Galasi ye 3 - Cebaara Bible 2010

Mowizi làlwaw wàlá tágali

¹ Ee, Galasi ye, yele n labala n tóro! Wìí wi yele fáana n pùuni nya? Bi gi taa wolo maa Zyezu Kirisi kéeli fílige n tɛ̀ɛn yele na, mɔ a jo pe n wi kóri tiiparigi na yele nyɛ́nɛ na.

² Mii i caa bi kéeli naa nibin cán yele ma, Mowizi làlwaw kapyegèlē báriga ni lé yele Pìicǎnni taa láà, ba fwɔɔ àmɛɛ yele syɛ́ɛnri lóʔo lè níì tága di na gee bee báriga ni yele li taa?

³ A yele zǐn labala lé wii nya? Amɛɛ yele da gi séli lè ní Pìicǎnni fànʔa ní, a yele a gi foro lé ní céri fànʔa ní tɔ́ɔliw ni?

⁴ A yele wɔʔɔ lé kèlē saʔa ni nya gbanzan? Eʔe, ki a tɔ̀nɔ́ gbǎn pye gbanzan í.

⁵ Wee wi Pìicǎnni kaangi yele ma lè ní i kakpoloyi kpéʔele yele níngi ni lè, a wi i gi kpéʔele lé Mowizi làlwaw kapyegèlē báriga ni láà, ba fwɔɔ àmɛɛ yele syɛ́ɛnri lóʔo lè níì tága di na?

⁶ Amɛɛ Abirahami tága Kolocɔlɔɔ na lè, a wi gee bee córo wi ma sínnɛ.

⁷ Koro na gi yɛlɛ ye gi cán bi cán bele be nyɛ lè tágafɔbèle, bele bee i nyɛ Abirahami jàala.

⁸ Kolocɔlɔɔ maa téè gi tɛ̀ɛn wi Syɛɛnsɛ́bɛri ni àmɛɛ woro a ba sínni kaan syɛɛnfeleyi ma lè tágali báriga ni, gee bee na wi da Syɛɛnjóocǎnri naa joo Abirahami ma sáni gi ba kpéʔele lè níì jo: «Mɔ ni syɛɛnfeleyi myɛ a ba dùbaw taa.»

⁹ Kánmi bee na tágafɔbèle pínɛ ni dùbaw taagi ní tágafɔw Abirahami ní.

¹⁰ Bele myɛ si be peyɛɛ daʔa lè Mowizi làlwaw kapyegèlē na, dángaw i nyɛ bele bee na, níì cán ki maa sɛ́bɛ níì jo: «Kérigèle ge sɛ́bɛ làlwaw sɛ́bɛ ni lè, syɔɔn o syɔɔn wi lè wi o gele bee myɛ kpéʔele ni forogi í, wee bee n dánga.»

¹¹ Kàjáa ki n fílige Kolocɔlɔɔ Syɛɛnsɛbɛri ni ncan syɔɔn faala a gbǎn sínni taa Kolocɔlɔɔ nyɛ́nɛ na làlwaw báriga ni í, àmɛɛ gi jo lè: «Syɛɛnsinw a sìi taa tágali báriga ni.»

¹² Làlwaw nyúngo si ban gi nyɛ tágali í, àmɛɛ gi jo lè: «Wee wi làlwaw kapyegèlē forogi lè woro a sìi taa ke bárigaw ni.»

¹³ Kirisi n baa wolo syɔɔ làlwaw dánga ma, àmɛɛ wi dángaw yaʔa a wi too woro na wolo sìndɛɛgi ni lè, níì cán ki n sɛ́bɛ níì jo: «Syɔɔn o syɔɔn be cɔ̀rɔ lè tiige na, wee bee n dánga.»

¹⁴ A Kirisi fɔ̀lɔ dángaw bee na koro ga pye dùbawee Kolocɔlɔɔ da kpéʔele lè Abirahami ma, syɛɛnfeleyi í wee bee taa woro Zyezu Kirisi ni, jàngó wolo í Pìicǎnni taa tágali báriga ni, lee nyɔ́ɔ Kolocɔlɔɔ da fàli lè.

Mowizi làlwaw ní nyɔɔfaligi kéele

¹⁵ Ni senyɛ̀nnɛ, mii a dee naa joo syɛ́ɛnbèle jooganma na, syɛ́ɛnbèle pèle ga bɛ̀ɛ joogaanna na n kwɔ́ɔ, syɔɔn faala a gbǎn li sàa í, wàlá bi syɛɛnraa fàra li na í.

