Jàbɔbèle 21 - Cebaara Bible 2010

Bɛnzyamɛ syɛɛnfelegi lúruzelile

¹ Isirayɛli nǎnbèle si maa kàli Misipa ni níì jo: «Wolo wàa faala a wi pyà kaan Bɛnzyamɛ wóo ma wi cɔɔ̀ í.»

² A syɛ́ɛnmi pan Betɛli ma n baa tɛ́ɛn Kolocɔlɔɔ yɛ́ʔɛ ma fwɔɔ n baa nan cângwɔɔgi nyɔ́ɔ na. Pe maa ni nyaan gbanʔama ni yákpogèle wáa,

³ ní i gi nyuu níì jo: «Ee Yawe, Isirayɛli ye Kolocɔlɔw, nyàʔá na gi yɛlɛ Isirayɛli syɛɛnfelegaa í fɔ̀n Isirayɛli ni níjanʔa?»

⁴ Koro nyǐndaligi na a syɛ́ɛnbèle sɔ̀li n yìri n sáriga-wòlo-yafanʔa faan yaà, níì sáriga-sórigoo, ní pínɛnyɛnnɛgɛ sáriga wòlo.

⁵ Koro kàdoʔo ma a Isirayɛli ye jo: «Isirayɛli syɛɛnfeleyi myɛ ni, a wàa i yaà lé wee wi lè wi ga pan n baa kpóʔoro Yawe yɛ́ʔɛ ma í?» Níì cán pe maa kàli níì jo syɔɔn o syɔɔn wi ga kòro lè sìnban ni kpóʔoroli ma Misipa ma, pe a wee bee kpóo.

⁶ A Bɛnzyamɛ ye kéeli pye Isirayɛli ye na nyinimɛ pe lè poro senyɛnbèle, a pe i gi nyuu níì jo: «Syɛɛnfelegaa gi kwɔ́ɔ n yiri nya níjanʔa Isirayɛli ni.

⁷ Bele be kòro sìi na lè, kanmìí na wolo a gi pye si càbala taa kaan be ma, níì cán wolo n kàli Yawe na níì jo wolo wàa a wi pyà kaan pe wàa ma wi cɔɔ̀ í?»

⁸ A be jo: «Isirayɛli syɛɛnfeleyi myɛ ni, a wàa i yaà lé wee wi lè wi ga lúgu n pan Yawe ma Misipa ma í?» A be gi nyaa syɔɔn faala da yìri yaà Yabɛsyi ma, Galaadi tári ni n pan tɛɛkòrogi ma kpóʔoroli ma í.

⁹ A be syɛ́ɛnmi córo n gi nyaa Yabɛsyi wi lè Galaadi ni, ki syɔɔnwaa faala ga pye yaà í.

¹⁰ A syɛ́ɛnmi fala n nànbēle selebingéle kɔrɔni yirige n tórigo yaà, bele be pye lè sànbalibéle n sɔ̀lɔ, níì gee naa joo n gbàn be ma níì jo: «Yaa syée ye sa ŋɔséew tɛ́ʔɛ ye Yabɛsyi syɛ́ɛnbèle kpóo Galaadi ni, n cébèle pínɛ pìíbèle ni.

¹¹ Gee yele a kpéʔele lè, koro gi nyɛ gee naa: Ki n yɛlɛ ye sa nǎnbèle myɛ kpóo péw n fàra cɔlɔɔ o cɔlɔɔ na wi sínɛ n kwɔ́ɔ ní nàɔn ní lè.»

¹² A be sáà nàngeele sinján pìcaala saala siin nyaa yaà Yabɛsyi ni, Galaadi tári ni, bele be lè pe da kɔ́ɔ̀ sínɛ ní nàɔn ní n nàngeele cán í. A be pan ní be ní tɛɛ̀tɛ́ɛngi ma Silo ma, Kanaan tári ni.

