Heburubèle 12 - Cebaara Bible 2010

Kolocɔlɔɔ wi lè wolo Tóow

¹ Gee bee na, àmɛɛ séerafɔ-nɛʔɛbèle bee wolo màʔa àmɛɛ fàfanʔa nyɛ lè, ki n yɛlɛ wolo í wɔ́ɔ yáriri myɛ yaʔa, dee ti a gbǎn wolo yérige lè, kapeele o kapeele li tàli wolo na ni wolo yéregi lè, wo wɔ́ɔ lee bee yaʔa, wáā kàfyaali kpéʔele ní kpàracogo ní, lee tɛɛfǎn-zɔ̀lɔgɔ Kolocɔlɔɔ tɛ̀ɛn wolo na lè.

² Ki n yɛlɛ wolo í wolo nyapiigèle le Zyezu ni wi lè wolo tágali sélimɛfɔlɔ ní li forofɔw. Amɛɛ wi nyɛnɛ da pye lè fundaanri na, dee Kolocɔlɔɔ da tɛ́ʔɛ wi yɛʔɛ̀ ma lè, koro na wi kpàraco níì kùu tiiparigi na, wi ga gi córo fɛ̀ɛrɛ kéele í, koro kàdoʔo ma a wi sáà tɛ́ɛn Kolocɔlɔɔ fàngoli kàliige ma.

³ Woro wee wi tɔ̀nɔ n kapeebyebèle kàkabalaya saʔa kpàraco lè, àmɛɛ pe da ni wi tiimaw kábala lè, ki n yɛlɛ yele í da sɔ̀ngí da taagi wi kéeli na, jàngó yele a kɔ́ fɔ̀rɔ yele fúnyi ni yele bárigaw si kwɔ́ɔ í.

⁴ Amɛɛ yele túngu lè ní kapeegèle ní, yele ga kɔ́ɔ̀ yére n ge sige n baa nan sìsyaan wolo na í.

⁵ Yele n fɛ̀ʔɛ kɛɛlɛli syɛ́ɛnrɛ na, ti joo yele ma lè àmɛɛ jaafɔɔlɔ nyɛ lè níì jo: «Ni pyà, Kàfɔw ga mɔ kpúmɔn, ki ga yɛlɛ mɔ í kpúmɔnri bee faʔa í, lǎli ni wi fúlo mɔ na lè, ki ga wɔ́ɔ̀ yɛlɛ mɔ bárigaw í kwɔ́ɔ í.

⁶ Níì cán Kàfɔw i wi syɛɛn-nidaanmabèle kpúmɔn ni kàragí, pìíbèle myɛ be nyɛ wi ma lè, wi i be kpúmɔn ni kàragí ní sapile ní.»

⁷ Ki n yɛlɛ yele í wɔʔɔli kpàraco, Kolocɔlɔɔ i yele náari àmɛɛ tofɔlɔ wi jàala náari lè. Níì cán jaafɔwìí wi nyɛ wi tóow o wi kpúmɔn ni kàragí í?

⁸ Kpúmɔnganmee na si be jaafɔbèle myɛ kpúmɔn ni kàragí lè, yele ga fɔ̀n kpúmɔnri bee ni, ye gi cán yele i nyɛ kanɔnʔɔrɔ piibéle, jaafɔ-tèlebēle ban yele nyɛ í.

⁹ Amɛɛ si gi lè bele be nyɛ lè wolo tóobèle dulunyanw naa ni, pe maa ni wolo kpúmɔn, a wolo i lúro be ma, wolo si ga yɛlɛ wolo í da lúro pìígèle Tofɔlɔ ma bi sɔ̀lɔ jàngó wolo í sìi taa ì?

¹⁰ Níì cán wolo tóobèle maa ni wolo kpúmɔn ni kàragí n làla cɛɛri kwɔ́ɔ, àmɛɛ ki da sín be ma lè. Kàjáa Kolocɔlɔɔ i wolo kpúmɔn ni kàragí wolo nyɔɔmi kéele na, koro ga pye wolo í lɛɛlɛ taa woro sínni ni.

¹¹ Wɔʔɔlaa faala tɔ̀nɔ́ o nyɛ fundaanra kéele li làrigbeʔeleli ni í, fwɔɔ funbɛɛnrɛ kéele. Kàjáa bele be ga sícilimɛ taa lè wɔʔɔli báriga ni, li kàdogi n baa be kaan pe n ni kasingéle kpéʔele yɛɛ̀nyinge na.

Láliiw wi joo n kaan lè ní sàmina syɛ́ɛnrɛ

¹² Gee bee na gi yɛlɛ ye nìrimɛ le kɔ́yi ni yi fɔ̀rɔ lè, ní fànʔa fun yégunyi ni.

¹³ Ye wɔ́ɔ yaa yele tɛɛsɔ̀lɔyi sámagi yaa síngi, koro ga pye tɔyaagi fɔ́lɔ yáama a kɔ́ tanʔa í, fwɔɔ wi pɔʔɔ.

¹⁴ Ki n yɛlɛ ye ŋàʔana ye pye bɛ̀ɛlɛ na ní syɛ́ɛnbèle myɛ ní, yé wɔ́ɔ pye funviire na, níì cán syɔɔn faala a gbǎn Kàfɔw nyaa funviiri kàdoʔo ma í.

