Jàbɔbèle 3 - Cebaara Bible 2010

¹ Syɛɛnfeleyi yi nyɛ yee naa, yee Yawe da yaʔa a yi kòro beè lè jàngó Isirayɛli syɛ́ɛnbèle bele myɛ be nyɛ lè pe da kapɛɛngèle myɛ kéele cán ke da kpéʔele Kanaan ni lè í, jàngó bàā bele bee sɛʔɛ da wéle ní yi ní.

² Koro n kpéʔele jàngó Isirayɛli ye yìrigèle syɛ̀ɛnnɛ í kapɛɛnni kéele cán si li tama, poro bele be lè pe da kɔ́ɔ̀ li cán í.

³ Syɛɛnfeleyi bee yi nyɛ Filisitini ye fànʔafɔbèle kagunɔ, ní Kanaan ye myɛw, ní Siidɔn ye, ní Hɛvi ye be pye lè wodɛ́ɛnbéle ní Liban nyanbeleyi kúlo ni, nlaa Baali-Hɛrimɔn nyanbelegi na fwɔɔ n sáà nan Lebo-Hamati na.

⁴ Syɛɛnfeleyi bee maa yaʔa yaà jàngó bàā Isirayɛli ye sɛʔɛ da wéle ní yi ní, koro ga pye bi gi cán kapye pe a fɔ̀lɔ Yawe kajoodɛɛngèle na, gele wi joo n gbàn Mowizi ma a wi baa joo be toolɛɛbèle ma lè.

⁵ A Isirayɛli ye tɛ́ɛn Kanaan ye, ní Hɛti ye, ní Amɔri ye, ní Perezi ye, ní Hɛvi ye, ní Yebusi ye níngi ni.

⁶ A pe i be pìíbèle lée be càbala ní i be tiimaa calipiigèle kaangi pe nànbiigèle ma, ní i be kolocɔlɔbèle kpɔ̀ʔɔrɔ́.

JABƆBELE Otinyɛli kéeli

⁷ Gee gi pee Yawe nyɛ́nɛ na lè, a Isirayɛli ye i koro kpéʔele. Pe maa fɛ̀ʔɛ Yawe be Kolocɔlɔw na, ní i Baalibèle ní Asyerabèle kpɔ̀ʔɔrɔ́.

⁸ A Yawe fundanʔari cò naà Isirayɛli ye kánmi na, a wi be le Mezopotamii fànʔafɔw Kusyan-Irisyeyatayimi kɔ́yi ni. A Isirayɛli i báara Kusyan-Irisyeyatayimi ma n baa taa yɛ̀ʔɛlɛ kɔrɔtaanri.

⁹ A Isirayɛli ye i yákpogèle wáa Yawe kurugo, a Yawe syɔɔfɔlɔ kaan Isirayɛli ye ma, a woro be syɔɔ. Kalɛbi cɔnɔw Kenazi jáaw Otinyɛli wi pye.

¹⁰ A Yawe Pǐli pye wi na, a wi pye jàbɔlɔ Isirayɛli ye nyúngi na. A wi kári sa kapɛɛnni kpúmɔn, a Yawe Mezopotamii fànʔafɔw Kusyan-Irisyeyatayimi le wi kɔ́yi ni, a wi kɔlɔ̀ gbàn Kisyan-Irisyeyatayimi na.

¹¹ A tári pye yɛɛ̀nyinge na yɛ̀ʔɛlɛ togoye siin fúngo ni. A Kenazi jáaw Otinyɛli baa kùu.

Ehudi kéeli

¹² Gee gi pee Yawe nyɛ́nɛ na lè, a Isirayɛli ye ní i koro kpéʔele. A Yawe fànʔa kaan Mowabi fànʔafɔw Egulɔn ma Isirayɛli ye kánmi na, níì cán pe maa níì kàri ni gi kpéʔele gee gi pee Yawe nyɛ́nɛ na lè.

¹³ A Egulɔn Amɔn ye ní Amalɛki ye yeri n fàra wiyɛɛ na n kári n sáà Isirayɛli ye jáa, níì Sɛʔɛtiiri kàʔa nɛnɛ n syɔɔ be ma.

¹⁴ A Isirayɛli ye pye pulobèlē Mowabi fànʔafɔw Egulɔn ma n baa taa yɛ̀ʔɛlɛ kɛɛ ní kɔrɔtaanri.

¹⁵ A Isirayɛli ye i yákpogèle wáa Yawe kurugo. A Yawe syɔɔfɔlɔ kaan be ma. Woro wi nyɛ Gera jáaw Ehudi. Bɛnzyamɛ wówaa wi pye, wi maa pye kàmɔnnaɔn. Isirayɛli ye maa wi tun ní kpɔʔɔrɔ ní wi sa kaan Mowabi fànʔafɔw Egulɔn ma.

