Jàbɔbèle 1 - Cebaara Bible 2010

Isirayɛli ye n tɛ́ɛn Kanaan ni

¹ Zyozuwe kùúli kàdoʔo ma a Isirayɛli ye Yawe yíbe níì jo: «Wìí wi a lúgu kári wolo ni Wozeliw Kanaan ye kánmi na bi sa kapɛɛnni kpúmɔn ní be ní?»

² A Yawe be yari: «Zyuda wi a lúgu kári. Wéle, mii n tári le wi kɔ́yi ni.»

³ A Zyuda wi yɛʔɛfɔw Simeyɔn pye: «Lúgu ní mii ní wo kári tálɛɛli ma li kaan mii ma lè, wo sa kapɛɛnni kpúmɔn ní Kanaan ye ní. Mii a wɔ́ɔ ba kári ní mɔ ní lee má li kaan mɔ ma lè!» A Simeyɔn kári ní wi ní.

⁴ A Zyuda ye lúgu n kári. A Yawe sáà Kanaan ye, ní Perezi ye le be kɔ́yi ni, a be nànbēle selebingéle kagunɔ kpóo be ni Bezɛki ni.

⁵ A be Adoni-Bezɛki nyaa yaà Bezɛki ni, a be kapɛɛnni kpúmɔn ní wi ní, níì fànʔa taa Kanaan ye ní Perezi ye na.

⁶ A Adoni-Bezɛki yiri ni fé. A be taʔa wi na ni nɛnɛ n sáà wi cò, níì kɔ́yi ní tɔ́lɔyi kabenigbɔnbēle cɛnɛ wi na.

⁷ A Adoni-Bezɛki jo: «Fànʔafɔɔlɔ togoye taanri ní kpɔrigɔ, bele kɔ́yɔ ní be tɔ́lɔyi kabenigbɔnbēle pe da cɛnɛ lè, poro maa ni mii suwologiri jóo ni líi. Gee mii kpéʔele lè, koro sìndɛɛgi Kolocɔlɔɔ lúrugo mii ma.» A be kári ní wi ní Zyerusalɛmi ma, a wi sáà kùu yaà beè.

⁸ A Zyuda yòdaʔayi sáà too Zyerusalɛmi na n gi syɔɔ n taa níì ŋɔséew tɛ́ʔɛ n gi jaa, níì gi sórigo ní naà ní.

⁹ Koro kàdoʔo ma Kanaan ye be pye lè wodɛ́ɛnbéle ní nyanbeleyi kúlo ni, ní wòrogulo kabangi na, ní tɛɛfiigi ni lè, a Zyuda yòdaʔayi kári n sáà kapɛɛnnɛ kpúmɔn ní bele bee ní.

¹⁰ A Zyuda ye kári n sáà too Kanaan ye na be pye wodɛ́ɛnbéle ní Heburɔn ni lè. Heburɔn pe da séli ni yiri Kiiriyati-Ariba. A be wɔ́ɔ̀ fànʔa taa Syesyayi, ní Ahiman, ní Talimayi na.

¹¹ A pe ga yìri yaà beè, a be kári n sáà too Debiiri ye na. Debiiri pe da séli ni yiri Kiiriyati-Sefɛɛri.

¹² A Kalɛbi jo: «Syɔ́ɔnwee wi ga fànʔa taa Kiiriyati-Sefɛɛri na lè n gi syɔɔ n taa, mii a mii pìíw Akisa kaan wee bee fɔ́lɔ ma wi pye wi cɔɔ̀.»

¹³ Kalɛbi cɔnɔw pe da ni yiri lè Kenazi, a woro jáaw Otinyɛli fànʔa taa gi na. A Kalɛbi wi pìíw Akisa kaan wi ma a wi pye wi cɔɔ̀.

¹⁴ A wi ga nan yaà a wi wi nǎnw Otinyɛli sɔ́ɔn níì jo wi segaa nyɛ́ɛri woro tóow ma. A Akisa ye n tìgi wi jòfaniw na. A Kalɛbi wi pye: «Nyàʔá mɔ caa?»

¹⁵ A wi wi yari: «Fɔ̀lɔ mii ma keelaa na. Amɛɛ mɔ wòrogulo kàbangi tɛ́ɛgaa kaan mii ma n kwɔ́ɔ lè, ki n yɛlɛ mɔ í wɔ́ɔ pùnweegèle kèle kaan mii ma.» A Kalɛbi ǹjoʔo ma pùnweegèle ní táàma pùnweegèle kaan wi ma.

¹⁶ Kenii ye be pye lè Mowizi céw tóo yòdaʔaya, a poro yiri Sɛʔɛtiiri kàʔa ni n pínɛ n kári ní Zyuda yòdaʔayi ní Zyuda fìími tára ma Aradi wòrogulo kàbangi na. A be sáà tɛ́ɛn yaà beè ní syɛ́ɛnbèle ní.

¹⁷ A Zyuda pínɛ n kári ní wi yɛʔɛfɔw Simeyɔn ní. Kanaan ye be pye wodɛ́ɛnbéle ní Sefati ni lè, a be sáà fànʔa taa poro na, níì be kěgi kálagi péw. A pe i kěgi bee yiri Horima.

