Jàbɔbèle 7 - Cebaara Bible 2010

Nǎnbèle sirakele ní dabata be pye lè Zyedeyɔn wóbèle

¹ Yerubaali wi lè Zyedeyɔn, woro ní bele myɛ be pye ní wi ní lè, a be sɔ̀li n yìri nyǐngi nyɔ́ɔ na n sáà tɛ́ɛn Harɔdi pùnweegi nyɔ́ɔ na, Madyan kapɛɛnkpumɔnbèle si i nyɛ wodɛ́ɛnbéle ní solomɔkulo kàbangi na, nlaa yaà More dǎndamagi na n sáà nan jǐnlɔgi na.

² A Yawe Zyedeyɔn pye: «Syɛ́ɛnmi bi nyɛ ní mɔ ní lè, pi n nɛʔɛ n tóro mii í Madyan ye le bi kɔ́yi ni. Gee bee a kɔ́ pye Isirayɛli ye ma kpɔɔmɔ kéele mii kánmi na paa gi nyuu si jo: ‹Wolo kɔ́yi yi wolo syɔɔ.›

³ Koro na ki n yɛlɛ mi gee naa jáari syɛ́ɛnbèle ma pe gi lóʔo mí be pye: ‹Syɔɔn o syɔɔn wi fɛ̀ɛgí lè ní i cɛ̀lɛ́, ki n yɛlɛ wi núngo Galaadi nyanbelegi taana wi lúru waa syée.› » A pèle sirakama ní selebinnɛ yiri be ni n lúru n kári, á wozanbèle kòro selebingéle kagunɔ.

⁴ A Yawe Zyedeyɔn pye: «Syɛ́ɛnmi n sèʔê nɛʔɛ n toro, ki n yɛlɛ mi tìgi ní bi ní lǒgi ma, mii a sa be cɔɔnri yaà beè mɔ ma. Wee kéele na mii ga sáà gi joo mɔ ma lè níì jo: ‹Wee naa a kári ní mɔ ní,› woro a kári ní mɔ ní. Mii si ga gi joo mɔ ma wee kéele na lè níì jo: ‹Wee naa a kári ní mɔ ní í,› woro a kári ní mɔ ní í.»

⁵ A wi tìgi ní syɛ́ɛnmi ní lǒgi ma. A Yawe Zyedeyɔn pye: «Bele myɛ pe ga ni lǒgi gbo ní nyíngèle ní àmɛɛ pɔɔ̀n gbo lè, ki n yɛlɛ mi poro yirige bele myɛ ni pe yégunri cáan ní i gbo lè.»

⁶ Bele pe da lǒgi kóo ní kadaagèle ní n gbaa lè, a poro pye nànbēle sirakele ní dabata, á syɛ́ɛnmi wozanma myɛ yégunri cáan ni gbo.

⁷ A Yawe Zyedeyɔn pye: «Nǎnbèle sirakele ní dabata be lǒgi kóo n gbaa ní nyíngèle ní lè, poro mii a tɛ́ʔɛ bi yele syɔɔ si Madyan ye le mɔ kɔ́yi ni. Ki n yɛlɛ syɛɛnsanbèle myɛ nibin nibin í lúru da syée be kèye ma.»

⁸ A Zyedeyɔn Isirayɛli nǎnbèle myɛ nibin nibin lúrugo n tórigo be kèye ma. Pe si maa be yaliiri ní be tòmaayi syɔɔ be ma. A wi kòro ní nǎnbèle sirakele ní dabata ní. Madyan ye tɛɛ̀tɛ́ɛngi si maa pye wi tìgimi ni, jǐnlɔgi ni.

Fàndaari fɛ̀ɛ kéele

⁹ Yébiligi bee ni a Yawe Zyedeyɔn pye: «Yìri mi tìgi be tɛɛ̀tɛ́ɛngi ma, níì cán mii n be le mɔ kɔ́yi ni.

¹⁰ Kapye mɔ i fɛ̀ɛgí bi tìgi yaà sa too be na, mɔ falipyew Pura pínɛ ní miyɛɛ ní ye tìgi be tɛɛ̀tɛ́ɛngi ma.

¹¹ Gee be nyuu lè mɔ a gi lóʔo, koro kàdoʔo ma mɔ kɔ́yi a fànʔa taa mɔ í tìgi yaà be tɛɛ̀tɛ́ɛngi ma.» A wi ní wi falipyew Pura pínɛ n tìgi yaà fwɔɔ n sáà nan tɛɛ̀tɛ́ɛngi kɔ̀rɔsiifɔɔlɔ tɛ́ʔɛ na.

¹² Madyan ye, ní Amalɛki ye, ní canʔafolomɔ kabangi syɛ̀ɛnnɛ myɛ si maa baa yàli jǐnlɔgi ni àmɛɛ kúdo dìndinge nyɛ lè, á be fàlibaayi nɛʔɛ n pye córomɔ fun àmɛɛ sólomi lɔ̀ʔɔ nyɔ́ɔ táminyɔɔ nyɛ lè.

