Jàbɔbèle 20 - Cebaara Bible 2010

Kapɛɛnni kpúmɔnnɔ ní Bɛnzyamɛ ye ní

¹ A Isirayɛli ye myɛw peyɛɛ gbóʔoro n pye àmɛɛ nàɔn nibin nyɛ lè Yawe yɛ́ʔɛ ma Misipa ni. Pe maa yìri yaà n séli Dan na fwɔɔ n sáà nan Bɛɛri-Syeba na n fàra Galaadi tári na.

² Syɛ́ɛnmi myɛ kùndigibéle maa pye yaà, gee bee n jo Isirayɛli syɛɛnfeleyi myɛ maa pye yaà Kolocɔlɔɔ syɛ́ɛnmi kpóʔorolo ma. Pe n pye nànbēle tɔlɔyɔ fɔɔlɔ sirakamayɛ toko, poro bele be pye lè ŋɔséebéle fɔɔlɔ.

³ A Bɛnzyamɛ yòdaʔayi gi lóʔo Isirayɛli ye n lúgu n kári Misipa ma. A Isirayɛli ye jo: «Ye gi joo wo lóʔo, kanmìí na kapeegi bee kpéʔele n sɛ́ɛ?»

⁴ Levii ye nǎnwee cɔ́ɔ be kpóo lè, a woro syɛ́ɛnri láa n gi joo níì jo: «Mii ní mii cefàra-mí-láaw maa sáà nan Gibeya na ki lè Bɛnzyamɛ wógi, a wolo tìrige bi syɔ́ɔn beè.

⁵ A Gibeya ye si yìri mii kurugo n baa kpáagi màʔa mii na yébiligi ni, beè mii pye lè. Mii pe da ni caa bi kpóo. A be si baa mii céw caa fànʔa na n kpóo.

⁶ A mii si mii céw kútɔɔ cò n cɛnɛ cɛnɛ n tórigo Isirayɛli kɔ́rigi tásaliga tɛ́ɛyɛ myɛ ni. Níì cán pe n nɔ́nʔɔrɔ ní fɛ̀ɛrɛ kéele kpéʔele Isirayɛli ni.

⁷ Yele myɛ si ye nyɛ bele, Isirayɛli ye, ye yeyɛɛ yíbe, yé yarigaa joo ye ceri nɛɛ naa.»

⁸ A syɛ́ɛnmi myɛ pínɛ n yìri n pye àmɛɛ nàɔn nibin nyɛ lè níì jo: «Wolo wàa faala a kári wi tɛʔɛ ma í, syɔɔn faala a sa jée wi kpaʔa ni í.

⁹ Tɔ́ɔliw ni gee wolo a kpéʔele Gibeya ye na lè, koro gi nyɛ gee naa, wolo a gɔ̌nw wáa

¹⁰ bi nànbēle kɛɛ-gɛɛ wòlo dabata-daw ni, si dabata-da wòlo saala kagunɔ kagunɔw ni, si saala kagunɔ kagunɔ wòlo selebingèle kagunɔ kagunɔ ni Isirayɛli syɛɛnfeleyi myɛ ni. Pe a kári sa yaliire caa syɛ́ɛnmi kéele na, koro ga pye pe ga lúru n pan, Gibeya wi lè Bɛnzyamɛ wów, wo sa wi syɛ́ɛnbèle cò bi yɛlɛ ní fɛ̀ɛ́ri kéele ní be kpéʔele Isirayɛli ni lè.»

¹¹ Kánmi bee na Isirayɛli nǎnbèle myɛ peyɛɛ gbóʔoro kěgi kánma na, níì pínɛ n pye àmɛɛ nàɔn nibin nyɛ lè.

¹² A Isirayɛli syɛɛnfeleyi si nǎnbèle pèle tórigo Bɛnzyamɛ túlugi wòolo myɛ ma pe sa be pye: «Nyàʔá gi nyɛ kapeegi naa kpéʔelele nyúngo yele níngi ni?

¹³ Tɔ́ɔliw ni, nifaʔayi yi nyɛ Gibeya ni lè, ye yi le wolo kɔ́yi ni wolo í yi kpóo, jàngó bi kapeegi kwɔ́ɔ bi yirige Isirayɛli ye níngi ni.» Kàjáa Bɛnzyamɛ ye ga fɔ̀lɔ n be senyɛnbèle Isirayɛli ye jóomi lóʔo í.

¹⁴ A Bɛnzyamɛ yòdaʔayi yiri be kěyi ni n kpóʔoro Gibeya ma bi sa kapɛɛnni kpúmɔn ní Isirayɛli wóbèle bele ní.

¹⁵ Bɛnzyamɛ yòdaʔayi be córo lè cángi bee, poro bele be yiri be kěyi ni n pan lè, pe n pye nànbēle sirakama ní selebingéle taanri, poro bele be pye lè ŋɔséebéle fɔɔlɔ. Gibeya nǎnbèle saala taanri ní dabata pe da pye lè jàbɔɔlɔ, poro da córo bele ni í.

