Heburubèle 5 - Cebaara Bible 2010

¹ Sáriga-wòlobèle kàfɔlɔ o kàfɔlɔ Kolocɔlɔɔ ga nyɛ́nɛ n wòlo lè syɛ́ɛnbèle nínge ni, wi n wi télege be kéeli na waa woro fáliw kpéʔele, koro ga pye bàā yakaanyi kaangi, si wɔ́ɔ ra sárigaw wóo be kapeegèle kéele na.

² Amɛɛ wi tiimaw nyɛ lè fànʔa fun, koro na bele be nyɛ lè kanaa-sìnjánbéle ní i pùuní lè, wi a wɔ́ɔ gbǎn ra bele bee dɛ̀ɛmɛ́.

³ Gee bee na wi yɛlɛ waa sárigaw wóo wi tiimaa kapeegèle kéele na bi fàra syɛ́ɛnbèle wòʔolo na.

⁴ Syɔɔn faala a gbǎn jée kpɔɔmɔ fáliw bee ni wiyɛɛ ma í, fwɔɔ Kolocɔlɔɔ ga wee yeri lè, àmɛɛ wi da Aarɔn yeri lè.

⁵ Anbée Kirisi da wɔ́ɔ̀ pye, woro ban wi da wiyɛɛ gbɔ́ʔɔ n pye sáriga-wòlobèle kàfɔlɔ í, kàjáa Kolocɔlɔɔ wi da wi kpéʔele sáriga-wòlobèle kàfɔlɔ, woro wee wi da gi joo wi ma lè níì jo: «Mɔ wi nyɛ mii Jáaw, mii wi mɔ see níjanʔa.»

⁶ Kánmi bee na wi wɔ́ɔ̀ gi joo sɛ́bɛw tɛ́ɛgaa ni níì jo: «Mɔ i nyɛ sáriga-wòloo làla o làla n yɛlɛ ní Mɛlikizedɛki félegi ní.»

⁷ N Kirisi yaʔa sìi na wi céri ni, wi maa Kolocɔlɔɔ nyɛ́ɛri gbanʔama, níì gi cán wi a gbǎn woro syɔɔ kùúw ma. Wi maa wi nyɛ́ɛri ní yákpowáara, ní nyatinmɛ ní, a Kolocɔlɔɔ wi nyɛ́ɛrigi lóʔo àmɛɛ wi fɛ̀ɛgí lè woro na.

⁸ Amɛɛ wi wírē nyɛ lè Jaafɔw, wɔʔɔyi yi too wi na lè, yoro n wi tama a wi gi cán àmɛɛ gi yɛlɛ lè woro í da lúro Kolocɔlɔɔ ma.

⁹ Amɛɛ si Kolocɔlɔɔ wi sámaga n foro lè, a wi baa pye bàngwɔɔ syɔɔlɔ sábabu bele myɛ ma be lúro wi ma lè.

¹⁰ Kolocɔlɔɔ n wi nyɛ́nɛ n wòlo n kpéʔele sáriga-wòlobèle kàfɔlɔ n yɛlɛ ní Mɛlikizedɛki félegi ní.

Sàmina, bi wo syɔɔ tágali céele kagbanna ma

¹¹ Syɛɛnrɛ saʔa i nyɛ wolo ma bi joo kéeli naa na, dee kɔ́rɔ wi a cánma bɛɛn yele ma lè, àmɛɛ yele líiweegèle baa pɛɛn lè.

¹² Níì cán nlaa yaà làridɔɔnnɔ ni yele maa yɛlɛ bi dée pye tamafɔɔlɔ bi kwɔ́ɔ, kàjáa a yele náà séli n pye wàa í da yele tama Kolocɔlɔɔ syɛ́ɛnri tamazelile na, yele láa sèʔé i nyɛ yiremɛ na, yaliinirire na ban í.

¹³ Syɔɔn o syɔɔn si wi yíremi ŋɔri lè, wee bee ga kɔ́ɔ̀ sínni syɛ́ɛnrɛ cán n wàli í, níì cán wi i nyɛ pyà.

¹⁴ Kàjáa yaliiniriri i nyɛ wolɛɛbèle wóro, poro bele be tàli lè gi na ni peyɛɛ sɔ̀nguri kɔ̀rɔsíi koro ga pye bàā sínni ní kolomi cángi da láʔala.