¹³ Zyedeyɔn baa nan lè, a koro bɛ̀ɛ nànwaa i ŋúnɔgɔ nyuu ni tèé wi pínɛnyɛnnɛ na níì jo: «Mii n ŋúnɔ n orizye búrupile nyaa a li i kòlogí n baa jée Madyan ye tɛɛ̀tɛ́ɛngi ni, níì kári fwɔɔ n sáà fànikpaagi círi n cáan n gi wáa n càliga a gi càli n kòro nya.»

¹⁴ A wi pínɛnyɛnw wi yari: «Gee bee o nyɛ yarigaa nikwɔɔ í, Zyowasi jáaw Zyedeyɔn wi lè Isirayɛli ye nǎnw, woro ŋɔséew wii. Kolocɔlɔɔ n Madyan ye ní tɛɛ̀tɛ́ɛngi wòolo myɛ le wi kɔ́yi ni.»

¹⁵ Lǎli ni Zyedeyɔn ŋúnɔgi syɛ́ɛnrɛ ní gi kɔ́rɔw lóʔo lè, a wi tìgi n too n kpɔ̀ʔɔrɔli kpéʔele, níì yìri n lúru n pan Isirayɛli ye tɛɛ̀tɛ́ɛngi ma n baa be pye: «Ye yìri, níì cán Yawe n Madyan ye tɛɛ̀tɛ́ɛngi wòolo le yele kɔ́yi ni.»

Madyan ye nɛnɛ-mí-carigali kéele

¹⁶ A Zyedeyɔn nǎnbèle sirakele ní dabata tíla kabiya taanri, níì tòmaaya kaan pe myɛ ma n fàra kasànwaagéle na ní naà nìmubwɔɔgéle ní, kasǎngèle ni.

¹⁷ A wi be pye: «Yaa mii wéle, gee mii ga kpéʔele lè, ye koro kpéʔele. Mii ga tɛ́nɛ sáà nan tɛɛ̀tɛ́ɛngi nyɔ́ɔ na, gee mii ga kpéʔele lè ye koro kpéʔele.

¹⁸ Lǎli ni mii ga tòmaagi wìi lè, n fàra bele myɛ na pe a pye ní mii ní lè, ye wɔ́ɔ ye yele tòmaayi wìi tɛɛ̀tɛ́ɛngi kàbanya myɛ na yé jo: ‹Yawe kéeli na, ní Zyedeyɔn kéeli na.› »

¹⁹ Zyedeyɔn ní nǎnbèle dabata be pye ní wi ní lè a poro sáà nan tɛɛ̀tɛ́ɛngi nyɔ́ɔ na. Koro n pye lǎli ni nyǐngi tíla lè kɔ̀rɔsiifɔbèle làrivalila kàdoʔo ma terire. A be tòmaayi wìi, kasǎngèle ge pye be kɔ́yi ni lè, níì koro jabagi.

²⁰ A kabiyi taanri tòmaayi wìi níì kasǎngèle jabagi, níì naà nìmubwɔɔgéle yirige n cò kàmɔnɔ kɔ́yi ni, níì tòmaayi cò kàliige kɔ́yi ni, níì yákpogèle wáa níì jo: «Yawe ŋɔséew kéele na ní Zyedeyɔn wów kéele na.»

²¹ A pe myɛ nibin nibin kòro be tɛ́ɛyi ni n tɛɛ̀tɛ́ɛngi màʔa. A tɛɛ̀tɛ́ɛngi nànbēle myɛ yìri ni fé, ní i yákpogèle wáa, ní i fé ni máari.

²² Lǎli ni nǎnbèle sirakele ní dabata tòmaayi wìi lè, a Yawe tɛɛ̀tɛ́ɛngi wòolo myɛ wáa peyɛɛ na ní ŋɔséebèle ní. A tɛɛ̀tɛ́ɛngi nànbēle yiri ni fé fwɔɔ n sáà nan Bɛti-Syita na, Serera kàbangi na, ní níì kári fwɔɔ n sáà nan Abɛli-Mehola nyɔ́ɔgi na, Tabati taana.

²³ A Isirayɛli nǎnbèle peyɛɛ gbóʔoro pe lè Nɛfitalii wóbèle, ní Azɛɛri wóbèle, ní Manase wóbèle myɛ ní n taʔa Madyan ye na ni nɛnɛ.

²⁴ A Zyedeyɔn tundunbéle tun Efirayimi nyanbeleyi kúlo myɛ ni, pe sa be pye: «Yaa tíri yaa Madyan ye fàrá, yé sa be jèʔele Zyuridɛnw tɛɛjeliye na fwɔɔ bi sa nan Bɛti-Bara na.» A Efirayimi nǎnbèle myɛ peyɛɛ gbóʔoro n sáà Zyuridɛnw tɛɛjeliye myɛ syɔɔ n taa fwɔɔ n sáà nan Bɛti-Bara na.

²⁵ A be Madyan kùndigibèle pèle siin taa n cò, pe lè Orebi, ní Zeebi. A be Orebi kpóo Orebi fálagi na, níì Zeebi kpóo Zeebi ɛrɛzɛn lógi tɛɛnùgugo ni. A be taʔa Madyan ye na ni nɛnɛ, ní baa pan ní Orebi, ní Zeebi nyúnyi ní Zyedeyɔn ma Zyuridɛn jeligɔgee na.