Jàbɔbèle 19 - Cebaara Bible 2010

Bɛnzyamɛ ye be lè Gibeya ni, poro kapeeli kéele

¹ Lǎli bee ni fànʔafɔlɔ da pye Isirayɛli ni í. Levii ye wówaa si maa pye Efirayimi nyanbeleyi kúlo láʔala ma yaà. Wi maa cɔlɔɔ láa cefàra-mí-láaɔ Bɛtilehɛmi ni, Zyuda tári ni.

² A wi céw si kɔ́ɔ̀ wi jànváa níì núngo wi taana n kári wi tóow kpaʔa ma n sáà kòro yaà Bɛtilehɛmi ni, Zyuda tári ni n taa yeboyo sicɛrɛ.

³ A wi nǎnw yìri n kári wi kurugo bi sa joo ní wi ní jàngó wi lúru pan. Wi falipyew si maa pye ní wi ní n fàra jòfanibēle siin na. A céw sáà wi tìrige n lége wi tóow kpaʔa ni. Lǎli ni cepiiw tóo wi nyaa lè, a wi wi fàra ní fundaanra ní.

⁴ A cepiiw tóo tan wi pìíw nàɔn na n yaʔa yaà ní wiyɛɛ ní, a wi kwɔ́ɔ canya taanri. A pe i líi, ní i gbo, ní i syɔ̀ɔ́n yaà.

⁵ Can-sicɛrɛ wógi na, pe sɔ̀li n yìri lè nyǐngi nyɔ́ɔ na, a Levii ye wów jo woro a kári. Kàjáa a cepiiw tóo wi pìíw nàɔn pye: «Yaliire cɛɛri lìi mi fànʔa taa gbɛnʔɛnɛ, koro kàdoʔo ma yele a náa ra syée.»

⁶ A be siinw tɛ́ɛn n pínɛ n lìi níì gbaa. Koro kàdoʔo ma a cepiiw tóo céw nàɔn pye: «Fɔ̀lɔ mi syɔ́ɔn naa, mí fundaanra pye.»

⁷ A céw nàɔn yìri bàā syée, a wi céw tóo si wi nyɛ́ɛri n wári wi na, a wi níì yébiligi bee syɔ́ɔn yaà.

⁸ Canya kagunɔ wógi na, a wi sɔ̀li n yìri nyǐngi nyɔ́ɔ na bàā syée. Lǎli bee ni a cepiiw tóo jo: «Mii i mɔ nyɛ́ɛri yére mi lìi, yé sige cángi í nyíngi.» A be siinw pínɛ n lìi.

⁹ A nǎnw yìri bàā syée ní wi céw, ní wi falipyew ní, a cepiiw tóo wi pìíw nàɔn pye: «Cángi gi syée sa too gee, ki n kwɔ́ɔ n kwɔ́ɔ. Koro na ye syɔ́ɔn, cángi n tìgi n kwɔ́ɔ, ye syɔ́ɔn naa, mí ní fundaanra pye. Nyɛ̀ʔɛna yele a sɔ̀li yìri nyǐngi nyɔ́ɔ na bi kólogi láa bàā syée, mɔ a kári sa pye mɔ kpáagi ni.»

¹⁰ Kàjáa nǎnw ga fɔ̀lɔ bi syɔ́ɔn í. A wi yìri ni syée, ní sáà nan Yebusi zǐnmi na, ki lè Zyerusalɛmi, woro ní wi céw ní, n fàra jòfanibèle siin na, bele na yatɛ́ɛngéle pye lè.

¹¹ Lǎli ni be nùuni Yebusi na lè, cángi maa tìgi gbanʔama. A falipyew wi kàfɔw pye: «Tíi wo wàli wo sa jée wo syɔ́ɔn Yebusi ye kěgi yaa ni.»

¹² A wi kàfɔw wi yari: «Wolo a wàli bi kári syɛɛnfeleyaa kàʔa ma í kapye yi o nyɛ Isirayɛli ye wòolo í. Wo taʔa wo fala Gibeya ma.»

¹³ A wi níì wi falipyew pye: «Waa syée wo sa nan tɛ́ɛyi yaa kàa na yi lè Gibeya wàlá Arama, wo sa syɔ́ɔn gi kàa ni.»

¹⁴ A be taʔa n fala tánʔani na. Lǎli ni be sáà nùuni Gibeya na lè, ki lè Bɛnzyamɛ wógi, a cángi too.

¹⁵ A be wàli n fala yaà beè bi sa syɔ́ɔn Gibeya ni. A wi jée n sáà tɛ́ɛn kěgi kadàlaga na. Syɔɔn faala da taa bi be lége wi kpaʔa ni be syɔ́ɔn yaà í.

¹⁶ Wéle, a nànlɛɛwaa si kɔ́ɔ̀ yìri seʔe ma tɛɛ̀baaraga ni n pan cângwɔɔgi nyɔ́ɔ na. Nǎnw bee maa pye Efirayimi nyanbeleyi kúlo wówaa. Wi si maa baa tɛ́ɛn Gibeya ni bi gi taa tɛ́ɛgi bee syɛ̀ɛnnɛ maa pye Bɛnzyamɛ ye.

