Jàbɔbèle 10 - Cebaara Bible 2010

Jàbɔbèle pèle: Tola ní Yayiiri kéeli

¹ Abimelɛki kùúw kàdoʔo ma, Puwa wi lè Dodo jáaw, a woro jáaw Tola yìri n Isirayɛli ye syɔɔ. Isakari wóo wi pye. Wi maa pye wodɛ́ɛɔn ní Syamiiri ni, Efirayimi nyanbeleyi kúlo ni.

² Wi n pye jàbɔlɔ Isirayɛli ni yɛ̀ʔɛlɛ toko ní taanri fúngo ni, níì kùu, a be wi tɔ́n Syamiiri ni.

³ A Yayiiri yìri woro kàdoʔo ma, wi pye lè Galaadi ye wów, a woro pye jàbɔlɔ Isirayɛli ni yɛ̀ʔɛlɛ toko ní siin fúngo ni.

⁴ Jaafɔɔlɔ toko ní kpɔrigɔ maa pye wi ma, nànbēle, bele be tɛ̀ɛ́n jòfanipiiye toko ní kpɔrigɔ na lè. Kèye toko ní kpɔrigɔ maa pye be ma, yoro be sèʔé yiri Yayiiri vǒyi níjanʔa. Yi i nyɛ Galaadi tári ni.

⁵ A Yayiiri kùu, a be wi tɔ́n Kamɔn ni.

Amɔn ye i Isirayɛli ye wɔʔɔ

⁶ Gee gi pee Yawe nyɛ́nɛ na lè, a Isirayɛli ye ní i koro kpéʔele. Pe maa ni Baalibèle ní Asitaritebèle kpɔ̀ʔɔrɔ́, ni Sirii ye kolocɔlɔbèle, ní Siidɔn ye kolocɔlɔbèle kpɔ̀ʔɔrɔ́, n fàra Mowabi ye wóbèle, ní Amɔn ye wóbèle, ní Filisitini ye wóbèle na, níì Yawe yaʔa pe ní o báara wi ma í.

⁷ A Yawe fundanʔari cò naà Isirayɛli ye kánmi na, a wi be le Filisitini ye kɔ́yi, ní Amɔn ye kɔ́yi ni.

⁸ A be Isirayɛli ye yɛ́ɛyi wáriga, níì tɔ̀nɔ n fǎngi gbàn be na n séli yɛ́ɛli bee na n baa taa yɛ̀ʔɛlɛ kɛɛ ní kɔrɔtaanri, gee bee n jo Isirayɛli ye myɛ be pye lè Zyuridɛnw jeligɔgee na, Amɔri ye tári ni, di lè Galaadi tári.

⁹ A Amɔn ye Zyuridɛnw jeli bi wɔ́ɔ sa kapɛɛnni kpúmɔn ní Zyuda, ní Bɛnzyamɛ, ní Efirayimi kpáagi wòolo ní. A wɔʔɔgbɔʔɔ tɔ̀nɔ n pye Isirayɛli ye na.

¹⁰ A Isirayɛli ye i yákpogèle wáa Yawe kurugo ni gi nyuu níì jo: «Wolo n kapeele pye mɔ na, níì cán wolo n mɔ yaʔa, mɔ wi lè wolo Kolocɔlɔw, ní i Baalibèle kpɔ̀ʔɔrɔ́.»

¹¹ A Yawe Isirayɛli ye pye: «Lǎli ni Ezyipiti ye, ní Amɔri ye, ní Amɔn ye, ní Filisitini ye,

¹² ní Siidɔn ye, ní Amalɛki ye, ní Maɔn ye be fǎngi gbàn yele na lè, á yele yákpogèle wáa mii kurugo, mii da yele yirige be kɔ́yi ni ì?

¹³ Kàjáa yele n baa mii yaʔa ní i báara kolocɔlɔbèle pèle nikwɔɔlɔ ma. Koro na mii a ní yele syɔɔ í.

¹⁴ Kolocɔlɔbèle yele nyɛ́nɛ n wòlo lè, yaa syée ye sa ra yákpogèle wáa poro kurugo. Pe n yɛlɛ bi yele syɔɔ yele wɔʔɔgi làla ni.»

¹⁵ A Isirayɛli ye Yawe pye: «Wolo n kapeele pye. Gee mɔ ga nyaa a gi yɛlɛ mɔ ma lè, koro kpéʔele wolo na, mí tɛ́nɛ mi wolo syɔɔ níjanʔa.»

¹⁶ A be kolocɔlɔ-nibɔnbèle yirige peyɛɛ níngi ni, ní i báara Yawe ma. Fɔ̀rɔgi gi pye Isirayɛli ye na lè, Yawe ga níì pye bi gbǎn gi kpàraco í.

¹⁷ A Amɔn ye peyɛɛ gbóʔoro n baa tɛ́ɛn kapɛɛnni kánma na Galaadi ni, á Isirayɛli ye peyɛɛ gbóʔoro kapɛɛnni kánma na Misipa ni.

¹⁸ Syɛ́ɛnbèle be pye lè Galaadi ni, kùndigibèle, a poro i gi nyuu peyɛɛ ma níì jo: «Nànwìí wi a séli kári sa too Amɔn ye na? Wi a pye Galaadi ye myɛ kùndigiw.»