Heburubèle 3 - Cebaara Bible 2010

Zyezu n kpɔ́ʔɔ n sɔ̀lɔ Mowizi na

¹ Gee bee na, mii senyɛnjǎnbèle, yele bele Kolocɔlɔɔ wɔ́ɔ̀ yeri lè, ki n yɛlɛ ye yele sɔ̀ngumi myɛ taʔa Zyezu na, woro wi nyɛ pìitunw ní sáriga-wòlobèle kàfɔlɔ wolo tágali kéele na, lee wo nyuu ni tèé lè.

² Wi maa pye tágala syɔ́ɔn Kolocɔlɔɔ ma woro wee wi nyɛ lè wi télegefɔw, àmɛɛ Mowizi da wɔ́ɔ̀ pye lè tágala syɔ́ɔn Kolocɔlɔɔ kpáagi tɛ́ɛyɛ myɛ ni lè.

³ Amɛɛ kpaafaaɔn kpɔ́ʔɔri nɛʔɛ n sɔ̀lɔ lè kpáagi wóro na, gee wi faan lè, ànbée Kolocɔlɔɔ Zyezu córo wi n yɛlɛ ní kpɔʔɔrɔ ní n sɔ̀lɔ Mowizi na.

⁴ Níì cán kpaʔa o kpaʔa mɔ nyaa lè, syɔɔn wi gi faan. Kàjáa wee si wi yáriri myɛ faan lè, woro wi nyɛ Kolocɔlɔɔ.

⁵ Mowizi maa pye tágala syɔ́ɔn Kolocɔlɔɔ kpáagi tɛ́ɛyɛ myɛ ni, wi maa pye falipyeo, ni séeraw kpéʔele kérigèle na, gele Kolocɔlɔɔ a kɔ́ ba joo lè.

⁶ Kàjáa Kirisi i nyɛ Jaafɔlɔ, wi i nyɛ tágala syɔ́ɔn Kolocɔlɔɔ kpáagi nyúngo na. Wolo si i nyɛ wi kpáagi, kapye wolo n tágali sámaga n cò, ní i nyɔ̌ngbɔɔlɔ táanri wolo sɔ̀ngumi tɛɛtaʔaga báriga ni.

Ŋɔ́ndaali li yaʔa Kolocɔlɔɔ syɛ́ɛnbèle ma lè

⁷ Gee bee na Pìicǎnni da ni syɛ́ɛnri naa nyuu níì jo: «Yele ga wi yákpoli lóʔo níjanʔa,

⁸ ki ga yɛlɛ yele í kɔ́ yele fúnyi gbàn àmɛɛ pe da gi kpéʔele céemi làla ni lè í, cángee na pe da mii pye n wéle lè fìími tára ni,

⁹ lǎli ni yele tóolɛɛbèle da ni mii pingi ni wéle lè ní i mii kapyegèle nyaagi,

¹⁰ pe n koro kpéʔele yɛ̀ʔɛlɛ togoye siin nínge ni. Koro na mii fúngi da tanʔa lǎli bee syɛ̀ɛnnɛ kurugo, a mii jo: Pe funzɔngumi i be léeli mii na làla o làla, pe ga mii kérigèle cán í.

¹¹ Koro na mii kàli mii fundanʔari làla ni níì jo: Pe a tée jée mii ŋɔ́ndaali ni nyáana í.»

¹² Yaa kɔ̀rɔsíi, ni senyɛ̀nnɛ, koro ga pye sìndagali sɔ̀ngubeere a kɔ́ jée yele wàa faala ni bi wi láʔa Kolocɔlɔɔ woweew na í.

¹³ Kàjáa ki n yɛlɛ yele í da yeyɛɛ kɛɛlɛ canʔa o canʔa àmɛɛ Kolocɔlɔɔ lǎli naa yiri lè Níjanʔa, koro ga pye yele wàa faala a kɔ́ gi yaʔa kapeelaa í wi fáana pùuni wi zɔ̌nw í nìri kapeeli bee báriga ni í.

¹⁴ Níì cán tágali li da sélì pye wolo ma lè, wolo ga li sámaga n cò n taa n sáà nan gi kwɔ́ɔmi na, wolo i nyɛ Kirisi pínɛnyɛ̀nnɛ,

¹⁵ àmɛɛ gi joo lè níì jo: «Yele ga Kolocɔlɔɔ yákpoli lóʔo níjanʔa, ki ga yɛlɛ yele í kɔ́ yele zɔ̌nbèle nìri àmɛɛ pe da gi kpéʔele céemi làla ni lè í.»

¹⁶ Bɛ̀lɛ́ pe da wi yákpoli lóʔo níì cée? Bele myɛ Mowizi da yirige lè Ezyipiti ni, poro ban ì?

¹⁷ Bɛ̀lɛ́ kurugo Kolocɔlɔɔ da ni wi fúngi taanri fwɔɔ n baa taa yɛɛgéle togoye siin? Bele pe da ni kapeegèle kpéʔele lè ní i tuun ni kúu fìími tára ni lè, poro ban ì?

¹⁸ Ba bɛ̀lɛ́ má wi da kàli n kaan níì jo pe a jée woro ŋɔ́ndaali tɛ́ʔɛ ni í, kapye syɛɛnceebèle bee má ban í?

¹⁹ A wolo wɔ́ɔ̀ gi nyaa pe sìndagali báriga ni pe da gbàn n jée li ni í.