Habakuki 3 - Cebaara Bible 2010

Habakuki nyɛ́ɛrigi ní Kolocɔlɔɔ dɛ̀ɛmɛni

¹ Kanyaajoow Habakuki nyɛ́ɛrigi, kùu nyɛnigɛ pyeganma na.

² Yawe, mii n mɔ kapyegèle kéele lóʔo, fyáara n mii cò, Yawe, mɔ kapyeli yɛ́ʔɛ ma, li foro yɛ́ɛgèle fúngo ni! Li yaʔa li cán yɛ́ɛgèle fúngo ni! Kàjáa n mɔ yaʔa mɔ fundanʔari fúngo ni, sɔ̀ngi mi taa mɔ nyinidaari kéele na.

³ Kolocɔlɔɔ n yìri Teman ma ni maa, wojanw n yìri Paran nyanbelegi ma ni maa. Ŋɔ́ndaala Wi kpɔ́ɔmi n nyɛ̀ʔɛgèle tɔ́n, tári n nyìn wi sòololi na.

⁴ Wi gbɛ̀ɛ́nmi i daragi àmɛɛ cángi làla wómɔ nyɛ lè. Gbɛ̀ɛnmɛ darigala i yìrigí wi kɔ́gi ma. Nɛɛ bee wi fǎngi làra!

⁵ Káfalagi yáama i syée wi yɛʔɛ̀ ma, nyínmi yáama i syée wi nyɔ̌ngèle ni.

⁶ Wi i yèré céri ní i tári tímana, wi i wéle, níì syɛɛnfeleyi kaan a yi i foo ni yegi. Bàngwɔɔ nyanbeleyi i yìrigí yi tɛ́ɛyi ni, booma dandamayi i pegi ni tíri, n fàra booma kóbiigèle na.

⁷ Mii n Kusyan fànikpaayi nyaa wɔʔɔgi ni, Madyan tári tɛɛkòroyo i cɛ̀lɛ́.

⁸ A Yawe fúngi tanʔa lé cábiyi kurugo? Cábiyi kurugo lé mɔ fundanʔari cò naà? Sólomi lɔ̀ʔɔ kurugo lé mɔ fúngi yìri, fwɔɔ á mɔ kànʔâ lúgu mɔ syɔ́ɔnyi na, ní mɔ fandaari kapɛɛnkpumɔn-wòtorobéle na?

⁹ Mɔ sedegi n múgu n yaʔa, mɔ kaliyi yi nyɛ mɔ syɛ́ɛnri ŋáaya. Ŋɔ́ndaala Mɔ i cábiya téeri ni tári yabala.

¹⁰ Nyanbeleyi i mɔ nyaagi a yi i cɛ̀lɛ́, lòkpɔʔɔ n kabi ni sɔ̀lɔ́, weecurugi i gi yákpoli wáa li i lúro, ní i gi kɔ́yi yìrigí ǹjogi ni.

¹¹ Cángi ní yégi i yèré tɛɛnijangi ni mɔ ŋáayi gbɛ̀ɛnmɛ na yi syée lè, ní mɔ tabaaw gbɛ̀ɛnmɛ darigala na.

¹² Mɔ i tári nyaari ni forogi ní fundanʔagbɔɔrɔ ní, mɔ fundanʔaratɔw i syɛɛnfeleyi tɔ́nʔɔnɔ.

¹³ Mɔ n yiri bi mɔ syɛ́ɛnbèle syɔɔ, bi mɔ wonyɛnɛ-wòlow syɔɔ. Mɔ i syɛɛnpeew kpaʔa ǹjoʔomaw jee, mɔ i gi kálagi fwɔɔ ni nangi nɔ́tɛ̄ɛnni na. Ŋɔ́ndaala

¹⁴ Mɔ i wi kùndigibèle ŋáaya tiimaa téeri ni be nyúnyi fúrugu, pe i yìrigí àmɛɛ káfalakpɔʔɔ nyɛ lè koro ga pye bi mii tɔ́nʔɔnɔ, ní i fundaanra yákpogéle wáa, a gi pye mɔ a jo a be foomɔfɔw káa n kwɔ́ɔ wii làrama ni.

¹⁵ Mɔ n kologo sámaga mɔ syɔ́ɔnyi ma sólomi lɔ̀ʔɔ ni, sólomi lɔ̀ʔɔ kùngurukpoloyo ni yi kángi lè.

¹⁶ Mii n gi lóʔo, a mii fúngi yárira cɛ̀lɛ. Kàfulogi bee báriga ni, a mii nyɔɔwari cɛ̀lɛ. Mii kaceleyi i nyangi, mii tɔ́lɔyi i yirigi mii láari ni, mii i wɔʔɔgi canʔa sigi sìnnyɛʔɛ ni, gee ki a ba yìri syɛɛnfelegi kánma na gi wolo wɔʔɔ lè.

¹⁷ Níì cán děsyaantiiri a ní da fyɛ́ɛn í, ɛrɛzɛn cɛnɛnɛ lɛɛlɛ a ní pye ɛrɛzɛn séyi ni í. Olivyew a ní da sangi í, séyi a ní da yaliire kaangi í, yaweeyiligèle a kwɔ́ɔ yiri yaweeri tɛɛkòrogo ni, yaweekpologèlē a ní nyaa kàtoyi ni í.

¹⁸ Kàjáa mii na, mii a ra fundaanra kpéʔele Yawe ni, mii a ra muguri Kolocɔlɔɔ ni wi lè mii Syɔɔfɔw.

¹⁹ Yawe, mii Kàfɔw, woro wi nyɛ mii fǎngi, wi i mii tɔ́lɔyi kpéʔele àmɛɛ sɔ̀ɔbēle wóyo nyɛ lè, níì mii yaʔa a mii i táanri ǹjoyi ni. Ŋúnuŋùúbèle kùndigi wóʔo, gee be ŋúu ní kɔ̀ríbéle ni lè.