¹⁸ A Zyuda níì Gaza ní gi tásaligi syɔɔ n taa, n fàra Asikalɔn ní gi tásaligi na, ní Ekurɔn ní gi tásaligi na.

¹⁹ Yawe maa pye ní Zyuda ní, a wi nyanbeleyi kúlo syɔɔ n taa, kàjáa wi ga gbàn n jǐnlɔgi wòolo nɛnɛ n yirige yaà í, níì cán tunmɔrɔ kapɛɛnkpumɔn-wòtorobéle maa pye be ma.

²⁰ A be Heburɔn kaan Kalɛbi ma àmɛɛ Mowizi da gi joo lè. A wi Anaki jáabèle taanri nɛnɛ n yirige yaà.

²¹ Yebusi ye be pye wodɛ́ɛnbéle ní Zyerusalɛmi ni lè, Bɛnzyamɛ yòdaʔayi ga be nɛnɛ n yirige yaà í, a Yebusi ye tɛ́ɛn Zyerusalɛmi ni ní Bɛnzyamɛ yòdaʔayi ní fwɔɔ n baa nan níjanʔa na.

²² A Zyozɛfu kpáagi wòolo wɔ́ɔ̀ lúgu n kári Betɛli kánmi na, a Yawe pye ní be ní.

²³ Zyozɛfu kpáagi wòolo maa tun a be sáà Betɛli saanri n wéle. Kěgi bee pe da ni yiri Luzi booma ni.

²⁴ A kɔ̀rɔsiifɔbèle sáà nànwaa nyaa a wi yiri kěgi ni. A be wi pye: «Kěgi tɛɛ̀jeele tɛ̀ɛn wolo na, wolo a kacànna pye mɔ na.»

²⁵ A wi kěgi tɛɛ̀jeele tɛ̀ɛn be na, a be ŋɔséew tɛ́ʔɛ n kěgi jaa. Kàjáa pe maa nǎnw bee ní wi kpáagi wòolo myɛ yaʔa a be kári.

²⁶ A nǎnw bee kári Hɛti ye tári ma n sáà kègaa tɛ́ʔɛ yaà beè, níì gi mɛ́ɛgi le ni gi yiri Luzi. Mɛ́ɛgi bee gi nyɛ gi na fwɔɔ n baa nan níjanʔa na.

²⁷ Manase ga Bɛti-Syeyan ye ní gi tɛ́nɛmi kèye wòolo nɛnɛ n yirige yaà í, n fàra Taanaki ní gi tɛ́nɛmi kèye wòolo, ní Dɔɔri ní gi tɛ́nɛmi kèye wòolo, ní Yibileyami ní gi tɛ́nɛmi kèye wòolo, ní Megido ní gi tɛ́nɛmi kèye wòolo na. Kanaan ye ga fɔ̀lɔ bi yiri tári bee ni í.

²⁸ Lǎli ni Isirayɛli ye baa fànʔa taa lè, a be Kanaan ye kɔ́ri pe i pɔrɔtɔɔri fáli kpéʔele, kàjáa pe ga be nɛnɛ n yirige yaà í.

²⁹ Kanaan ye be pye wodɛ́ɛnbéle ní Gezɛɛri ni lè, Efirayimi ga be nɛnɛ n yirige yaà í. A Kanaan ye tɛ́ɛn yaà Efirayimi ye níngi ni, Gezɛɛri ni.

³⁰ Zabulɔn ga Kiturɔn ye wàlá Nahalɔli ye nɛnɛ n yirige yaà í. A Kanaan ye tɛ́ɛn Zabulɔn ye níngi ni, kàjáa pe maa be kɔ́ri n cáan pɔrɔtɔɔri fáli na.

³¹ Azɛɛri ga Ako ye wàlá Siidɔn ye wàlá Alabi ye nɛnɛ n yirige yaà í, n fàra Akizibi ye, ní Heliba ye, ní Afiiki ye, ní Erehɔbi ye na.

³² A Azɛɛri ye jân tɛ́ɛn Kanaan ye níngi ni, be pye lè tári wòolo, níì cán pe da be nɛnɛ n yirige yaà í.

³³ Nɛfitalii ga Bɛti-Syemɛsyi ye wàlá Bɛti-Anati ye nɛnɛ n yirige yaà í. A be tɛ́ɛn Kanaan ye níngi ni be pye lè tári wòolo. Kàjáa pe maa Bɛti-Syemɛsyi ye, ní Bɛti-Anati ye kɔ́ri n cáan pɔrɔtɔɔri fáli na.

³⁴ A Amɔri ye Dan yòdaʔayi ŋɔrigɔ n lúrugo yaà nyanbeleyi kúlo ma, pe ga be yaʔa a be tìgi jǐnlɔgi ni í.

³⁵ Amɔri ye maa cée níì kòro Hari-Herɛsi, ní Ayalɔn, ní Syalibimi ni. Kàjáa Zyozɛfu kpáagi wòolo fanʔa maa baa líbe be na a pe be kɔ́ri n cáan pɔrɔtɔɔri fáli na.

³⁶ Amɔri ye láʔagologi maa yìri Akirabimi tɛɛ̀lúgugi ma n sɔ̀lɔ Sela ma n taʔa n fala.