Galasi ye 2 - Cebaara Bible 2010

Pɔli ní pìitunbèle bele kéele

¹ A yɛ̀ʔɛlɛ kɛɛ ní sicɛrɛ ga kwɔ́ɔ, a mii níì kári Zyerusalɛmi ma ní Barinabasi ní, ní wɔ́ɔ̀ Tiiti kɔ́ri n kári.

² Níì cán Kolocɔlɔɔ wi da gi tɛ̀ɛn mii na, koro na mii kári yaà. Syɛɛnjóocǎnri mii nyuu lè syɛɛnfeleyi ma a mii sáà di joo n tɛ̀ɛn mɛ́ɛkpoloyi fɔ̀ɔlɔ yagana na koro ga pye kàfyaalee mii fé lè, ní lee mii fàn n kwɔ́ɔ lè li a kɔ́ pye gbanzan í.

³ Tiiti si wi da pye lè ní mii ní, wi lè Girɛkiwaa, pe da wi ŋàʔana wi kɛ́nɛw kpéʔele í.

⁴ Kàjáa senyɛn-váanabèle be jée lè wo níngi ni làrama ni, pe maa ni caa bi wi ŋàʔana wi kɛ́nɛw kpéʔele, wɔ́rɔdi wolo taa lè Kirisi Zyezu bárigaw ni, pe maa ni caa bi dee bee kéele wéle làrama ni jàngó bi ní wolo lége púlori ni.

⁵ Wolo si ga fɔ̀lɔ pe syɛ́ɛnri na pe wolo kàriga làlaa faala ni í, wolo i caa kányɛɛgi ki nyɛ lè Syɛɛnjóocǎnri ni, gee bee í kòro yele ma gi kánmi na.

⁶ Bele si pe da pye lè mɔ a jo mɛ́ɛkpoloyi fɔ̀ɔlɔ, pe da yafyɛn fàra mii cánni na í, kánmee na pe mɛ́ɛyi kpólo lè, gee bee o mii nyɛ́nɛ na yarigaa í! Níì cán Kolocɔlɔɔ o syɔɔnwaa yirigi wàa ni í.

⁷ Kàjáa pe maa gi nyaa Kolocɔlɔɔ wi Syɛɛnjóocǎnri kàlifáa mii ma mii í da di nyuu kɛ́nɛnaa-sìngbeʔelebèle ma, àmɛɛ Pyɛri yɛlɛ lè waa di nyuu kɛ́nɛw kpéʔelefɔɔlɔ ma.

⁸ Níì cán wee wi da ni báara lè Pyɛri fúngi ni n wi pye pìituɔn kɛ́nɛw fɔ̀ɔlɔ ma, woro wi wɔ́ɔ̀ báara mii fúngi ni, níì mii tun syɛɛnfeleyi ma,

⁹ Zyaki, ní Sefasi, ní Zyan be nyɛ lè mɔ a jo kpaʔa tiipɔɔlɔ bɛɛ, lǎli ni pe gi cán lè ncan Kolocɔlɔɔ wi kpɔ́ʔɔri kaan mii ma, a be be kàliige kɔ́yi le wolo ma, mii ní Barinabasi ní, a koro pye fɛ̀ɛ n wolo pínɛnyɛnnɛgi tɛ̀ɛn, níì jo wolo í da syée syɛɛnfeleyi ma, poro sáā syée kɛ́nɛw fɔ̀ɔlɔ ma.

¹⁰ Gee nibin pe da joo lè, pe maa jo ki n yɛlɛ wolo í da sɔ̀ngí da taagi foomɔfɔbèle na, a mii si tɔ̀nɔ ni ŋàʔaná gbanʔama ni gee bee kpéʔele.

Pɔli n Sefasi kábala Antyɔsyi ni

¹¹ Lǎli ni si Sefasi pan lè Antyɔsyi ma, mii maa wi kábala syɛ́ɛnbèle nyɛ́nɛ na níì cán wi maa kolo.

¹² Níì cán wi maa ni líi ní syɛɛnfeleyi ní sáni syɛ́ɛnbèle pèle í yìri Zyaki ma bi pan lè. Kàjáa pe panni kàdoʔo ma a wi wiyɛɛ yirige syɛɛnfeleyi ni, níì cán wi maa ni fɛ̀ɛgí kɛ́nɛw kpéʔelefɔɔlɔ na.

¹³ A Zyefusanbèle wɔ́ɔ̀ bɛ̀ɛ ní wi ní syɛɛnjóotɛɛyi siin joolo na, a koro pye fwɔɔ a be Barinabasi tiimaa fáana n pùuni pe syɛɛnjóotɛɛyi siin joolo báriga ni.

¹⁴ Kàjáa a mii ga gi nyaa pe o táanri ni yɛlɛgi ní kányɛɛgi ní ki nyɛ lè Syɛɛnjóocǎnri ni í, a mii gi joo Sefasi ma pe myɛ nyɛ́nɛ na níì jo: «Mɔ wi lè Zyefuo, mɔ si i táanri syɛɛnfeleyi tánʔaganma na níì Zyefubèle wómɔ yaʔa, mɛ̀ɛ́ gi nyɛ mɔ si i syɛɛnfeleyi ŋàʔaná yaa Zyefubèle kólogo táanri?»

Zyefubèle ní syɛɛnfeleyi wozanya i syoo tágali báriga ni

¹⁵ Wolo bele be see lè Zyefubéle, wolo o nyɛ àmɛɛ syɛɛnfeleyaa nyɛ lè kapeebyebèlē í.

¹⁶ Wolo si n gi cán ncan syɔɔn a gbǎn sínni taa Mowizi làlwaw kapyegèlē báriga ni í, fwɔɔ wi tága Kirisi Zyezu na, tágali bee báriga ni wi a sínni taa, a wolo tiimaa si wɔ́ɔ̀ tága Kirisi Zyezu na jàngó wolo í sínni taa tágali báriga ni Kirisi na, wolo a li taa làlwaw kapyegèlē báriga ni í, níì cán syɔɔn faala a sínni taa làlwaw kapyegèlē báriga ni í.

¹⁷ Amɛɛ si wolo sínni caa lè Kirisi ni, ní pe ga wɔ́ɔ̀ wolo tiimaa nyaa kapeebyebèlē, a gee bee joo lé Kirisi i nyɛ kapeegèle falipyeo lǎli bee ni? Eʔe dɛ!

¹⁸ Níì cán yáriri mii da kálagi lè, mii ga níì lúru ni dee bee sámagi, mii n niyɛɛ bye Mowizi làlwaw céefɔlɔ.

¹⁹ Níì cán làlwaw bee báriga ni mii kùu làlwaw kàbaan na, jàngó mii í pye sìi na Kolocɔlɔɔ kàbangi na. Pe n mii pínɛ n kóri tiiparigi na ní Kirisi ní.

²⁰ Mii ban wi ní i nyɛ sìi na í, kàjáa Kirisi wi nyɛ sìi na mii ni. Sìíwee si mii taa lè, mii n wi taa tágali báriga ni àmɛɛ mii tága Kolocɔlɔɔ Jáaw na lè, woro wee wi tàmaga le ní mii ní lè níì wiyɛɛ gaan mii sìndɛɛgi ni.

²¹ Mii a fɔ̀lɔ́ Kolocɔlɔɔ kpɔ́ʔɔri yaʔa í. Níì cán sínni ga maa ni taagi Mowizi làlwaw báriga ni, Kirisi kùúw mǎà dée pye nyùngo fun.