Jàbɔbèle 4 - Cebaara Bible 2010

Debora ní Baraki kéeli

¹ Ehudi kùúli kàdoʔo ma, gee gi pee Yawe nyɛ́nɛ na lè, a Isirayɛli ye ní i koro kpéʔele.

² A Yawe si be le Yabɛn kɔ́yi ni wi pye lè Kanaan ye fànʔafɔwaa. Hasɔɔri ni wi da pye wodɛ́ɛɔn ní fǎngi na. Wi kapɛɛnkpumɔnbèle kàfɔlɔ wi da pye Sisera. Woro maa pye wodɛ́ɛɔn ní Harosyɛti-Goyimi ni.

³ A Isirayɛli ye i yákpogèle wáa Yawe kurugo, níì cán tunmɔrɔ kapɛɛnkpumɔn-wòtorobéle saala sicɛrɛ ní dabata maa pye Yabɛn ma, a wi i Isirayɛli ye wɔʔɔ gbanʔama yɛ̀ʔɛlɛ toko fúngo ni.

⁴ Lǎli bee ni kanyaajoocew Debora wi pye lè Lapidɔti céw, woro maa pye kútiijooo Isirayɛli ni.

⁵ Wi maa ni tɛ̀ɛ́n Debora sɛʔɛtiigi láara ni, Arama, ní Betɛli níngi ni, Efirayimi nyanbeleyi kúlo ni. Beè Isirayɛli ye da ni syée wi ma kútiiw kèlē na.

⁶ A wi tun Kedɛsyi-Nɛfitalii ma, a be sáà Abinowami jáaw Baraki yeri n pan. A wi baa wi pye: «Yawe wi lè Isirayɛli ye Kolocɔlɔw, gee wi joo n gbàn lè, koro gi nyɛ gee naa, wi n jo: ‹Da syée mi sa Nɛfitalii ní Zabulɔn yòdaʔayi nǎnbèle pèle selebingéle kagunɔ kɔ́ri mi kári Tabɔɔri nyanbelegi ma.

⁷ Mii a Yabɛn kapɛɛnkpumɔnbèle kàfɔlɔ Sisera, ní wi kapɛɛnkpumɔn-wòtorobèle, ní wi kapɛɛnkpumɔnbèle kabiya kɔ́ri tórigo mɔ ma Kisyɔn lòcoologi nyɔ́ɔ ma, si sa wi le mɔ kɔ́yi ni yaà beè.› »

⁸ A Baraki wi pye: «Mɔ ga ni syée ní mii ní mii a kári. Mɔ si ga pye mɔ o syée ní mii ní í, mii a kári í.»

⁹ A wi wi yari: «Awá, mii a kári ní mɔ ní, kàjáa kólogi mɔ a tánʔa lè gee, mɔ a kpɔʔɔrɔ taa gi ni í. Níì cán cɔlɔɔ kɔ́lɔ ni Yawe a Sisera le.» Lǎli bee ni a Debora yìri n kári ní Baraki ní Kedɛsyi ma.

¹⁰ A Baraki Zabulɔn ní Nɛfitalii ye yeri n kpóʔoro Kedɛsyi ma, a nànbēle selebingéle kagunɔ lúgu n kári ní wi ní, a Debora wɔ́ɔ̀ lúgu n kári ní wi ní.

¹¹ Hebɛɛri wi pye lè Kenii ye wów, woro maa wàli n láʔa Kenii ye wozanbèle na pe lè Hobabi yòdaʔayi, Hobabi wi pye lè Mowizi céw tóo. A wi kári fwɔɔ n sáà wi fànikpaagi kóri Saanayimi syɛni tíigi láara ni Kedɛsyi taana.

¹² A pe baa gi joo Sisera ma níì jo Abinowami jáaw Baraki n lúgu Tabɔɔri nyanbelegi na.

¹³ A Sisera fala n wi kapɛɛnkpumɔn-wòtorobèle myɛ kpóʔoro, pe lè túnmɔri kapɛɛnkpumɔn-wòtorobéle saala sicɛrɛ ní dabata, n fàra syɛ́ɛnmi myɛ na bi pye ní wi ní lè, a be yìri Harosyɛti-Goyimi ma n kári Kisyɔn lòcoologi ma.

