Jàbɔbèle 12 - Cebaara Bible 2010

Efirayimi ye ní Zyefite kapɛɛnni kéele

¹ A Efirayimi nǎnbèle peyɛɛ gbóʔoro n Zyuridɛnw jeli n kári solomɔkulo ma n sáà Zyefite pye: «Nyàʔá na mɔ sɔ̀lɔ n kári n sáà kapɛɛnni kpúmɔn ní Amɔn ye ní, mɔ si ga wolo yeri a wolo kári ní mɔ ní í? Wolo a mɔ kpáagi sórigo cáan mɔ na.»

² A Zyefite be yari: «Mii ní mii syɛ́ɛnbèle ní, kàsiigbaɔn maa pye wolo ní Amɔn ye nínge ni. A mii ga yele yeri, yele ga pan n baa mii syɔɔ be ma í.

³ Amɛɛ si mii gi nyaa lè yele ga pan bi ba mii syɔɔ í, a mii niyɛɛ gaan kùúw ma níì kári n sáà kapɛɛnni kpúmɔn ní Amɔn ye ní, a Yawe be le mii kɔ́yi ni. Koro na nyàʔá na yele pan ba kapɛɛnnɛ kpúmɔn ní mii ní níjanʔa?»

⁴ A Zyefite Galaadi nǎnbèle myɛ kpóʔoro n sáà kapɛɛnni kpúmɔn ní Efirayimi ye ní. A Galaadi nǎnbèle Efirayimi ye jáa, poro bele pe da ni gi nyuu lè níì jo: «Yele Galaadi ye, yele ye nyɛ Efirayimi ye wovanbèle Efirayimi ye, ní Manase ye níngi ni.»

⁵ A Galaadi ye sáà Zyuridɛnw tɛɛjeliye syɔɔ Efirayimi kàbangi na. Efirayimi ye wovanwaa ga sáà jo: «Mii i caa bi jeli.» Galaadi nǎnbèle n wi yíbe si jo: «Mɔ i nyɛ lé Efirayimi ye wówaa?» Wi n be yari: «Eʔe.»

⁶ Lǎli bee ni pe n wi pye: «Ki joo mí jo: ‹Syibolɛti.› » Wi n si jo: «Sibolɛti.» Níì cán wi fanʔa o gáà pye bi gbǎn gi sámaga joo í. Lǎli bee ni pe n wi cò n kɔni Zyuridɛnw tɛɛjelige taana. Efirayimi ye nǎnbèle be kùu lǎli bee ni lè, pe n pye sirakamayɛ siin ní selebinnɛ.

⁷ A Zyefite pye jàbɔlɔ Isirayɛli ni yɛ̀ʔɛlɛ kɔrɔni fúngo ni. Koro kàdoʔo ma Zyefite wi pye lè Galaadi ye wów, a wi kùu. A be wi tɔ́n Galaadi kègaa ni.

Ibisan, ní Elɔn, ní Abidɔn kéeli

⁸ A Bɛtilehɛmi ye Ibisan pye jàbɔlɔ Isirayɛli ni woro kàdoʔo ma.

⁹ Wi maa taa nànbiigéle toko ní kpɔrigɔ ní calipiigèlē toko ní kpɔrigɔ. A wi wi calipiigèle kaan kàfugo ma wóbèle pèle ma, níì kàfugo ma pìcaabèle pèle toko ní kpɔrigɔ pɔri n kaan wi jáabèle ma. Wi n pye jàbɔlɔ Isirayɛli ni yɛ̀ʔɛlɛ kɔrɔsiin fúngo ni.

¹⁰ Koro kàdoʔo ma a Ibisan kùu, a be wi tɔ́n Bɛtilehɛmi ni.

¹¹ Woro kàdoʔo ma Elɔn wi pye lè Zabulɔn ye wów, a woro pye jàbɔlɔ Isirayɛli ni yɛ̀ʔɛlɛ kɛɛ fúngo ni.

¹² Koro kàdoʔo ma a Zabulɔn ye Elɔn kùu, a be wi tɔ́n Ayalɔn ni, Zabulɔn tári ni.

¹³ Woro kàdoʔo ma Hilɛli wi lè Piratɔn ye wów, a woro jáaw Abidɔn pye jàbɔlɔ Isirayɛli ni.

¹⁴ Wi maa taa nànbiigéle togoye siin n fàra pìinyanbiiye toko ní kpɔrigɔ na, nànbēle, poro bele pe da ni tɛ̀ɛ́n jòfanibēle togoye taanri ní kpɔrigɔ na lè. Wi n pye jàbɔlɔ Isirayɛli ni yɛ̀ʔɛlɛ kɔrɔtaanri fúngo ni.

¹⁵ Koro kàdoʔo ma a Hilɛli jáaw Abidɔn kùu, a be wi tɔ́n Piratɔn ni, Efirayimi tári ni, Amalɛki ye nyanbelegi na.