Heburubèle 6 - Cebaara Bible 2010

¹ Gee bee na gi yɛlɛ wo sɔ̀lɔ nya tamani syɛɛnselide na, dee di nyuu lè Kirisi kéeli na, wáā syée wozanri kurugo ti lè wogbanri, ki ga yɛlɛ wolo í ní kàpɔɔnw le kavɔn í, gee bee n jo bi kòro kàdowaari tamana yagana na tɔ̀nɔ fun kapyegèle ma í, wàlá tágali kéele Kolocɔlɔɔ na syɛ́ɛnri yagana na í,

² wàlá wolo í kòro batɛmiw féleye tamana yagana na í, wàlá kɔ́yi taʔala wólo na í, koro ga jáa kúbèle nyán-yirile, ní kwɔ́ɔmɔ fun kútiijoori wólo na í.

³ Gee bee wo a kpéʔele ní Kolocɔlɔɔ ga fɔ̀lɔ.

⁴ Bele be láʔa lè tágali na n too, syɔɔn a ní gbǎn be dɛ̀ɛmɛ be kàdoʔo wáa be kapeegèle ma í, poro bele fúnyo ni gbɛ̀ɛ́nmi da jée lè á be nyɛ̀ʔɛni yakanʔa tàanma laala n wéle, níì be lɛɛli taa Pìicǎnni ni,

⁵ níì Kolocɔlɔɔ syɛɛntaanri tàanma laala n wéle n fàra dulunyanw kakpologéle na wee wi maa lè,

⁶ ní níì láʔa tágali na n too lè, syɔɔn a ní gbǎn be dɛ̀ɛmɛ be kàdoʔo wáa be kapeegèle ma í. Níì cán pe n níì Kolocɔlɔɔ Jáaw kóri tiiparigi na peyɛɛ fúnyi ni, níì fɛ̀ɛrɛ wáa wi na syɛ́ɛnbèle nyɛ́nɛ na.

⁷ Zěgi ga ni tuun làrigēle saʔa ni tári na ti i gi gbo, á di fálafɔbèle si i yaliire taagi di ni, Kolocɔlɔɔ n ni dùbaw kpéʔele tári bee na.

⁸ Kàjáa wúuro ní solovinge ga fìin di ni, tári bee n pɛɛn, dángaw a ba too di na, ti kwɔ́ɔmi si ba pye sógulo.

⁹ Wolo wojoori bee ní ki myɛ ní, wolo syɛɛn-nidaanmabèle, wolo n tága yele na ncan yele n pɔ́rɔ n sɔ̀lɔ kánmi bee na, ní wɔ́ɔ̀ tága gi na ncan yele n syɔɔli taa n kwɔ́ɔ.

¹⁰ Níì cán Kolocɔlɔɔ o kologi í, fáliw yele kpéʔele lè n fàra tàmagi na yele tɛ̀ɛn pèle na wi mɛ́ɛgi na lè, àmɛɛ yele da ni Kolocɔlɔɔ syɛɛncanbèle dɛ̀ɛmɛ́ lè ní sèʔé i nyɛ be dɛ̀ɛmɛni na tɔ́ɔliw ni lè, wi a fɛ̀ʔɛ gee bee kàa faala na í.

¹¹ Wolo si i caa yele myɛ nibin nibin í pínɛ da ŋàʔaná gbanʔama bi taa sa nan ki kwɔ́ɔmi na, jàngó gee na yele yele sɔ̀ngumi taʔa lè, yele í ki myɛ taa.

¹² Wolo o caa yele í pye sàlagafɔɔlɔ í, bele be Kolocɔlɔɔ nyɔɔfaliyi kɔ́rigɔ lìi lè be tágali ní be kpàracogi báriga ni fwɔɔ yele í da bele bee tɛ́ɛlɛ.

Kolocɔlɔɔ nyɔɔfaligi kéele

¹³ Lǎli ni Kolocɔlɔɔ da wi nyɔ́ɔgi fàli Abirahami ma lè, wàa nikwɔɔ da pye yaà wee wi kpɔ́ʔɔ n sɔ̀lɔ woro na lè í, wee na woro da yɛlɛ bi kàli lè í, koro na wi da kàli wiyɛɛ na,

¹⁴ níì jo: «Mii a tɔ̀nɔ́ dùbaw taʔa mɔ na kányɛʔɛ ni, si wɔ́ɔ mɔ yodaʔayi yaʔa yi nɛʔɛ gbanʔama.»

¹⁵ A nyɔɔfaligi wɔ́ɔ baa foro Abirahami ma àmɛɛ wi da kpàracogo kpéʔele lè.

¹⁶ Syɛ́ɛnbèle i kɛ̀ɛ́ bele na be kpólo n sɔ̀lɔ lè poro na, kàligi mɛ̀ɛ́ nyɔɔfaligi forolo kakabalaga myɛ kwɔ́ɔ be ma.

¹⁷ Kolocɔlɔɔ si maa tɔ̀nɔ ni caa bi gi fílige tɛ̀ɛn syɛ́ɛnbèle na poro bele má woro nyɔ́ɔgi fàli lè, jàngó pe gi cán woro kakɔrirɔli a gbǎn sàa í, koro na wi kàligi fàra wi nyɔɔfaligi na,

¹⁸ jàngó yi katɛɛyi siin yi lè yi a gbǎn fàli í, Kolocɔlɔɔ si a wɔ́ɔ gbǎn finɛ yi kéeli na í, yee bee kéele í wolo kɛɛlɛ gbanʔama, wolo bele wo fàn n sáà sɔ̀ngumi tɛɛtaʔaga taa n cò níì syɔɔ lè, koro gee Kolocɔlɔɔ tɛ́ʔɛ wolo yɛ́ʔɛ ma lè.

¹⁹ Sɔ̀ngumi bee tɛɛtaʔaga n wolo fúnyi sámaga n yérige àmɛɛ bàto-yérige-tunmɔjinige nyɛ lè. Yayerigegi bee i nyɛ tágala wóʔo, níì sámaga n yére fàniw kàdoʔo ma pe pari lè Kolocɔlɔɔ kpɔ̀ʔɔrɔli kpaʔa fúngo ni, ki lè nyɛ̀ʔɛni ni,

²⁰ beè yɛɛ̀kiniw jée lè wolo kéeli na, wi lè Zyezu, woro wee wi baa pye lè kwɔ́ɔmɔ fun sáriga-wòlobèle kàfɔlɔ n yɛlɛ ní Mɛlikizedɛki félegi ní.