¹⁶ Kàmɔnnanbéle saala taanri ní dabata n pye syɛ́ɛnmi bee myɛ ni, bele be lè jàbɔɔlɔ. Bele bee myɛ nibin nibin maa kàvɔrɔyi wáama cán, àlí bi gbǎn ǹjookanna tímana bi li wáa taa.

¹⁷ A be wɔ́ɔ̀ Isirayɛli nǎnbèle córo, Bɛnzyamɛ wóbèle si ga córo yaà í, a poro pye ŋɔséebéle fɔɔlɔ sirakamayɛ toko, pe myɛ n pye kapɛɛnkpumɔnbéle.

¹⁸ A Isirayɛli ye yìri n lúgu n kári Betɛli ma n sáà Kolocɔlɔɔ yíbe níì jo: «Wìí wi yɛlɛ wi séli kári wolo ni bi sa kapɛɛnni kpúmɔn ní Bɛnzyamɛ ye ní?» A Yawe be yari: «Zyuda wi a pye Wozeliw.»

¹⁹ A Isirayɛli ye sɔ̀li n yìri n sáà tɛ́ɛn Gibeya taana.

²⁰ A Isirayɛli nǎnbèle yìri bi kapɛɛnni kpúmɔn ní Bɛnzyamɛ ye ní. A be peyɛɛ zámaga kapɛɛnni kánma na Gibeya taana.

²¹ A Bɛnzyamɛ yòdaʔayi yiri Gibeya ni n baa Isirayɛli nànbēle sirakama ní selebinnɛ kpóo n cáan tári na cángi bee.

²² Syɛ́ɛnbèle be lè Isirayɛli nǎnbèle, a poro níì lòmaana le, níì peyɛɛ zámaga bi kapɛɛnni kpúmɔn tɛ́ɛgi ni, gee ni pe da sélì li kpúmɔn lè cânzeligi.

²³ A Isirayɛli ye lúgu n kári n sa ni nyaan Yawe yɛ́ʔɛ ma fwɔɔ n baa nan cângwɔɔgi nyɔ́ɔ na. A be Yawe yíbe níì jo: «A gi yɛlɛ lé wolo í ní kári sa too wolo senyɛnbèle na pe lè Bɛnzyamɛ yòdaʔayi?» A Yawe be yari: «Yaa syée be kurugo.»

²⁴ A Isirayɛli ye kári Bɛnzyamɛ yòdaʔayi kurugo canziin wógi na.

²⁵ A Bɛnzyamɛ ye yiri Gibeya ni canziin wógi bee na ni Isirayɛli ye fàrá ní sáà nànbēle selebingéle kpanjɛrɛ kpóo n cáan tári na. Pe myɛ n pye ŋɔséebéle fɔɔlɔ.

²⁶ A Isirayɛli syɛ́ɛnmi myɛ lúgu n kári Betɛli ma n sa ni nyaan, níì tɛ́ɛn Yawe yɛ́ʔɛ ma yaà. Pe maa súnw le cángi bee fwɔɔ n baa nan cângwɔɔgi nyɔ́ɔ na. A be sáriga-sórigoo ní pínɛnyɛnnɛgɛ sáriga wòlo Yawe yɛ́ʔɛ ma.

²⁷ A Isirayɛli ye Yawe yíbe, níì cán beè Kolocɔlɔɔ joogaanni kásu da pye cángi bee na.

²⁸ Aarɔn jáaw wi lè Eleyazari, woro jáaw Fineyasi wi da ni yèré wi yɛʔɛ̀ ma lǎli bee ni. A be jo: «A gi yɛlɛ lé wolo í ní kári sa kapɛɛnni kpúmɔn ní Bɛnzyamɛ yòdaʔayi ní, pe lè wolo senyɛnbèle, wàlá wolo í lúru?» A Yawe be yari: «Ye lúgu yaa syée, níì cán nyɛ̀ʔɛna mii a be le yele kɔ́yi ni.»

²⁹ A Isirayɛli ye pèle làriga n Gibeya màʔa.

³⁰ A Isirayɛli ye lúgu n kári Bɛnzyamɛ yòdaʔayi kánma na candaanri wógi na, ní sáà peyɛɛ zámaga Gibeya yɛ́ʔɛ ma àmɛɛ ki da pye tɔ́lɔyee na lè bi kapɛɛnni kpúmɔn.

³¹ A Bɛnzyamɛ yòdaʔayi yiri ni Isirayɛli syɛ́ɛnbèle fàrá. A Isirayɛli ye be lɛ́ɛlɛ n léeli kěgi na. Pe maa séli ni Isirayɛli wóbèle pèle kúu ni cáan kóloyi na yi syée Betɛli ní Gibeya ma lè sìnbirigi fúngo ni. A be Isirayɛli nǎnbèle pèle toko ní kpɔrigɔ félege kpóo.

³² A Bɛnzyamɛ yòdaʔayi i gi nyuu níì jo: «Wolo n be jáa bele àmɛɛ ki da sélì pye lè.» Kàjáa Isirayɛli ye maa ni gi nyuu níì jo: «Ye tíi waa fé ní be ní kóloyi ni bi be lɛ́ɛlɛ léeli kěgi na.»