¹⁷ A wi yɛ́ɛgi yìrige n wéle n kùsɛɛw nyaa kěgi kadàlaga na. A nànlɛɛw wi pye: «Sán mɔ syée, níì yìri sán?»

¹⁸ A wi wi yari: «Wolo n yìri Bɛtilehɛmi ma Zyuda tári ni ni syée Efirayimi nyanbeleyi kúlo láʔala ma yaà. Beè mii da yìri n kári Bɛtilehɛmi ma Zyuda tári ni, a mii si lúru ni syée wii Yawe kpaʔa ma. Syɔɔn faala si ga baa taa bi mii lége wi kpaʔa ni í.

¹⁹ Bi gi taa nyàági ní sǐgi i naa wolo ma wolo jòfanibèle kéele na, a yaliire ní dùvɛɛn wɔ́ɔ i nyɛ mii ní mɔ falipyecew ma n fàra nìgɔcariw na wi nyɛ ní mɔ falipyebèle ní pe lè wolo. Yarigaa faala ga wolo fɔ̀n í.»

²⁰ A nànlɛɛw jo: «Fo tánʔama na. Mɔ mako ga pye yárigee faala na lè, mii a gi kaan mɔ ma. Mɔ a kɔ́ syɔ́ɔn kadàlagi na í.»

²¹ A wi be lége wi kpáagi ni níì sìge kaan jòfanibèle ma. A kùsɛɛbèle tɔ́lɔyi jée, níì lìi níì gbaa.

²² N be yaʔa fundaanri na, a kěgi nànvaʔayaa pan n baa kpáagi màʔa, níì kòro ni kɔ̀rigi kpúmɔn, ní i gi nyuu nànlɛɛw ma wi lè kpáagi fɔ́lɔ, níì jo: «Nǎnwee wi baa tìrige mɔ na lè, wi yirige naa koro ga pye wolo í ba sínɛ ní wi ní.»

²³ A kpáagi fɔ́lɔ yiri n baa be pye: «Eʔe, ni senyɛ̀nnɛ, mii i yele nyɛ́ɛri yele a kɔ́ kapeʔe pye í. Amɛɛ nǎnw naa baa jée mii kpáagi ni lè yele a kɔ́ fɛ̀ɛrɛ kéeli naa kpéʔele í.

²⁴ Wéle, mii pìíw wi lè wi ga kɔ́ɔ̀ nàngeele cán í, n fàra nǎnw naa cefàra-mí-láaɔ na, mii a poro yirige naa, ye too poro na, gee ga yele dɛ́nɛ lè ye koro kpéʔele be na. Kàjáa yele a tɔ́ɔ kɔ́ fɛ̀ɛrɛ kéeli naa kpéʔele nǎnw naa na í.»

²⁵ Kàjáa nǎnbèle bee ga fɔ̀lɔ bi lóʔo wi ma í. A Levii ye nǎnw fala n wi céw cò n yirige kàfugi na be ma. A be sínɛ ní wi ní n wi fɔ̀rɔ fwɔɔ n baa nyǐngi tali. A ki ga pye nyǐnjerigi na, a be wi yaʔa.

²⁶ A ki ga pye nyǐnwirimi na, a céw pan n baa too nǎnw kpaaweele na, wee kpaʔa ni wi nǎnw pye lè n kòro yaà fwɔɔ n taa a nyǐngi baa tali.

²⁷ A ki ga pye nyǐngi nyɔ́ɔ na a wi nǎnw yìri n kɔ̀rigi múgu si taʔa fala wi tánʔani na, a wi wi céw nyaa wodoo-zínɛɔ ní kpaaweeli na, wi kɔ́yi si i nyɛ wodaʔaya ní tɛɛ̀jeeli na.

²⁸ A wi wi pye: «Yìri wo kári.» Kàjáa syɛɛnlurugoro ga taa í. Lǎli bee ni a nǎnw wi láa n taʔa wi jòfaniw na n kári wi kàʔa ma.

²⁹ A wi sáà jée wi kpáagi ni, níì ŋɔ́ni láa n wi céw kútɔɔ yasɛɛyɛ cɛnɛ tɛɛyɛ kɛɛ ní siin n tórigo Isirayɛli tásaligi tɛ́ɛyɛ myɛ ni.

³⁰ Bele myɛ be gi nyaa lè, a be i gi nyuu níì jo: «Gee naa kàa félege ga kɔ́ɔ̀ kpéʔele í, ki felege ga caa wɔ́ɔ kɔ́ɔ̀ nyaa í, nlaa Isirayɛli ye yiri Ezyipiti tári ni lè fwɔɔ n baa nan níjanʔa na. Ki n yɛlɛ ye kéeli naa sɛʔɛ ye wéle, yé yeyɛɛ yíbe, ye yarigaa joo ye ceri.»