¹⁵ Ki n yɛlɛ yaa kɔ̀rɔsíi koro ga pye syɔɔnwaa faala a kɔ́ kólogo Kolocɔlɔɔ kpɔ́ʔɔri kurugo í. Ye wɔ́ɔ yaa kɔ̀rɔsíi koro ga pye yasanzorodo tíige a kɔ́ fìin yele níngi ni bi yele fúnyi curugo si wɔ́ɔ yele saamaw nɔ́nʔɔ í.

¹⁶ Yaa kɔ̀rɔsíi koro ga pye kanɔnʔɔbyeo, wàlá Kolocɔlɔɔ yɛ́ʔɛnaa-sìnvyaaɔ a kɔ́ pye yele níngi ni í, àmɛɛ Ezau da pye lè, woro wee wi wi tiimaa kɔ́rigi pára lè tɔlɔgɔ nibin lìile kéele na.

¹⁷ Yele n gi cán gee bee kàdoʔo ma wi maa ni caa woro í dùbaw kɔ́rigɔ lìi, a wi tóow cée, àlí wi maa ni gi caa gbanʔama ní nyatinmɛ ní, wi si ga kanmaa taa n wi tóow fúngo kàriga í.

¹⁸ Nyanbelegee na syɔɔn a gbǎn tánga lè, koro gee ki da ni sóori lè, nyanbelegi bee na ban yele nùuni í, yele ga wɔ́ɔ̀ nùuni yébilimi, wàlá nyɛ̀ʔɛwɔɔli, wàlá káfalakpɔɔgi na í,

¹⁹ wàlá búruw wìimɛ, wàlá syɛ́ɛnri joomɔ na í, joomi bee lóʔofɔɔlɔ maa Mowizi nyɛ́ɛri níì jo, ki ga yɛlɛ syɛɛnkanbilaa í ní taʔa dee bee na poro ma í.

²⁰ Níì cán kéelee Kàfɔw da joo n gbàn be ma lè, pe fanʔa da pye li na í, wi maa jo: «Alí yaweelaa ga tánga nyanbelegi na, ki n yɛlɛ pe li wábagi be kpóo.»

²¹ Amɛɛ kéeli bee nyaana da tɔ̀nɔ n pye lè fyáakpɔɔrɔ, koro na Mowizi da gi joo níì jo: «Mii i fɛ̀ɛgí gbanʔama ní i cɛ̀lɛ́.»

²² Kàjáa yele n nùuni Siyɔn nyanbelegi, ní Kolocɔlɔɔ woweew kèkpɔʔɔ na ki lè Zyerusalɛmi, gee gi nyɛ lè nyɛ̀ʔɛni ni, ní nyɛ̀ʔɛni tundunnɛʔɛmɛ na.

²³ Yele n nùuni fundaanra syɛɛnkpoʔolomɔ na, ní booma wozelizeebèle Egilizi na, poro bele mɛ́ɛyɛ yi sɛ́bɛ lè nyɛ̀ʔɛni ni. Yele n nùuni Kolocɔlɔɔ na wi lè syɛ́ɛnbèle myɛ kútiijooo, ní syɛɛnsinbèle pìigēle na, bele be nyɔɔ n foro lè.

²⁴ Yele n nùuni Zyezu na wi lè Kolocɔlɔɔ joogaanvɔnni sámagafɔlɔ, ní wi sìsyaanw na, wee be nyari nyari lè, wee syɛ́ɛnrɛ di tɛ́nɛ n sɔ̀lɔ lè Abɛli sìsyaanw wóro na.

²⁵ Ki n yɛlɛ yaa kɔ̀rɔsíi koro ga pye wee wi nyuu yele ma lè, yele a kɔ́ wi cée í. Níì cán wee wi da ni syɛ́ɛnbèle sàmí lè tári na, bele pe da wi syɛ́ɛnri cée lè, kapye bele bee ga syɔɔ wɔʔɔli ma í, wee wi nyɛ lè nyɛ̀ʔɛni ni, ní i wolo sàmí lè, wolo ga kàdoʔo wáa wee bee ma, mɛ̀ɛ́ wolo a gbǎn syɔɔ bi sɛ́ɛ?

²⁶ Lǎli bee ni wi yákpoli maa tári cúngo, kàjáa tɔ́ɔliw ni wi n gi joo níì jo: «Mii a ní tári cúngo tɔlɔgɔ nibin, kàjáa tári yagana ban mii a cúngo í, fwɔɔ mii í wɔ́ɔ nyɛ̀ʔɛni cúngo.»

²⁷ Amɛɛ wi gi joo lè níì jo: «Tɔlɔgɔ nibin,» gee bee n gi tɛ̀ɛn ncan yakpéʔeleree di cúngo lè, toro a kwɔ́ɔ koro ga pye dee di nyɛ lè ti a gbǎn cúngo í, toro si kòro beè.

²⁸ Gee bee na gi yɛlɛ waa bariga kaangi Kolocɔlɔɔ ma, àmɛɛ wolo a fǎngi taa lè, gee gi nyɛ lè ki a gbǎn cúngo í, wáā báara wi ma ní sínnɛ ní, n fàra wi yɛ́ɛgi fyáara na, bi yɛlɛ ní wi kínidɛnɛgi ní.

²⁹ Níì cán wolo Kolocɔlɔw i nyɛ naà, gee gi yáriri sórogi lè mɛnɛ mɛnɛ.