Jàbɔbèle 18 - Cebaara Bible 2010

Dan ye i tásaligaa caa bi tɛ́ɛn

¹ Lǎli bee ni fànʔafɔlɔ da pye Isirayɛli ni í. Lǎli bee ni Dan syɛɛnfelegi wòolo da ni nyaari ni kɔrigɔ caa bi tɛ́ɛn. Níì cán nlaa n baa nan lǎli bee na, poro pe da pye Isirayɛli syɛɛnfeleyi ni pe da kɔ́ɔ̀ tɛɛ̀tɛ́ɛn-dèlege taa pe kɔrigɔ bi tɛ́ɛn í.

² A Dan yòdaʔayi nànbēle kagunɔ nyɛ́nɛ n wòlo sànbalibéle pe túluyi ni, peyɛɛ níngi ni n tun, níì be pye: «Ye sa tári saanri ye wéle, yé di sámaga ye kɔ̀rɔsíi.» Pe maa pye Soreya ye ní Ɛsyitawɔli ye wòolo. A be kári n sáà nan Efirayimi nyanbeleyi kúlo na fwɔɔ n sáà nan Mika kpáagi na, níì syɔ́ɔn beè.

³ N be yaʔa Mika kpáagi taana, a be Levii ye nìgɔcariw yákpolo lóʔo, a be li cán. A be kolo n fala yaà n sáà wi pye: «Wìí wi pan nɛɛ naa ní mɔ ní? Nyàʔá mɔ kpéʔele tɛ́ɛgi naa ni? Nyàʔá gi nyɛ mɔ ma nɛɛ naa?»

⁴ A wi be yari: «Mika n gee ní gee kpéʔele mii ma. Wi i mii sàrá, mii si i nyɛ wi sáriga-wòlow.»

⁵ A be wi pye: «Kolocɔlɔɔ yíbe koro ga pye tánʔani na wolo nyɛ lè wolo í gi cán kapye li a sa tɛ́nɛ.»

⁶ A sáriga-wòlow be yari: «Yaa syée yɛɛ̀nyinge na. Yawe i nyɛ ní yele ní tánʔani na yele a kpéʔele lè.»

⁷ A nǎnbèle kagunɔ kári n sáà nan Layisyi na. A be syɛ́ɛnbèle nyaa, a pe i nyɛ peyɛɛ ma sági àmɛɛ Siidɔn ye nyɛ lè. Pe maa pye wodɛ́ɛnbéle ní yɛɛ̀nyinge na, kasɔngunɔ fun. Syɔɔn faala da pye yaà tári ni ni be tɔ́ɔrɔ í wàlá be sogumɔ wówaa, wee wi fǎngi gbàn be na lè í. Pe ní Siidɔn ye maa léeli peyɛɛ na. Pínɛnyɛnnɛgɛ da pye pe ní syɔɔn faala nínge ni í.

⁸ A nǎnbèle kagunɔ kári Soreya ní Ɛsyitawɔli ma be senyɛnbèle ma. A be senyɛnbèle be pye: «Nyàʔá ye sáà nyaa yaà?»

⁹ A be jo: «Ye yìri wo sa too be na. Níì cán wolo n sáà tári nyaa, ti n tɔ̀nɔ n nyɔɔ. Yele a kɔ́ kòro kàa sìnjoo ni í. Ye a kɔ́ pye sàlagafɔɔlɔ í. Ye yìri yaa syée ye sa tári bee syɔɔ ye taa.

¹⁰ Yele ga sáà jée di ni, yele a nan syɛɛnfelegaa na ki lè kasɔngunɔ fun. Tári n kpɔ́ʔɔ, Kolocɔlɔɔ si n di le yele kɔ́yi ni. Yáriree myɛ di nyɛ tári na lè, ki kàa ga fɔ̀n yaà í.»

¹¹ Lǎli bee ni a Dan túlugi nǎnbèle pèle saala taanri yiri Soreya, ní Ɛsyitawɔli ni n kári ní be kapɛɛnkpumɔn-yáriri ní.

¹² A be lúgu n kári n sáà tɛ́ɛn Kiiriyati-Yeyarimi ni, Zyuda tári ni. Koro na be tɛ́ɛgi bee yiri Mahane-Dan àlí n baa nan níjanʔa na.

¹³ A be sɔ̀lɔ beè ni syée Efirayimi nyanbeleyi kúlo ma, níì kári fwɔɔ n sáà nan Mika kpáagi na.

¹⁴ Nǎnbèle bele kagunɔ pe da kári n sáà Layisyi tári saanri n wéle lè, a poro gi joo be senyɛnbèle ma níì jo: «A yele gi cán lé ncan efɔdi, ní màdebiigéle, ní yafanʔa, ní yarigaa niwirige, gee be sámaga lè tunmɔgbalara wóʔo, toro i nyɛ kpáayi naa kàa ni? Tɔ́ɔliw ni ye gi wéle, gee yele yɛlɛ bi kpéʔele lè.»

¹⁵ A be kolo n fala yaà beè Levii ye nìgɔcariw kpaʔa ma, ki lè Mika kpáagi, n sáà wi syáanri.

