Jàbɔbèle 16 - Cebaara Bible 2010

Samisɔn ní Gaza kpàánweegèle kɔ̀riyɔ kéele

¹ Cangaa a Samisɔn kári Gaza ma. A wi sáà nànjaacewaa nyaa yaà beè, a wi sínɛ ní wi ní.

² A pe gi joo Gaza syɛ́ɛnbèle ma níì jo: «Samisɔn n pan nɛɛ naa.» A be tɛ́ɛgi màʔa wi na, níì làra n wi sige kěgi kpàánweele na yébiligi myɛ ni. A be yére sági yébiligi myɛ ni, níì jo: «Nyǐngi ga tali, wo a wi kpóo.»

³ A Samisɔn sínɛ n kòro yaà fwɔɔ n taa a nyǐngi baa tíla. Lǎli ni nyǐngi tíla lè, a wi yìri n sáà kěgi kpàánweele kɔripiiye kpóʔoro n pínɛ kɔ̀riteliyi siin ni n kɔ́n n fàra yasɔʔɔgi na n taʔa wi fókaannyunyi na n kári n sáà taʔa nyanbelegi ǹjoʔo ni, ki lè Heburɔn zǐnmi na.

Dalila n Samisɔn jànváa

⁴ Gee bee kàdoʔo ma, a Sorɛki jǐnlɔgi céwaa kéele baa wi dɛ́nɛ. Pe maa ni wi yiri Dalila.

⁵ A Filisitini ye fànʔafɔbèle kári wi ma n sáà wi pye: «Wi lɛ́ɛlɛ jàngó mɔ í gi cán sán wi wi fànnɛʔɛgi taa bi wɔ́ɔ gi cán kánmee na wolo a fànʔa taa wi na lè, wolo si wi pwɔɔ bi wi fwɔɔgɔ. Wolo myɛ nibin nibin a wálifiio saala kagunɔ kagunɔ ní dabata-da kaan mɔ ma.»

⁶ A Dalila Samisɔn pye: «Mii i mɔ nyɛ́ɛri, mɔ fannɛʔɛgi tɛɛtaala tɛ̀ɛn mii na, mí wɔ́ɔ gi tɛ̀ɛn, gee ní syɔɔn a mɔ pwɔɔ lè bi mɔ fwɔɔgɔ.»

⁷ A Samisɔn wi pye: «Pe ga mii pwɔɔ ní tiripiriye kɔrɔsiin ní, yee yi lè yi ga kɔ́ɔ̀ waʔa í, mii a pye fànʔa fun, mii a pye àmɛɛ nànzanbèle nyɛ lè.»

⁸ A Filisitini ye fànʔafɔbèle kári Dalila ma ní tiripiriyi kɔrɔsiin ní, yee yi lè yi da kɔ́ɔ̀ waʔa í. A wi baa wi pwɔɔ ní yee bee ní.

⁹ Pèle si maa pye wolarabéle ní kpaafungi ni. A wi wi pye: «Filisitini ye n pan mɔ kurugo, Samisɔn!» A wi tíriyi cɛnɛ àmɛɛ naà káfugo yòvinimɛ sórogi lè. Kánmi bee na wi fǎngi tɛɛtaala ga cán í.

¹⁰ A Dalila Samisɔn pye: «Wéle, mɔ n miyɛɛ nyɛ́nɛ mii na, mɔ n finɛ mii ma. Tɔ́ɔliw ni, mii i mɔ nyɛ́ɛri yárigee ní gi yɛlɛ pe mɔ pwɔɔ lè, gi tɛ̀ɛn mii na.»

¹¹ A wi wi pye: «Pe ga mii pwɔɔ ní mɛɛnfɔngéle ní, gele ge lè pe ga kɔ́ɔ̀ báara ní ge ní í, mii a pye fànʔa fun, mii a pye àmɛɛ nànzanbèle nyɛ lè.»

¹² A Dalila mɛɛnfɔ́ngèle láa n tɛ́ʔɛ n wi pwɔɔ, níì wi pye: «Filisitini ye n pan mɔ kurugo, Samisɔn!» Wolarabèle si n pye yaà kpaafungi ni. Mɛ́ɛngèle ge pye wi kɔ́yi na lè a wi ge cɛnɛ àmɛɛ jèsee mɛ́ɛnnɛ nyɛ lè.

¹³ A Dalila Samisɔn pye: «Alí n baa nan lǎli naa na mɔ i miyɛɛ nyɛ́nɛ mii na, mɔ n finɛ mii ma. Tɔ́ɔliw ni yárigee ní gi yɛlɛ pe mɔ pwɔɔ lè gi tɛ̀ɛn mii na.» A wi wi pye: «Mii ǹjoo-kóloyi kɔrɔsiin pínɛ mi tìin ní fànikologo ní.»

¹⁴ A wi di kóri n yérige ní cèferili ní, níì jo: «Filisitini ye n pan mɔ kurugo, Samisɔn!» A wi yìri wi ŋúnɔmi na n cèferili ní fànikologi kíle n kɔ́n.

¹⁵ A wi wi pye: «Kanmìí na mɔ a gbǎn gi joo si jo: ‹Mɔ kéeli n mii dɛ́nɛ,› bi gi taa mɔ fúngi o nyɛ ní mii ní í? Mɔ miyɛɛ nyɛ́nɛ mii na lè ki tɔdaanri wi wee. Mɔ ga kɔ́ɔ̀ gi tɛ̀ɛn mii na beè mɔ fannɛʔɛgi yìri lè í.»

¹⁶ Amɛɛ si wi wári wi na lè canʔa o canʔa ní wi syɛ́ɛnri ní n tɔ̀nɔ ni wi tɔ́ɔrɔ, a wi fɔ̀rɔ kùumɔ.