¹⁶ Kolocɔlɔɔ si maa wi nyɔɔfaliyi kaan Abirahami ní wi yòdaʔagi ma. Ki si da jo yòdaʔanɛʔɛyɛ kéele na í, kàjáa nibin kéele na ki da joo níì jo: «Ki a ba pye mɔ yodaʔagi ma,» yòdaʔagi bee gi nyɛ Kirisi.

¹⁷ Ye wéle, dee mii caa bi joo lè, toro di nyɛ dee naa: Kolocɔlɔɔ maa téè joogaanni sámaga n tɛ́ʔɛ, a yɛ̀ʔɛlɛ saala siin ní toko ní kpɔrigɔ ga kwɔ́ɔ, a wi náà Mowizi làlwaw tɛ́ʔɛ, kàjáa làlwaw a gbǎn joogaanni sàa nyɔɔfaligi si kálagi í.

¹⁸ Níì cán kapye kɔ́rigi mǎà dée gbǎn lìi làlwaw báriga ni, ki a ní dée gbǎn lìi nyɔɔfaligi báriga ni í, kàjáa nyɔɔfaligi báriga ni Kolocɔlɔɔ da kɔ́rigi kaan Abirahami ma.

¹⁹ Nyàʔá gi nyɛ Mowizi làlwaw tɛ́ʔɛlɛ nyúngo? Làlwaw tɛ́ʔɛlɛ nyúngo gi nyɛ Kolocɔlɔɔ maa wi fàra nyɔɔfaligi na kakolobyeri kéele na, bi taa yòdaʔagi í pan, gee kéele na nyɔɔfaligi da kpéʔele lè. Làlwaw n baa tɛ́ʔɛ nyɛ̀ʔɛni tundunbéle báriga ni kùsuluwaa sábabu ni.

²⁰ Ye wéle, kùsuluo o jǐn syɔɔn nibin nínge ni í, kàjáa Kolocɔlɔɔ si i nyɛ nibin.

Mowizi làlwaw kaanna nyúngo

²¹ A gee bee joo lé Mowizi làlwaw i túngu ní Kolocɔlɔɔ nyɔɔfaliyi ní? Eʔe dɛ! Kapye Kolocɔlɔɔ maa làlwaw kaan wi gbǎn sìíw kaan, lǎli bee ni sínni taala mǎà dée pye làlwaw báriga ni.

²² Kàjáa Kolocɔlɔɔ syɛɛnsɛbɛri n syɛ́ɛnbèle myɛ pínɛ n tɛ̀ɛn n jo pe i nyɛ kapeegèle kàso ni, koro ga pye bele be tága Zyezu Kirisi na lè Kolocɔlɔɔ í wi nyɔɔfaligi kaan bele bee ma tágali báriga ni.

²³ Sáni tágali í pan lè, Mowizi làlwaw maa wolo pínɛ n pwɔɔ n yaʔa kàsow ni n taa a pe baa tágali tɛ̀ɛn wolo na.

²⁴ Kánmi bee na làlwaw bee da pye wolo tamafɔw bi wolo tórigo Kirisi ma koro ga pye wolo í sínni taa tágali báriga ni.

²⁵ Amɛɛ tágali pan n kwɔ́ɔ lè, wolo ní o nyɛ tamafɔw bee kɔ́yɔ ni í.

²⁶ Níì cán àmɛɛ yele tága Kirisi Zyezu na lè, yele myɛ i nyɛ Kolocɔlɔɔ jàala tágali báriga ni.

²⁷ Yele bele myɛ ye batize lè Kirisi ni, yele n Kirisi le burogo.

²⁸ Wàa ní o nyɛ Zyefuo, wàa si i nyɛ syɛɛnfelegaa í, wàlá puloo, wàa si i nyɛ wɔ́rɔɔ í, wàlá nàɔn, wàa si i nyɛ cɔlɔɔ í, níì cán yele myɛ i nyɛ nibin Kirisi Zyezu ni.

²⁹ Ki si ga pye yele i nyɛ Kirisi wòolo, yele i nyɛ Abirahami yòdaʔaya, ní wɔ́ɔ i nyɛ kɔriliibéle n yɛlɛ ní nyɔɔfaligi ní.