¹⁶ Dan nǎnbèle saala taanri be pye ní be kapɛɛnkpumɔn-yáriri ní lè, a poro yére kpaaweeli na.

¹⁷ Nǎnbèle kagunɔ pe da kári n sáà tári saanri n wéle lè, á poro lúgu n jée n yafaangi, ní efɔdiw, ní màdebiigèle láa n fàra yarigaa niwirigi na, gee be sámaga lè tunmɔgbalara wóʔo. Sáriga-wòlow si i nyɛ woyéreo ní kpaaweeli na ní nǎnbèle saala taanri ní be pye ní be kapɛɛnkpumɔn-yáriri ní lè.

¹⁸ Pe maa jée Mika kpáagi ni n yafaangi, ní efɔdiw, ní màdebiigèle láa n fàra yarigaa niwirigi na, gee be sámaga lè tunmɔgbalara wóʔo, a sáriga-wòlow be pye: «Nyàʔá yele kpéʔele nya?»

¹⁹ A be wi yari: «Pyèri yaà, mɔ nyɔɔgi tɔ́n mí pínɛ maa syée ní wolo ní mi sa pye wolo ma tofɔlɔ, ní sáriga-wòloo. Mɔ í pye nàɔn nibin kpaʔa wòolo sáriga-wòloo, koro ga jáa mɔ í pye syɛɛnfelege nibin, ní tùlugo nibin wòolo sáriga-wòloo Isirayɛli ni, gìí gi pɔ́rɔ mɔ ma?»

²⁰ A sáriga-wòlow fúngo fala n nyìn fundaanri na. A wi efɔdiw, ní màdebiigèle láa n fàra yafaangi na n pínɛ ní syɛ́ɛnbèle ní.

²¹ A be níì kólogi láa ni syée, níì pìíbèle, ní yaweeri, ní túgori kínige peyɛɛ yɛ́ɛgi na.

²² Lǎli ni be léeli Mika kpáagi na lè, bele kpaaya yi pye Mika kpáagi taana lè, a poro peyɛɛ yeri n kpóʔoro n yiri n taʔa Dan yòdaʔayi na.

²³ A be i yákpogèle wáa Dan yòdaʔayi kurugo. A be kolo n lúru n Mika pye: «Nyàʔá gi jée mɔ ni, á mɔ si i yiri kánmi naa na?»

²⁴ A wi be yari: «Mii kolocɔlɔbèle bele mii sámaga lè, yele n be láa ni syée n fàra sáriga-wòlow na. Nyàʔá ki a ní kòro mii ma? Koro na mɛ̀ɛ́ yele a ní gbǎn mii pye: ‹Nyàʔá gi jée mɔ ni?› »

²⁵ A Dan yòdaʔayi wi pye: «Mɔ a tíi wolo í ní mɔ yákpoli lóʔo woyɛɛ daana í. Kapye koro ban í, mɔ a nǎnbèle pèle fúnyo kaan yi tanʔa gbanʔama pe too yele na bi mɔ ní mɔ kpáagi wòolo sii kwɔ́ɔ.»

²⁶ A Dan yòdaʔayi taʔa n fala be kólogi na. A Mika ga gi nyaa pe fǎngi n nɛʔɛ n sɔ̀lɔ woro wógi na, a wi kolo n lúru n pan wi kpaʔa ma.

Dan kěgi, ní gi kpɔ̀ʔɔrɔli tɛ́ʔɛ

²⁷ A be Mika yasamagari láa, sáriga-wòlow wi pye wi ma lè, níì woro kɔ́ri n kári. A be sáà too Layisyi ye na be pye lè syɛ́ɛnbèle pèle, bele be pye lè wodɛ́ɛnbéle ní sági kasɔngunɔ fun. A be ŋɔséew tɛ́ʔɛ n be kpóo, níì kěgi sórigo.

²⁸ Syɔɔn faala ga taa n be syɔɔ í, níì cán pe maa léeli Siidɔn na. Pínɛnyɛnnɛgɛ da pye pe ní syɔɔn faala nínge ni í. Pe maa pye jǐnlɔgi ni ki lè Bɛti-Erehɔbi kàbangi na. A Dan ye níì kěgi faan níì tɛ́ɛn gi ni.

²⁹ A be kěgi mɛ́ʔɛ le ni gi yiri Dan, pe tofɔlɛɛgi Dan mɛ́ɛgi na, woro wee Isirayɛli da see lè. Bi gi taa kěgi bee pe da ni yiri Layisyi.

³⁰ A Dan yòdaʔayi yafaangi yérige a gi pye be woʔò. Gerisyɔmi wi lè Manase jáaw, woro pìíw Zyonatan ní wi jáabèle pe da pye Dan ye sáriga-wòlobèle fwɔɔ n taa n baa nan lǎli na, lee ni be tári syɛ̀ɛnnɛ cò n kári lè.

³¹ Yafaangee Mika da sámaga lè, pe maa koro tɛ́ʔɛ yaà, a gi pye be woʔò lǎlee myɛ ni Kolocɔlɔɔ kpáagi pye lè Silo ni.