Jàbɔbèle 17 - Cebaara Bible 2010

Mika ní wi kàgɔn yasundɛɛgi kéele

¹ Nànwaa n pye Efirayimi nyanbeleyi kúlo ni, pe maa ni wi yiri Mika.

² A wi wi nɔ́ɔw pye: «Wálifiiw saala kagunɔ ní dabata pe láa mɔ ma lè, woro wee láafɔlɔ na mɔ joo n taʔa lè a mii lóʔo, wéle, wáliw bee i nyɛ mii ma, mii wi da wi láa.» A wi nɔ́ɔw jo: «Ki n yɛlɛ Yawe í dùbaw taʔa mɔ na, dóō.»

³ A wi wálifiiw saala kagunɔ ní dabata lúrugo n kaan wi nɔ́ɔw ma. A wi nɔ́ɔw jo: «Mii a wálifiiw naa kaan Yawe ma ní mii tiimaa kɔ́gi ní jàngó pe yatanga, ní yarigaa niwirige sámaga mii pìíw ma tunmɔgbalara wóʔo. Kánmi bee na mii a wi lúrugo kaan mɔ ma tɔ́ɔliw ni.»

⁴ A wi wálifiiw lúrugo n kaan wi nɔ́ɔw ma. A wi nɔ́ɔw wálifiio támapiiye sirakele wòlo wi ni n sáà kaan kanyɛɛnfaanw ma, a wee bee wi sámaga yafanʔa, ní yarigaa niwirige, gee be sámaga lè tunmɔgbalara wóʔo n baa tɛ́ʔɛ Mika kpáagi ni.

⁵ A Kolocɔlɔɔ kpáagaa pye Mikaw bee ma. A wi efɔdi ní màdebiigéle sámaga, níì wi pìiwaa télege a woro pye sáriga-wòloo.

⁶ Lǎli bee ni fànʔafɔlɔ da pye Isirayɛli ni í. Pe myɛ nibin nibin maa ni gi kpéʔele, gee ki ga yɛlɛ wee ma lè.

⁷ Levii ye nìgɔcariwaa maa pye yaà Bɛtilehɛmi ni, Zyuda tári ni, ki lè Zyuda túlugi wòolo kegaa.

⁸ A nǎnw bee si kɔ́ɔ̀ yiri Bɛtilehɛmi kěgi ni ki lè Zyuda tári ni bi sa tɛ́ɛn beè wi a gbǎn pye lè. A wi tánʔa fwɔɔ n sáà nan Mika kpáagi na Efirayimi nyanbeleyi kúlo ni.

⁹ A Mika wi pye: «Sán mɔ yìri?» A wi wi yari: «Mii i nyɛ Levii ye wóo. Bɛtilehɛmi wi nyɛ lè Zyuda tári ni, kěgi bee wówaa mii nyɛ. Tánʔana na mii nyɛ bi sa tɛ́ɛn beè mii a gbǎn pye lè.»

¹⁰ A Mika wi pye: «Kòro ní mii ní. Mɔ a pye mii má tofɔlɔ, ní sáriga-wòloo. Yɛɛlɛ o yɛɛlɛ mii a ra wálifiio támabéle kɛɛ kaangi mɔ ma, mii a ra mɔ yaleri kaangi mɔ ma, sáā mɔ nyɔ́ɔgi caa.» A Levii ye wów sɔ̀lɔ n jée.

¹¹ A wi gi kɔ̀rirɔ kánmi bee na bi kòro ní nǎnw bee ní. A wi i nìgɔcariw córo àmɛɛ woro jáawaa nyɛ lè.

¹² A Mika Levii ye nìgɔcariw télege a wi pye woro sáriga-wòlow. A wi kòro yaà Mika kpáagi ni.

¹³ A Mika jo: «Tɔ́ɔliw ni mii n gi cán ncan Yawe a tɔ̀nɔ́ kacànna kpéʔele mii na, níì cán Levii ye wów naa n baa pye mii sáriga-wòlow.»