Heburubèle 13 - Cebaara Bible 2010

Tánʔaganmi bi Kolocɔlɔɔ dɛ́nɛ lè

¹ Ki n yɛlɛ senyɛnnɛgi tàmaga í pye yele níngi ni.

² Ki ga yɛlɛ yele í fɛ̀ʔɛ nibɔndirigeri na í, níì cán kánmi bee na pèle da nyɛ̀ʔɛni tundunbéle nibɔnrɔ pye, n gi yaʔa pe ga be cán í.

³ Ki n yɛlɛ yaa sɔ̀ngí yaa taagi kàsolebèle kéele na, gi pye mɔ a jo pe n yele pínɛ n le kàsow ni ní be ní, bele be wɔʔɔ lè, ki n yɛlɛ yaa sɔ̀ngí yaa taagi be kéeli na, àmɛɛ yele wɔ́ɔ̄ nyɛ lè syɛ̀ɛnnɛ.

⁴ Ki n yɛlɛ cèpɔrigi kéele í kpɔ́ʔɔ yele myɛ ma, ki yasinɛgi si pye fɔɔnrɔ fun. Níì cán Kolocɔlɔɔ a ba kútiiw kúun kanɔnʔɔbyebèle, ní ceyuubèle, ní nànyuubèle na.

⁵ Ki ga yɛlɛ yele í yeyɛɛ daʔa wáliw tàmaga na í. Yáriree yele taa lè, ki n yɛlɛ dee bee í yɛlɛ ní yele ní, níì cán Kolocɔlɔɔ tiimaa n gi joo níì jo: «Mii a tée mɔ yaʔa í, mii a mɔ wáa kàdoʔo ma nyáana í.»

⁶ Koro na wolo a gbǎn gi joo ní nànzorodo ní si jo: «Kàfɔw wi nyɛ mii dɛ̀ɛmɛfɔw, mii a tée fyáa í. Nyàʔá syɔɔn a gbǎn kpéʔele mii na?»

⁷ Ki n yɛlɛ yaa sɔ̀ngí yaa taagi yele yɛɛ̀kini-zélibèle kéele na, poro bele pe da ni Kolocɔlɔɔ syɛ́ɛnri nyuu yele ma lè. Yaa sɔ̀ngí be tánʔaganmi kéele na, ní àmɛɛ be kwɔ́ɔmi baa pye lè, yáā be tágali tɛ́ɛlɛ.

⁸ Zyezu Kirisi i nyɛ kanijanma na cànʔaniw yoo, níjanʔa yoo, fwɔɔ làla o làla.

⁹ Ki ga yɛlɛ ye gi yaʔa pe kɔ yele fáana pùuni ní tama-nibɔngèle kèle nikwɔɔlɔ félege ní í, ki n yɛlɛ yele zɔ̌nbèle í nìri Kolocɔlɔɔ kpɔ́ʔɔri báriga ni, ki ga yɛlɛ gi pye yaliifeleraa báriga ni í. Níì cán bele pe da ni zɔ̀nniriw caa lè yaliifeleraa báriga ni, pe ga tɔ̀nɔ taa gee bee ni í.

¹⁰ Sáriga-wòlo-yafanʔa i nyɛ wolo ma, bele be Kolocɔlɔɔ kpɔ̀ʔɔrɔli fànikpaʔa fáli kpéʔele lè, tànʔa o nyɛ bele bee ma be lìi yafaangi bee sáriga na í.

¹¹ Níì cán sáriga-wòlobèle kàfɔlɔ ga yaweegèle wòlo sáriga kapeegèle kéele na, wi n ge sìsyaanw lége fànikpaagi tɛɛcàndelege ni, ní sáà ge káari sórigo syɛ́ɛnbèle tɛɛkòrogo kàdoʔo ma.

¹² Gee bee na Zyezu da wɔ́ɔ sáà wɔʔɔ n kùu kěgi kàdoʔo ma, jàngó bi syɛ́ɛnbèle jée mùnú yaʔa Kolocɔlɔɔ ma wi tiimaa sìsyaanw báriga ni.

