Heburubèle 2 - Cebaara Bible 2010

Syɔɔli li tɔ̀nɔ n kpɔ́ʔɔ lè

¹ Gee bee na dee wolo lóʔo lè, ki n yɛlɛ wolo í di sámaga cò gbanʔama, jàngó wolo a kɔ́ canʔana di na í.

² Níì cán syɛ́ɛnree nyɛ̀ʔɛni tundunbéle da baa joo lè, ti maa tɔ̀nɔ n pye báriga syɛ́ɛnrɛ, bele be di faʔa lè, ní bele be di cée lè, a bele bee wɔʔɔli taa n yɛlɛ ní be taaganmi ní,

³ koro na wolo ga syɔɔli faʔa li lè wodeeli, mɛ̀ɛ́ wolo a syɔɔ wɔʔɔli ma bi sɛ́ɛ? Kàfɔw wi sélì syɔɔli bee kéele joo, á wi syɛɛnloʔobèle náà gi tɛ̀ɛn wolo na níì jo li i nyɛ kányɛʔɛ.

⁴ A Kolocɔlɔɔ wi séeraw fàra be syɛ́ɛnri na, ní fɛ̀ɛbēle, ní bìngaara kele, ní kakpoloyo féleye saʔa ní, wi si maa wɔ́ɔ ni Pìicǎnni yakaanya kaangi ni yɛlɛgi ní wi kínidɛnɛgi ní.

Wee wi maa ní syɛ́ɛnbèle ní syɔɔli ma lè

⁵ Dulunyanwee wi maa lè, wee kéele wolo nyuu lè, Kolocɔlɔɔ da wi kaan nyɛ̀ʔɛni tundunbéle ma paa wi kàragí í.

⁶ Wàa si maa séeraw naa kpéʔele Kolocɔlɔɔ syɛɛnsɛbɛri tɛ́ɛgaa ni níì jo: «Syɔɔn wi nyɛ nyàʔá, koro si mɔ kaan mɔ í da sɔ̀ngí da taagi wi na? Ba syɔɔn pya wi nyɛ nyàʔá, koro si mɔ kaan mɔ í da wi kɔ̀rɔsíi?

⁷ Mɔ maa wi cɛ́rɛ n sɔ̀lɔ nyɛ̀ʔɛni tundunbéle na n làla cɛɛri kwɔ́ɔ, koro kàdoʔo ma a mɔ nijanri ní kpɔ́ɔmi pye wi fànʔafɔ-nyùndɔnni.

⁸ Mɔ n yáriri myɛ cáan wi tɔ́lɔyi láara ni.» Amɛɛ Kolocɔlɔɔ yáriri myɛ le wi kɔ́yi ni kánmi bee na lè wi ga yafyɛn yaʔa sìnle wi kɔ́yi ni í. Kàjáa wolo ga kɔ́ɔ̀ gi nyaa a yáriri myɛ le wi kɔ́yi ni n kwɔ́ɔ í.

⁹ Wolo si i Zyezu nyaagi, woro wee Kolocɔlɔɔ da cɛ́rɛ lè n sɔ̀lɔ nyɛ̀ʔɛni tundunbéle na làla cɛɛri ni, jàngó wi kùu syɔɔn o syɔɔn kéeli na bi yɛlɛ ní Kolocɔlɔɔ kpɔ́ʔɔri ní. Wolo i wi nyaagi ní nìjangbɔɔrɔ, ní kpɔɔmɔ ní àmɛɛ fànʔafɔ-nyùndɔnnɔ nyɛ lè, lee wi taa wi wɔʔɔguuli báriga ni lè.

¹⁰ Wee si wi yáriri myɛ kpéʔele lè ní wɔ́ɔ i di kɔ̀rɔsíi, àmɛɛ ki da yɛlɛ wi Zyezu sámaga foro wɔʔɔguuli báriga ni lè, koro na wi gi kpéʔele kánmi bee na koro ga pye bi pìinɛʔɛbéle taa lége nìjangbɔɔri ni, Zyezu bárigaw ni wi nyɛ lè be syɔɔli sélifɔlɔ.

¹¹ Níì cán wee wi be jé ni mùú ni yaari Kolocɔlɔɔ ma lè, ní bele wi jé ni mùú lè, bele bee myɛ i nyɛ narigbaʔa nibin wòolo. Gee bee na fɛ̀ɛrɛ ga Zyezu taa bàā be yiri woro senyɛ̀nnɛ í,

¹² lǎli ni wi joo lè: «Mii a mɔ mɛ́ɛgi tɛ̀ɛn mii senyɛnbèle na, mii a ra mɔ kpɔ̀ʔɔrɔ́ syɛɛnkpoʔolomi nínge ni.»

¹³ Ní níì jo: «Mii a mii sɔ̀ngumi taʔa Kolocɔlɔɔ na.» Ní wɔ́ɔ̀ jo: «Mii wéle wee ní pìíbèle ní, bele Kolocɔlɔɔ kaan mii ma lè.»

¹⁴ Amɛɛ pìíbèle nyɛ lè sìsyaan ní cere, koro na wi tiimaa wɔ́ɔ baa pye kánmi bee wonijanma na, níì kùu jàngó woro kùúw báriga ni woro í kùúw fɔ́lɔ jáa wi lè Dàzɔɔnw,

¹⁵ bele myɛ pe da pye lè kùúw fyáara púloro ni pe sìíw làla myɛ ni, si bele bee yirige púlori ni.

¹⁶ Níì cán nyɛ̀ʔɛni tundunbéle ban wi dɛ̀ɛmɛ́ í, fwɔɔ Abirahami yòdaʔayi wi dɛ̀ɛmɛ́.

¹⁷ Koro na àmɛɛ ki da pye lè ŋàʔanaga kéele wi pye sèjira ní wi senyɛnbèle ní kánmi myɛ na, a wi wɔ́ɔ baa pye nya, jàngó bi pye nyinimɛ sáriga-wòlobèle kàfɔlɔ ní tágala syɔ́ɔn Kolocɔlɔɔ fáliw ni, koro ga pye bàā kùsulugo kpéʔele syɛ́ɛnbèle kapeegéle kéele na.

¹⁸ Níì cán àmɛɛ Sutanaw wi tiimaw kárima lè a wi wɔʔɔ, gee bee na wi a gbǎn ra be dɛ̀ɛmɛ́ bele Sutanaw kárima lè.