¹⁷ A wi wi fúngi myɛ joo n tɛ̀ɛn wi na níì wi pye: «Nyùngunu-ŋɔ́nɔ ga kɔ́ɔ̀ jée mii nyǔngi ni í, níì cán mii i nyɛ Kolocɔlɔɔ naziirio àlí n mii yaʔa mii nɔ́ɔw láʔa ni. Pe ga mii nyúngi kùnu, mii fǎngi a yiri mii ni, mii a pye fànʔa fun, mii a pye àmɛɛ nànzanbèle nyɛ lè.»

¹⁸ A Dalila ga gi nyaa wi n wi fúngi myɛ joo n tɛ̀ɛn woro na, a wi tun pe sa Filisitini ye fànʔafɔbèle yeri níì be pye: «Yaa maa kátali naa na, níì cán wi n wi fúngi myɛ joo n tɛ̀ɛn mii na.» A Filisitini ye fànʔafɔbèle pan wi ma ní wálifiiw ní be kɔ́yi ni.

¹⁹ A wi wi pye a wi ŋúnɔ woro tɔ́lɔyi na, níì nànwaa yeri a wi baa wi ǹjoo-kóloyi kɔrɔsiin kùnu, níì séli ni wi fwɔɔgi, ncan wi fǎngi maa yiri wi ni.

²⁰ Lǎli bee ni a wi jo: «Filisitini ye n pan mɔ kurugo, Samisɔn!» A wi yìri wi ŋúnɔmi na níì jo: «Mii a niyɛɛ zyɔɔ be ma àmɛɛ ki da pye tɔ́lɔyee na lè, mii a niyɛɛ yirige yaà.» Wi si da gi cán Yawe n woro yaʔa í.

²¹ A Filisitini ye wi cò, níì nyapiigèle jabagi wi na, níì kári ní wi ní Gaza ma n sáà wi pwɔɔ ní kanyɛɛnrɛ nyɔ̀ʔɔmɔ ní, wi si i tire tírege na yaà kàsow ni.

²² Koro n gi taa wi ǹjoori pe da kùnu lè, ti maa lúru ni fún.

Samisɔn kakpɔɔzangi ní wi kùúw kéele

²³ A Filisitini ye fànʔafɔbèle si kɔ́ɔ̀ peyɛɛ gbóʔoro bi sárigakpɔɔɔ wòlo be kolocɔlɔw Dagɔn ma, si fundaanra kpéʔele. Pe maa ni gi nyuu níì jo: «Wolo kolocɔlɔw n wolo nígoow Samisɔn le wolo kɔ́yi ni.»

²⁴ Lǎli ni syɛ́ɛnbèle wi nyaa lè, a pe i be kolocɔlɔw sòoló ní i gi nyuu níì jo: «Wolo kolocɔlɔw n wolo nígoow le wolo kɔ́yi ni, woro wee wi da ni wolo tári kálagi lè ní i wolo syɛɛnnɛʔɛmi kúu.»

²⁵ N be yaʔa be fundaanri na a be jo: «Ye sa Samisɔn yeri yaà koro ga pye wi ba ra wo bàrí.» A be sáà Samisɔn yeri n yirige kàsow ni, a wi ba ni kɔ̀nʔɔ be yɛʔɛ̀ ma. A be wi yérige gàángèle siin nínge ni.

²⁶ Nìgɔcaripili li da Samisɔn cò kɔ́gi na lè, a wi loro pye: «Ki yaʔa mii í gàángèle cò, gele na kpaakpɔɔgi yére lè bi niyɛɛ zigi ge na.»

²⁷ Kpaakpɔɔgi maa nyìn nǎnbèle ní cébèle na. Filisitini ye fànʔafɔbèle myɛ maa pye yaà. Syɛ̀ɛnnɛ selebinɛ ní saala kagunɔ félege maa pye kpáagi ǹjoʔo ni, n nǎnbèle pínɛ cébèle ni, ni Samisɔn wéle wí i kɔ̀nʔɔ́.

²⁸ Lǎli bee ni a Samisɔn Yawe nyɛ́ɛri níì jo: «Kàfɔw Yawe, mii i mɔ nyɛ́ɛri, sɔ̀ngi mi taa mii na, mí ní fànʔa kaan mii ma kátali naa na. Ee Kolocɔlɔɔ, koro ga pye mii í mii nyapiigèle siin jaala gɔlɔ́ wòlo Filisitini ye na tɔlɔgi naa nibin na.»

²⁹ A Samisɔn níngi gàángéle siin tala tala n cò, gele na kpaakpɔɔgi yére lè, n wi kàliige kɔ́gi tɛ́ʔɛ n lee cò, níì wi kàmɔnɔ wógi tɛ́ʔɛ n lee cò.

³⁰ A Samisɔn jo: «Mii ní Filisitini ye n yɛlɛ wo pínɛ kùu.» A wi ge ŋɔrigɔ ní fànʔa ní. A kpaakpɔɔgi tìgi n too fànʔafɔbèle, ní syɛ́ɛnbèle myɛ na be pye yaà lè. Bele wi pínɛ n kpóo ní wiyɛɛ ní lè wi làriguuli ni, a poro nɛʔɛ n sɔ̀lɔ bele na wi da kpóo lè wi sìíw làla ni.

³¹ A wi senyɛnbèle ní wi tóow kpaʔa wòolo myɛ kári n sáà wi láa n pan. Pe lúru n pan lè, a pe baa wi tɔ́n Soreya, ní Ɛsyitawɔli níngi ni, wi tóow Manowa nyángi ni. Wi maa pye jàbɔlɔ Isirayɛli ni yɛ̀ʔɛlɛ toko fúngo ni.