¹³ Koro na gi yɛlɛ wolo í yiri bàā syée wi ma kěgi kàdoʔo ma, wi faʔari félege í wɔ́ɔ sa too wolo na.

¹⁴ Níì cán kàʔa o nyɛ naa nɛɛ wolo ma tári na gee ki a kòro beè lè làla o làla í, kàjáa gee gi maa lè, koro wolo caa.

¹⁵ Gee bee na gi yɛlɛ wolo í da Kolocɔlɔɔ kpɔ̀ʔɔrɔli sáriga wóo bàā kaangi wi ma làla o làla Zyezu bárigaw ni, sárigaw bee wi nyɛ wolo í da séeraw kpéʔele Kolocɔlɔɔ mɛ́ɛgi kéele na ní wolo nyɔɔsyɛɛnri ní.

¹⁶ Ki si ga yɛlɛ yele í fɛ̀ʔɛ kacànbyeri na í, wàlá bàā tàa wóo yele kɔ́lɔ yáriri ni bàā kaangi syɛ́ɛnbèle ma, ki ga yɛlɛ yele í fɛ̀ʔɛ gee bee na í, níì cán sáriga-wòlori bee félege di Kolocɔlɔɔ dɛ́nɛ.

¹⁷ Ki n yɛlɛ yaa lúro yele yɛɛ̀kinibèle ma, yé yeyɛɛ gaan be ma. Níì cán pe i nyɛ yele pìígèle kɔ̀rɔsiifɔɔlɔ, poro Kolocɔlɔɔ a kɔ́ ba yíbe ge kéeli na. Ki n yɛlɛ yaa lúro be ma jàngó paa be fáliw kpéʔele ní fundaanra ní, ki ga yɛlɛ paa wi kpéʔele ní funbɛɛnrɛ ní í, gee bee a pye tɔ̀nɔ fun yele ma.

¹⁸ Ki n yɛlɛ yaa nyɛ́ɛri wolo kéeli na, níì cán wolo n tága gi na ncan wolo fúnyi n fílige, wolo i caa wolo tánʔaganmi í nyɔɔ kàbanyi myɛ na.

¹⁹ Mii i yele nyɛ́ɛri gbanʔama, níì jo ki n yɛlɛ yele í da Kolocɔlɔɔ nyɛ́ɛri jàngó wi wári mii lúrugo tórigo yaà yele ma.

Nyɛ́ɛrigɛ

²⁰ Kolocɔlɔɔ wi nyɛ lè fûnnyingi kaanfɔlɔ, woro wee wi wolo Kàfɔw Zyezu nyán n yirige kúbèle nínge ni lè, jàngó wi pye bǎbèle nàʔafɔgbɔɔɔ kwɔ́ɔmɔ fun joogaanni sìsyaan báriga ni,

²¹ ki n yɛlɛ wi fànʔa kaan yele ma jàngó yele í gbǎn ra kapyejǎngèle féleye myɛ kpéʔele bi yɛlɛ ní wi nyɛnɛ kéeli ní, si wɔ́ɔ wi kanidaanni kpéʔele wolo fúnyi ni Zyezu Kirisi bárigaw ni, woro wee na nìjangbɔɔri yɛlɛ lè làla o làla kwɔ́ɔmɔ fun! Amiina!

Syɛɛnsanri ní fòów kéele

²² Mii si i yele nyɛ́ɛri ni senyɛ̀nnɛ, syɛ́ɛnri naa ní mii yele kɛɛlɛ lè, ye di kpàraco. Níì cán syɛɛnkperire mii sɛ́bɛ n tórigo yele ma.

²³ Ki n yɛlɛ ye gi cán pe n wolo senyɛnw Timɔte yirige kàsow ni. Wi ga wári n pan naa mii ma, mii ní wi ní wolo a pínɛ kári yaà sa yele wéle.

²⁴ Ki n yɛlɛ ye yele yɛɛ̀kinibèle myɛ syáanri yaà, n fàra Kolocɔlɔɔ syɛɛncanbèle myɛ na. Italii tári tágafɔɔlɔ n yele syáanri.

²⁵ Ki n yɛlɛ Kolocɔlɔɔ í kpɔ́ʔɔri kaan yele myɛ ma!