¹³ A syɛɛnkpoʔolomi myɛ tundunbéle tun pe sa joo ní Bɛnzyamɛ yòdaʔayi ní yi sáà kòro Irimɔn fálagi ma lè, pe bɛ̀ɛlɛ kéele joo yi ma.

¹⁴ Lǎli bee ni a Bɛnzyamɛ ye lúru n pan, a pe baa cébèle kaan be ma, poro bele pe da yaʔa lè sìi na Yabɛsyi cébèle ni, wi lè Galaadi ni. Kàjáa pe ga gbàn n be foro í.

¹⁵ A Bɛnzyamɛ ye kéeli pye Isirayɛli ye na nyinimɛ níì cán Yawe n weʔe kúun Isirayɛli syɛɛnfeleyi na.

¹⁶ A syɛ́ɛnmi wólɛɛbéle jo: «Bele be kòro sìi na lè kanmìí na wolo a gi pye pé càbala taa, níì cán Bɛnzyamɛ ye cébèle n kwɔ́ɔ n láʔa yaà?»

¹⁷ A be jo: «Bɛnzyamɛ wóbèle be kòro lè, pe kɔ́rigi n yɛlɛ gi kòro be ma, koro ga pye syɛɛnfelegaa a kɔ́ kwɔ́ɔ láʔa yaà Isirayɛli ni í.

¹⁸ Kàjáa wolo a gbǎn wolo pìíbèle kaan be ma be càbala í. Níì cán wolo Isirayɛli ye n kàli níì jo: ‹Wee wi ga cɔlɔɔ kaan Bɛnzyamɛ ye wóo ma lè, wee bee n yɛlɛ wi dánga.› »

¹⁹ A be jo: «Wéle, Yawe fɛ́tiiw i kpéʔele yɛɛlɛ o yɛɛlɛ Silo ma wi lè Betɛli solomɔkulo ma. Kólogi gi yìri Betɛli ma ni syée Sisyɛmi ma lè, wi i nyɛ gee bee canʔafolomɔ ma, Lebona wòrogulo ma.»

²⁰ A be gee naa joo n gbàn Bɛnzyamɛ yòdaʔayi ma níì jo: «Yaa syée ye sa làra yaa sige ɛrɛzɛn kɔliyi ni,

²¹ yáā wéle, lǎli ni Silo pìcaabèle ga yiri ni be kàcɔɔw yɔ́ɔlɔ yóo lè, ye yiri ɛrɛzɛn kɔliyi ni, ye myɛ nibin nibin í pìcaala nibin nibin cò Silo pìcaabèle ni be pye yele càbala, yáā syée ní be ní Bɛnzyamɛ tári ma.

²² Pe tóobèle wàlá be senyɛnbèle ga pan n ba ni fúlo wolo taana, wolo a be pye: ‹Ye nyɔɔ wolo na be kéeli na, níì cán wolo ga càbala taa n cò kapɛɛnni ni a be pe myɛ nibin nibin foro í. Yele si ban ye wɔ́ɔ̀ be kaan be ma í, ki ga maa pye nya, yele a dée kolo.› »

²³ A Bɛnzyamɛ yòdaʔayi gi kpéʔele kánmi bee na. A be càbala cò jò n yɛlɛ ní peyɛɛ nyɔ́ɔgi ní pìcaabèle ni pe da ni yóo lè. A be lúru n kári ní be ní n sáà tɛ́ɛn be kɔ́riyi na, ní níì kěyi faan n tɛ́ɛn yi ni.

²⁴ Lǎli bee wonijanna ni a Isirayɛli ye myɛ nibin nibin yìri nɛɛ bee n kári be syɛɛnfeleyi, ní be túluyi wòolo ma. A pe myɛ nibin nibin yiri nɛɛ bee n kári be kɔ́rigi tɛ́ɛyɛ ma.

²⁵ Lǎli bee ni fànʔafɔlɔ da pye Isirayɛli ni í. Pe myɛ nibin nibin maa ni gi kpéʔele, gee ki ga yɛlɛ wee ma lè.