Habakuki 2 - Cebaara Bible 2010

¹ Mii a yére mii kpaàwele-tɛ́ɛgi ni, mii a yére bi kòro mii tònirigi na. Mii a sige jàngó bi gi nyaa, gee wi a joo mii ma lè, ní syɛɛnlurugori mii a joo mii káyaagi kéele na lè.

Yawe syɛɛnlurugori: Syɛɛnsinw ní fǎngi gbànvɔlɔ kéele

² A Yawe syɛɛnlurugori kaan mii ma níì jo: Yanyaʔa sɛ́bɛ, ki kánʔana mi wòlo kàlagoripiigéle na, jàngó ti kàlama dɛ́nɛ.

³ Níì cán làla n tɛ́ʔɛ yanyaagi bee forolo kéele na, ki i gi làrivoroli yèʔerí, ki a jànvaa pye í. Alí ki ga mɔn da gi sigi, níì cán ki a tɔ̀nɔ́ foro ki a tée ba fàli í.

⁴ Wéle, kpɔɔmɔ n syɛɛnaa-sìnzinw fúngo nyìn, kàjáa syɛɛnsinw a sìi taa wi tágali báriga ni.

⁵ Kányɛʔɛ na dùvɛɛnw i syɔɔn có ni kaangi, nɛ̀ɛgbɔʔɔgɔfɔw o yèré sági í, wi i wi yákpodirigi múru fáa àmɛɛ kúbèle tɛɛkòrogo nyɛ lè. Wi i nyɛ àmɛɛ kùúw nyɛ lè wi o tíngi í. Wi i syɛɛnfeleyi myɛ kíle ni maa wiyɛɛ ma, ni syɛɛnfeleyi myɛ kpóʔoro wiyɛɛ na.

⁶ Bele bee myɛ a ba wi kéeli kpéʔele kakpanama, ní nɛ̀ɛnyɛnɛgɛ, ní kàseewáa-yáriga ì? Pe a ra gi nyuu si jo: Wɔʔɔlɔ a pye syɔ́ɔnwee na wi yáriri fàarí ni kpóʔoro ti lè ti o nyɛ wi woro í. Ní wee wi kàa fàrá wi fwɔ́ɔgèle túgoro na lè, làlìí ni gee bee a kwɔ́ɔ?

Dánga tɛ́ɛyɛ kagunɔ kéele

⁷ Bele fwɔ́ɔgéle ge nyɛ mɔ na lè, pe a yìri kelekele ì? Bele pe a mɔ nyàʔara lè, pe a cɛ̀lɛ́ nyán ì? Mɔ a ba pye pe yakoliro.

⁸ Amɛɛ mɔ syɛɛnfeleye saʔa yárira fuguri n láa lè, syɛɛnfeleyi wozanya myɛ a wɔ́ɔ mɔ yáriri fuguri bi láa, syɛ́ɛnbèle sìsyaan kéele na, ní péemi kéele na mɔ kpéʔele tári, ní kěgi, ní gi syɛ́ɛnbèle myɛ na lè.

⁹ Wɔʔɔlɔ a pye syɔ́ɔnwee na wi námara tɔ̀nɔw fàarí ni kpóʔoro wi kpáagi kéele na lè, koro ga pye bi wi zyàári tɛ́ʔɛ ǹjoʔo ma jàngó wɔʔɔgi a kɔ́ nan woro na í.

¹⁰ Mɔ kpáagi fɛ̀ɛrɛ kéele na mɔ gi kɔ̀rirɔ n tímana, àmɛɛ mɔ syɛɛnfeleye saʔa kpúmɔn n cáan lè mɔ n fɔ̀n mɔ siiw ni.

¹¹ Níì cán n kàdɛnɛgi yaʔa gúngi na, ki i yákpoli wáa, n tiipɔw yaʔa kpaatɔn-díiri láara ni a wi syɔɔ gi ma.

¹² Wɔʔɔlɔ a pye syɔ́ɔnwee na wi kàʔa faanri sìsyaan wori fúngo ni lè, ní wee na wi kèkpɔʔɔ téeri kapeegi fúngo ni lè.

¹³ Yawe wi lè Nyɛ̀ʔɛni Sùlasiibéle Kafɔlɔ, woro má ban gee naa yìri ì, koro gi nyɛ syɛ́ɛnbèle i báara náagi ma, syɛɛnfeleyi i yiyɛɛ vɔ̀rɔgí gbanzan?

¹⁴ Níì cán tári a ba nyìn Yawe nìjangbɔɔri cánna na àmɛɛ lǒyi sólomi lɔ̀ʔɔ nyìn lè.

¹⁵ Wɔʔɔlɔ a pye syɔ́ɔnwee na wi wi syɛɛnnyɛnnɛ kaangi wi i gbo lè, mɔ wee na wi mɔ pɔ́sɔniw sòʔó ni kaangi lè, jàngó bi wi yɛ́ɛgi kaan kaa wóo, koro ga pye bi wi níboriw nyaa.

¹⁶ Mɔ n tín fɛ̀ɛ́ri na, nìjanri na ban í. Wɔ́ɔ mi gbaa, mi kòro níbori! Yawe kàliige kɔ́gi yagbaala a fíige nan mɔ na, fɛ̀ɛrɛ a tɔ̀nɔ́ mɔ nijanri taa.

¹⁷ Níì cán péemi bi kpéʔele Liban na lè, poro a ŋɔ́ngari syɔɔ mɔ na. Yaweeri gàlagí fyáakpɔɔrɔ a mɔ cò, syɛ́ɛnbèle sìsyaan kéele na wi wo lè, ní péemi kéele na bi kpéʔele tári, ní kěgi, ní gi syɛ́ɛnbèle myɛ na lè.

¹⁸ Nyàʔá ǹdedanga a nyɔɔ, á koro gi yaʔa fáliw kacaɔn í gi tan, ní tunmɔgbalara màdeo, wee wi jànvaa tamana kaangi lè, á koro gi yaʔa fáliw kacaɔn wi wi sámaga lè, woro í wiyɛɛ daʔa wi na, si kòro bàā jànvaa kolocɔlɔbèle sámagi, poro bele be lè pe o nyuu í?

¹⁹ Wɔʔɔlɔ a pye syɔ́ɔnwee na wi gi nyuu tiige ma lè níì jo: «Ki n yɛlɛ mi yìri!» Ní kàdɛnɛgɛ ma ki lè ki o nyuu í, níì jo: «Yìri ŋúnɔmi na!» A ki a gbǎn syɔɔn tama lé? Wéle, pe n tɛ́ɛw ní wálifiiw tɛ́ʔɛ n gi tɔ́n, kàjáa ŋɔ́ngara o nyɛ gi ni nyáana í.

²⁰ Kàjáa Yawe i nyɛ wi kpɔ̀ʔɔrɔli kpaacanga ni. Ki n yɛlɛ tári myɛ í kòro pyèrio wi yɛʔɛ̀ ma!