Heburubèle 9 - Cebaara Bible 2010

Kpɔ̀ʔɔrɔli li lè tári wólo, ní lee li lè nyɛ̀ʔɛni wólo

¹ Kolocɔlɔɔ kpɔ̀ʔɔrɔli kajoodɛɛngēle maa pye joogaanzelili ni, n fàra tɛɛcǎngi na, gi lè dulunyanw wóʔo.

² Níì cán pe maa Kolocɔlɔɔ kpɔ̀ʔɔrɔli fànikpaʔa sámaga, ní i funzeligi mɛ́ʔɛ yiri Tɛɛcǎngi. Fètindaʔali ní tàbaliw maa pye gi ni, n fàra búruw na be kaan Kolocɔlɔɔ ma lè.

³ Fàni siin wów be tɛ́ʔɛ n kpáagi pari lè, kpaafunzangi maa pye wee bee màʔama na, pe i gi yiri Tɛɛcàndelegi.

⁴ Nùndaanna míige tɛɛ̀sorigogo maa pye yaà, tɛɛ̀ wóʔo, n fàra joogaanni kásu na, wee tɛ́ɛyɛ myɛ be da tɔ́n ní tɛɛ̀ ní lè, níì tɛɛ̀ kòdɔɔlɔ le wi ni, lee ni pe da mánɛw le lè n fàra Aarɔn kàgbeeli na, lee li da fyɛ́ɛn lè, ní kàdɛnɛyi kàlagorigēle, gele na joogaanni syɛ́ɛnrɛ da pye lè wozɛbɛrɛ ní.

⁵ Nìjanri syerubɛnbéle maa pye kásuw ǹjoʔo ni n kapeegèle kùsulugo tɛ́ʔɛ tɔ́n. Làla a gbǎn taa tɔ́ɔliw ni bi joo kérigèle bee myɛ nibin nibin na í.

⁶ Amɛɛ yáriri bee sámaga n kwɔ́ɔ lè, sáriga-wòlobèle maa ni jǐn Kolocɔlɔɔ kpɔ̀ʔɔrɔli fànikpaa-fúnzelige ni làla o làla ni fáliw kpéʔele.

⁷ Kàjáa sáriga-wòlobèle kàfɔgbɔɔɔ yagana wi da ni jǐn funziin wógi ni tɔlɔgɔ nibin yɛ́ɛli fúngo ni, wi si da ni jǐn yaweele sìsyaan fun ni í, lee wi wòlo lè sáriga wi tiimaa kéeli na, n fàra lee na wi wòlo lè syɛ́ɛnbèle kapeegéle kéele na, gele be kpéʔele lè kateemɛ na.

⁸ Gee Pìicǎnni tèé lè, koro gi nyɛ lǎlee myɛ kpaaseligi kwɔ́ɔ beè lè, tɛɛcàndelegi kólogo maa wɔ́ɔ̀ pye sìnmúgu ni lǎli bee ni.

⁹ Fànikpaagi bee kéele maa pye fòto bi tɔ́ɔliw naa kéele tɛ̀ɛn. Ki kɔ́rɔw wi nyɛ yakaanyi ní sárigaw be kaangi lè Kolocɔlɔɔ ma, dee bee a gbǎn Kolocɔlɔɔ kpɔ̀ʔɔrɔfɔw fúngo sín bi foro í.

¹⁰ Níì cán kajoogèle bee maa pye céri wòʔolo, ní i nyuu yaliiri, ní yagbaari, ní lòwelidi féleye yagana kéele na, ti n kòro beè n taa n baa nan lǎli na, lee ni Kolocɔlɔɔ yáriri myɛ sámaga a di sín lè.

¹¹ Kàjáa Kirisi n baa pye sáriga-wòlobèle kàfɔlɔ yacanri fáli kéele na di nyɛ naa n kwɔ́ɔ lè. Kolocɔlɔɔ kpɔ̀ʔɔrɔli fànikpaʔa ni Kirisi báara lè, ki n kpɔ́ʔɔ níì nyɔɔ n sɔ̀lɔ wozeligi na, ki o nyɛ syɔɔn kɔ́lɔ wogbéʔelege í, gee bee n jo ki o nyɛ dulunyanw naa yakpéʔelegaa í.

¹² Sikepɔɔlɔ ní náapiiye sisyaan báriga ni ban wi da jée tɛɛcàndelegi ni í, kàjáa wi tiimaa sìsyaanw báriga ni wi jée gi ni tɔlɔgɔ nibin pée. Kánmi bee na wi bàngwɔɔ syɔɔlɔ sámaga wolo ma.

¹³ Níì cán kánmee na sikepɔɔlɔ ní náapɛʔɛlɛ sisyaan, ní náapyaa-sórigoyo cɔ́nʔɔ nyari-nyarila kpéʔele ni syɛɛn-nɔ́nʔɔbèle cére jé ni mùú ni nyɔɔgi lè,

¹⁴ ànbée Kirisi sìsyaanw a wɔ́ɔ gbǎn tɔ̀nɔ fun kapyegèle jée yirige wolo fúnyi ni bi sɔ̀lɔ, jàngó wolo í da Kolocɔlɔɔ woweew fáli kpéʔele, wi n wiyɛɛ gaan Kolocɔlɔɔ ma tɛɛlɛ fun sáriga, bàngwɔɔ Pìicǎnni báriga ni!