¹⁴ Lǎli bee ni a Debora Baraki pye: «Yìri, níì cán Yawe n Sisera le mɔ kɔ́yi ni níjanʔa, Yawe wi kíni mɔ yɛ́ɛgi na.» A Baraki fala n tìgi Tabɔɔri nyanbelegi na. Nǎnbèle selebingéle kagunɔ si i nyɛ ní wi ní.

¹⁵ A Yawe Sisera ní wi kapɛɛnkpumɔn-wòtorobèle myɛ, ní wi kapɛɛnkpumɔnbèle myɛ nɛnɛ Baraki yɛ́ʔɛ ma ní ŋɔséew ní. A Sisera tìgi wi kapɛɛnkpumɔn-wòtorow na ni fé tɔlɔyɔ na.

¹⁶ A Baraki kapɛɛnkpumɔn-wòtorobèle ní kapɛɛnkpumɔnbèle kɔ́ri n láa fwɔɔ n sáà nan Harosyɛti-Goyimi na. A be Sisera kapɛɛnkpumɔnbèle myɛ kpóo ní ŋɔséew ní, àlí nàɔn nibin ga syɔɔ í.

¹⁷ A Sisera fàn tɔlɔyɔ na n sáà nan Kenii ye nǎnw Hebɛɛri céw Yayɛli fànikpaagi na. Níì cán bɛ̀ɛlɛ maa pye Hasɔɔri fànʔafɔw Yabɛn, ní Hebɛɛri kpáagi wòolo nínge ni, wi lè Kenii ye wów.

¹⁸ A Yayɛli yiri n Sisera fàra níì wi pye: «Da maa nɛɛ naa, ni kàfɔlɔ. Ba jée nɛɛ naa mii ma, mɔ a kɔ́ ra fɛ̀ɛgí í.» A wi jée céw fànikpaʔa ni, a céw wi tɔ́n ní làgogaa ní n wi làriga.

¹⁹ A wi wi pye: «Mii i mɔ nyɛ́ɛri, lɔ̀ʔɔ cɛɛri kaan mii ma mii í gbaa. Lògbaagi i naa mii na.» A céw nɔ́nɔw kpàbi múgu níì wi kaan a wi gbaa, koro kàdoʔo ma ní níì wi tɔ́n.

²⁰ A wi níì wi pye: «Yére fànikpaagi nyɔ́ɔ na. Wàa ga nan naa ní baa mɔ yíbe níì jo: ‹A wàa i naa lé nɛɛ naa?› Mi wi pye: ‹Eʔe.› »

²¹ Sisera si maa tɔ̀nɔ n fɔ̀rɔ, a wi i ŋúnɔ gbanʔama. A Hebɛɛri céw Yayɛli fànikpaagi cèferilaa láa n fàra màrito na wi kɔ́gi ni ni sɛ̀ʔɛrɛ́ ni maa yɛrirɛ n baa cèferili kóri wi ma bɛ̀ɛ́ngi ǹjoʔo ma, a li foro n jée tári ni, a wi kùu.

²² Baraki si wi da taʔa Sisera na ni nɛnɛ lè, a woro kàri n nan, a Yayɛli yiri n wi fàra níì wi pye: «Da maa, nǎnwee mɔ caa lè, mii a wi tɛ̀ɛn mɔ na.» A wi jée wi fànikpaagi ni n Sisera kútɔw nyaa wozinɛɔ ní, cèferili si i nyɛ wi ma wogorilo ní bɛ̀ɛ́ngi ǹjoʔo ma.

²³ Cángi bee na Kolocɔlɔɔ Kanaan fànʔafɔw Yabɛn kùru n kaan Isirayɛli ye ma.

²⁴ A Isirayɛli ye kɔlɔ̀ taʔa Kanaan fànʔafɔw Yabɛn na ni syée fwɔɔ n taa n kɔ́ baa fànʔa taa n wi kálagi n kwɔ́ɔ péw.