³³ A Isirayɛli nǎnbèle myɛ fala n sáà peyɛɛ zámaga Baali-Tamari ma. Isirayɛli wóbèle bele pe da pye wolarabéle ní lè, a poro tìn n yiri be tɛɛlaragi ni Geba tɛɛfiigi kàbaan na.

³⁴ Nǎnbèle selebingéle kagunɔ pe da nyɛ́nɛ n wòlo Isirayɛli ye myɛw ni lè, a poro baa nan Gibeya zǐnmi na. A kapɛɛnni tɔ̀nɔ n gbàn. Bɛnzyamɛ ye si da gi cán ncan kapeʔe gi poro le í.

³⁵ A Yawe Bɛnzyamɛ ye jáa n kaan Isirayɛli ye ma. A Isirayɛli ye Bɛnzyamɛ nànbēle sirakama ní selebingéle siin ní saala kagunɔ ní dabata kpóo n cáan cángi bee. Pe myɛ n pye ŋɔséebéle fɔɔlɔ.

³⁶ A Bɛnzyamɛ yòdaʔayi gi nyaa pe n poro jáa. Isirayɛli nǎnbèle maa tɛɛgaa yaʔa Bɛnzyamɛ ye ma, níì cán pe maa be sɔ̀ngumi taʔa bele na poro da làriga Gibeya kánmi na lè.

³⁷ Syɛ́ɛnbèle pe da làra ni sige lè, a poro yiri kelekele n tìn n tɔ́n Gibeya na n ŋɔséew tɛ́ʔɛ n kěgi myɛ jáa.

³⁸ Bele pe da làra ni sige lè, pe ni Isirayɛli nǎnbèle bele maa bɛ̀ɛ fɛ̀ɛwaa na níì jo poro a ba wírinɛʔɛgɛ pye kaa yìrigí kěgi ni.

³⁹ Isirayɛli nǎnbèle maa ni lúrugu kàdoʔo ma kapɛɛnni làla ni, a Bɛnzyamɛ syɛ́ɛnbèle fala n séli ni be kpúmɔn ni kúu fwɔɔ n toko ní kpɔrigɔ félege kpóo be ni. A be jo: «Wolo wo níì be jáa bele àmɛɛ ki da pye lè kapɛɛnselili na.»

⁴⁰ Kàjáa lǎli ni kěgi sógulo wírige séli ni yìrigí lè n pye wíritɔnɔgɔ, a Bɛnzyamɛ ye kàri n wéle peyɛɛ kàdoʔo ma n kěgi myɛ nyaa ki i nyín ni lúru ǹjogi ni.

⁴¹ A Isirayɛli nǎnbèle lúru ni Bɛnzyamɛ wóbèle fàrá. A Bɛnzyamɛ wóbèle fyáa gbanʔama, níì cán pe maa náà kapeegi nyaa, gee gi poro le lè.

⁴² A be kàdoʔo kaan Isirayɛli nǎnbèle ma ni fé ni syée fìími tára kabaan na. Kàjáa kapɛɛnni ga be yaʔa í, ncan bele pe da yìri kěyi ma lè poro maa ni be kúu, níì cán pe maa be le nínge.

⁴³ Pe maa Bɛnzyamɛ ye le nínge, ní i be nɛnɛ ni máari, ní i be tɔ́nʔɔnɔ làriŋɔndaali ni fwɔɔ n sáà nan Gibeya zǐnmi na canʔafolomɔ kabangi na.

⁴⁴ Bɛnzyamɛ nànbēle selebingéle kpanjɛrɛ be kùu, pe myɛ n pye sànbalibéle.

⁴⁵ Bele pe da kàdoʔo kaan ni fé ni syée fìími tára kabaan na lè, ni syée Irimɔn fálagi ma lè, a be nànbēle selebingéle siin ní saala kagunɔ kpóo be ni kóloyi na, níì taʔa wozanbèle na ni nɛnɛ fwɔɔ n sáà nan Gideyɔmi na, n selebinnɛ kpóo be ni.

⁴⁶ Bɛnzyamɛ ye be kùu lè cángi bee, pe myɛ bìnɛw n pye nànbēle sirakama ní selebingéle siin ní saala kagunɔ. Pe n pye ŋɔséebéle fɔɔlɔ, pe myɛ si i nyɛ sànbalibéle.

⁴⁷ Nǎnbèle pe da kàdoʔo kaan ni fé ni syée fìími tára kabaan na lè, a poro pèle saala taanri fàn n sáà nan Irimɔn fálagi na. A be tɛ́ɛn yaà beè n taa yeye sicɛrɛ.

⁴⁸ A Isirayɛli nǎnbèle lúru n pan Bɛnzyamɛ yòdaʔayi kurugo n ba ni be kúu ní ŋɔséew ní, n séli kěyi syɛ̀ɛnnɛ na n sáà nan yaweeri na. Gee bee n jo yala o yala be nyaa lè. A be wɔ́ɔ̀ naà le kěyi myɛ na be nyaa lè.