¹⁵ Koro na wi nyɛ joogaanvɔnni kùsuluzuluo àmɛɛ wi baa kùu lè syɛ́ɛnbèle kakolobyere kéele na, bele pe da pye lè joogaanlɛɛli làla wòolo, kánmi bee na wi gbàn n bàngwɔɔ kɔ́rigi kaan Kolocɔlɔɔ syɛɛn-yeribèle ma pe gi lìi bi yɛlɛ ní wi nyɔɔfaligi ní.

¹⁶ Níì cán wàa ga kɔrigɔ joogaanna kpéʔele, kɔriliibèle a gbǎn kɔ́rigi lìi bi joogaanni kpéʔelefɔlɔ yaʔa sìnguu ni í.

¹⁷ Joogaanna a gbǎn báriga bi li kpéʔelefɔw yaʔa sìi na í, fwɔɔ wi kùu gbɛnʔɛnɛ.

¹⁸ Gee bee gi gi kaan joogaanlɛɛli da gbàn n tɛ́ʔɛ sìsyaan fun í.

¹⁹ Koro na Mowizi da kajoodɛɛngèle myɛ joo syɛ́ɛnbèle myɛ ma gbɛnʔɛnɛ n yɛlɛ ní wi làlwaw sɛ́bɛ ní, níì fala n náapiiyi ní sikepɔbèle sìsyaan láa ní lɔ̀ʔɔ ní n fàra bàsiinyɛɛnrɛ na, ní hizɔpi tíige wára ní, n sɛ́bɛw tiimaa, ní syɛ́ɛnbèle myɛ nyari nyari,

²⁰ níì jo: «Joogaanni Kolocɔlɔɔ kpéʔele yele ma lè, loro sìsyaanw wi wee naa.»

²¹ A wi Kolocɔlɔɔ kpɔ̀ʔɔrɔli fànikpaʔa ní gi falipye-yáriri myɛ nyari nyari kannijanmi na ní sìsyaanw bee ní.

²² Bi yɛlɛ ní Mowizi làlwaw syɛ́ɛnrɛ ní, sìsyaanw a gbǎn yáriri myɛ jée mùnu, kapye nibin nibin ban í. Kapeegèle kùsulugo si a wɔ́ɔ gbǎn syɔɔ sìsyaan sìnwo í.

Kirisi sárigaw wi kapeegèle láari

²³ Koro na àmɛɛ ki da pye lè ŋàʔanaga kéele sáriga-wòlori bee í yáriri jée mùnu, toro dee di nyɛ̀ʔɛni wóro wíri lè, kánmi bee na ki da wɔ́ɔ̀ pye ŋàʔanaga kéele nyɛ̀ʔɛni tiimaa wóro í jée mùnu sáriga-wòloraa báriga ni, dee di nyɔɔ n sɔ̀lɔ lè wozeliri na.

²⁴ Níì cán tɛɛcǎngi syɔɔn kɔ́lɔ da kpéʔele lè, a gi kányɛɛgi wóʔo wíri, Kirisi ga jée gee bee ni í, kàjáa wi n jée nyɛ̀ʔɛni tiimaa ni n wiyɛɛ dɛ̀ɛn Kolocɔlɔɔ na tɔ́ɔliw ni wolo kéeli na.

²⁵ Wi ga wɔ́ɔ̀ jée nyɛ̀ʔɛni ni bi sa ra wiyɛɛ wòló sáriga tɔlɔyɔ saʔa àmɛɛ sáriga-wòlobèle kàfɔgbɔɔɔ jǐn tɛɛcǎngi ni yɛɛlɛ o yɛɛlɛ ní yaweegèle sìsyaan ní lè í.

²⁶ Ki ga maa pye nya, nlaa yaà dulunyanw sélimɛ na wi mǎà dée ra wɔʔɔ tɔlɔyɔ saʔa. Kàjáa tɔ́ɔliw ni wi n wiyɛɛ dɛ̀ɛn tɔlɔgɔ nibin dulunyanw làrigēle myɛ kwɔ́ɔmɔ na, jàngó bi kapeegèle kwɔ́ɔ, àmɛɛ wi wiyɛɛ gaan lè sáriga.

²⁷ Amɛɛ gi kɔ̀rirɔ n tímana lè syɔɔn o syɔɔn ma wi kùu tɔlɔgɔ nibin, kútiiw si náa ba joo,

²⁸ ànbée Kirisi wɔ́ɔ̀ pye sáriga tɔlɔgɔ nibin jàngó bi syɛ̀ɛnnɛ saʔa kapeegéle túgoro tugo, wi ga baa wiyɛɛ dɛ̀ɛn tɔziin wógi na, ki a ní pye kapeegèle kéele na í, kàjáa bele be wi sige ní lòmaana ní lè, poro wi a ba syɔɔ.