyɛn a poro taa í.

¹² A Zeba ní Salimuna fàn n kári, pe lè Madyan fànʔafɔbèle siin. A Zyedeyɔn taʔa be na ni nɛnɛ n sáà be cò, níì kapɛɛnkpumɔnbèle myɛ nɛnɛ n cariga.

¹³ A Zyowasi jáaw Zyedeyɔn lúru n yìri kapɛɛnni ma ni maa, níì sɔ̀lɔ Herɛsi dǎndamagi kólogo ni.

¹⁴ A wi baa Sukɔti syɛ́ɛnbèle nìgɔcariwaa cò níì wi yíbe, a woro Sukɔti kùndigibèle, ní wolɛɛbèle mɛ́ɛyɛ sɛ́bɛ n kaan wi ma. Pe n pye nànbēle togoye taanri ní kpɔrigɔ ní kɔrɔsiin.

¹⁵ Koro kàdoʔo ma a wi pan Sukɔti syɛ́ɛnbèle ma n baa jo: «Zeba ní Salimuna si be bele, bele kéele na yele da mii faʔa lè níì jo: ‹Zeba ní Salimuna lé mɔ kɔ́ɔ̀ taa n cò n kwɔ́ɔ á gi nyaa wolo í búru kaan mɔ sùlasiibèle ma be fɔ̀rɔ lè?› »

¹⁶ Lǎli bee ni a wi kěgi wólɛɛbéle cò níì fìími tára solovinge, ní wúuri láa n tɛ́ʔɛ n Sukɔti syɛ́ɛnbèle yɛ́ɛyɛ jée cama.

¹⁷ A wi wɔ́ɔ baa Penuwɛli kpaataʔa-tɔ́nɔgi cáan, níì kěgi syɛ̀ɛnnɛ kpóo.

¹⁸ A wi Zeba ní Salimuna pye: «Nǎnbèle bele yele kpóo Tabɔɔri ma lè, mɛ̀ɛ́ pe da pye n sɛ́ɛ?» A be wi yari: «Pe maa tɔ̀nɔ n mɔ wíri. Pe myɛ nibin nibin maa pye àmɛɛ fànʔafɔlɔ jàala nyɛ lè.»

¹⁹ A wi jo: «Mii senyɛ̀nnɛ be pye, nafɔlɔ nibin wi wo see. Yawe woweew mɛ́ʔɛ na, yele ga maa be yaʔa sìi na, mii mǎà dée yele kpóo í.»

²⁰ A wi gi joo wi jaalɛɛw Yetɛɛri ma níì jo: «Yìri mi be kpóo.» Kàjáa nìgɔcariw ga wi ŋɔséew kɔ́n í àmɛɛ wi fɛ̀ɛgí lè, níì cán wi maa pye wojáriɔ.

²¹ A Zeba ní Salimuna jo: «Mɔ tiimaa mi yìri mi wolo kpóo. Níì cán kánmee na nàɔn nyɛ lè, ànbée wi fǎngi wɔ́ɔ̄ nyɛ.» A Zyedeyɔn fala n yìri n Zeba ní Salimuna kpóo, yafereri di pye be fàlibaayi yátiiye ni lè níì toro wòlo.

Zyedeyɔn sìíw kwɔ́ɔmɔ kéele

²² A Isirayɛli syɛ́ɛnbèle Zyedeyɔn pye: «Ki n yɛlɛ mɔ í pye wolo nyúngi na, mɔ jáaw í ba pye wolo nyúngi na, mɔ jáaw jáa í ba pye wolo nyúngi na, níì cán mɔ n wolo syɔɔ Madyan ye ma.»

²³ A Zyedeyɔn be pye: «Eʔe, mii a pye yele nyúngi na í, wàlá mii jáaw í ba pye yele nyúngi na í, Yawe wi a pye yele nyúngi na.»

²⁴ A Zyedeyɔn níì be pye: «Mii si i yele nyɛ́ɛri yarigaa nibin na, koro gi nyɛ ye myɛ nibin nibin í vèʔebēle nibin nibin wòlo yáriri ni yele taa kapɛɛnni na lè bi kaan mii ma.» Tɛɛ̀ vèʔebēle maa pye nigoobèle na, níì cán pe maa pye Isimayɛli yòdaʔaya.

²⁵ A be jo: «Ki n wolo dɛ́nɛ bi be kaan.» A be burogbɔɔgaa cáan, pe myɛ nibin nibin si i vèʔebēle nibin nibin wóo yáriri ni be taa kapɛɛnni na lè ni cáan gi na.

²⁶ Tɛ́ɛw vèʔebēle Zyedeyɔn da nyɛ́ɛri lè, a pe baa pye cúlobéle toko félege. Yátiiyi yaferere, ní líiyi tɛɛ̀ vèʔebēle, n fàra lɔgbanri fàninyɛɛɔn na Madyan fànʔafɔbèle da ni nii lè, toro da córo di ni í. Nyɔ̀ʔɔdiriyi yi pye be fàlibaayi yátiiye ni lè, yoro ga wɔ́ɔ̀ córo í.

²⁷ A Zyedeyɔn wi tɛ́ʔɛ n efɔdi sámaga n tɛ́ʔɛ wi kěgi ni ki lè Ofira. A ki baa pye yaà beè kanɔnʔɔbye-yariga Isirayɛli ye myɛ ma. A gi pye Zyedeyɔn ní wi kpáagi wòolo na karinyanga.

²⁸ A Madyan ye fǎngi kwɔ́ɔ Isirayɛli ye yɛ́ʔɛ ma, pe ga níì nyǔnyi yìrige í. A tári ŋɔ́n n daa yɛ̀ʔɛlɛ togoye siin fúngo ni, Zyedeyɔn sìíw làla myɛ ni.

²⁹ A Zyowasi jáaw Yerubaali lúru n sáà kòro wi kpáagi ni.

³⁰ Nànbiigéle togoye taanri ní kpɔrigɔ maa pye Zyedeyɔn ma, wi pìiseebéle, níì cán wi cébèle maa nɛʔɛ.

³¹ Wi cefàra-mí-láaw wi pye lè Sisyɛmi ni, wee bee maa wɔ́ɔ̀ nànbile see wi ma, a wi i li yiri Abimelɛki.

³² A Zyowasi jáaw Zyedeyɔn lɛɛ n tín ní náà kùu. A be wi tɔ́n wi tóow Zyowasi nyángi ni, Ofira ni, ki lè Abyezɛɛri wógi.

³³ Zyedeyɔn kùúli kàdoʔo ma a Isirayɛli ye níì lúru ni kanɔnʔɔri kpéʔele ní Baalibèle ní. Pe maa Baali-Beriti láa wi pye poro kolocɔlɔw.

³⁴ Isirayɛli ye ga sɔ̀ngi n taa Yawe be Kolocɔlɔw na í, woro wee wi da be yirige pe nigoobèle myɛ kɔ́yɔ ni pe be màʔa lè.

³⁵ Yerubaali wi lè Zyedeyɔn, kacǎnyi myɛ wi kpéʔele Isirayɛli ye na lè, pe ga baa yi sìndɛɛgi lúrugo wi kpáagi wòolo ma í.