¹⁶ A Ehudi nyɔɔyɔ siin ŋɔsée sámaga n yaʔa wiyɛɛ ma. Wi tɔnɔganmi maa pye mɛtiri tíla félege. A wi wi pwɔɔ n cáan wi kàliige cesiinyungi na, wi búroyi láara ni.

¹⁷ A wi sáà kpɔ́ʔɔri kaan Mowabi fànʔafɔw Egulɔn ma. Egulɔn si maa tɔ̀nɔ n pye nàngbɔɔ-kpèlege.

¹⁸ Lǎli ni wi kwɔ́ɔ kpɔ́ʔɔri kaanna na lè, bele pe da di tugo n pan lè, a wi poro lúrugo n tórigo.

¹⁹ A wi tiimaw yìri yaà kàdɛnɛzunyi ma yi nyɛ lè Giiligali taana n lúru n pan n baa jo: «Ee fànʔafɔw, tundunlarada i nyɛ mii ma mɔ wóro.» A fànʔafɔw jo: «Ye pyèri!» Bele myɛ be pye wi taana lè, a poro yiri.

²⁰ A Ehudi nùuni wi na, wi si maa pye wodɛ́ɛɔn ní wi nibin kpaataʔa-tɔ́nɔgi ni yaà ǹjoʔo ma wi kpaafunnyingi ni. A Ehudi jo: «Kolocɔlɔɔ syɛ́ɛnrɛ i nyɛ mii ma mɔ wóro.» A Egulɔn yìri wi kǒli na n yére.

²¹ A Ehudi fala n kàmɔnɔ kɔ́gi tɛ́ʔɛ n ŋɔséew kíle n kɔ́n, wee wi da pwɔɔ n cáan lè wi kàliige cesiinyungi na n wi le wi ma fícarigi ni.

²² A ŋɔpiigi jée ní kpàkpeli myɛ ní, a sǐnmi yiri n ŋɔpiigi tɔ́n, níì cán wi da níì ŋɔséew yirige fícarigi ni í, woro wee fínaana li da màʔa n yiri kàdoʔo ma lè.

²³ A Ehudi kpaataʔa-tɔ́nɔgi kɔ̀riyɔ sɔ̀ʔɔ n wáa wi na, níì sɔ̀lɔ n yiri tinbadɔʔɔli ni.

²⁴ Lǎli ni wi yiri n kári lè, a fànʔafɔw falipyebèlē pan n baa gi kɔ̀rɔsíi n gi nyaa kpaataʔa-tɔ́nɔgi kɔ̀riyɔ i nyɛ wozɔʔɔyɔ ní. A be jo: «A wi tɔ̀nɔ́ wɛ̀ɛ́ yaà wii kpaafunnyingi ni.»

²⁵ A be sige n mɔn àmɛɛ si gi nyɛ lè wi ga kpaataʔa-tɔ́nɔgi kɔ̀riyɔ múgu í, a be kɔ̀rikáanni láa n yi múgu, a be wéle n be kàfɔw nyaa tári na woguuo ní.

²⁶ N be yaʔa sigeli na, a Ehudi téè fàn n kári. Wi maa sɔ̀lɔ kàdɛnɛzunyi na n kári fwɔɔ n sáà nan Seyira na.

²⁷ Wi tɛ́nɛ̀ nan yaà lè a wi tòmaagi wìi Efirayimi nyanbeleyi kúlo ni. A Isirayɛli ye pínɛ n tìgi ní wi ní nyanbelegi na, á wi kíni pe yɛ́ɛgi na.

²⁸ A wi be pye: «Ye taʔa mii na, níì cán Yawe n yele nigoobèle le yele kɔ́yi ni, be lè Mowabi ye.» A be tìgi n taʔa wi na, a be sáà Zyuridɛnw tɛɛjeliye syɔɔ n taa Mowabi kàbangi na. Pe ga syɔɔn faala yaʔa wi jeli í.

²⁹ Lǎli bee ni a be kpóo Mowabi ye ni, nànbēle selebingéle kagunɔ félege. Pe myɛ n pye nàngboloyo ní sànbalibéle. Pe wàa nibin ga fàn n syɔɔ í.

³⁰ Cángi bee na Mowabi ye kùru n kaan Isirayɛli ye ma. A tári pye yɛɛ̀nyinge na yɛ̀ʔɛlɛ togoye sicɛrɛ fúngo ni.

Syamigari kéeli

³¹ A Anati jáaw Syamigari ní baa yìri Ehudi kàdoʔo ma, a woro Filisitini nǎnbèle pèle saala taanri kpóo ní nìnaʔakpèele ní. A woro wɔ́ɔ̀ Isirayɛli ye syɔɔ.