Galasi ye 1 - Cebaara Bible 2010

Fòów kéele

¹ Mii Pɔli wi lè pìituɔn, kàjáa syɛ̀ɛnnɛ ban pe mii tun í, mii o nyɛ pìituɔn syɔɔn báriga ni í, fwɔɔ Zyezu Kirisi, ní Tofɔw Kolocɔlɔɔ bárigaw ni, wee wi Zyezu nyán n yirige lè kúbèle nínge ni,

² ní senyɛnbèle myɛ be nyɛ lè ní mii ní, wolo a sɛ́bɛw naa tórigo yele Galasi tɛ́nɛmi Egilizibéle ma.

³ Ki n yɛlɛ wolo Tóow Kolocɔlɔɔ ní Kàfɔw Zyezu Kirisi í kpɔ́ʔɔri ní fûnnyingi kaan yele ma.

⁴ Kirisi tiimaa n wiyɛɛ gaan wolo kapeegèle kéele na koro ga pye bi wolo syɔɔ dulunyanbeew naa ma, n yɛlɛ ní wolo Tóow Kolocɔlɔɔ nyɛ́nɛ kéeli ní,

⁵ woro wee na nìjangbɔɔri yɛlɛ lè làla o làla kwɔ́ɔmɔ fun! Amiina!

Syɛɛnjóocǎnri i nyɛ nibin

⁶ Wee wi yele yeri lè Kirisi bárigaw ni, ki n mii fúngi wɔ́ɔ àmɛɛ yele fala ni lúrugu lè wi kurugo nya terire, ní i taari syɛɛnjóocànraa nikwɔɔ na.

⁷ Kàjáa tàa nikwɔɔ ní o yaà í, á pèle si i yele fúnyi curugu, ní i caa bi Kirisi Syɛɛnjóocǎnri fàli.

⁸ Alí wolo wàa ga ní sáà syɛɛnjóocànraa nikwɔɔ joo yele ma dee di lè ti o nyɛ wolo wojoolɛɛri í, wàlá a nyɛ̀ʔɛni tundunwaa náa sáà di joo yoo, ki n yɛlɛ wee bee í dánga.

⁹ Amɛɛ wolo da sélì gi joo lè, ànbée mii a ní gi joo taʔa tɔ́ɔliw ni, si jo, wàa faala ga ní sáà syɛɛnjóocànraa nikwɔɔ joo yele ma, n gi yaʔa ti o nyɛ dee ni yele da sélì yére lè í, ki n yɛlɛ wee bee í dánga.

¹⁰ Tɔ́ɔliw ni doò, syɛ́ɛnbèle lé mii caa be fɔ̀lɔ mii na láà, ba fwɔɔ Kolocɔlɔɔ mii caa wi fɔ̀lɔ mii na? Wàlá ba syɛ́ɛnbèle kanidaangéle lé mii caa bàā kpéʔele? Mii ga maa sèʔé ni syɛ́ɛnbèle kanidaangéle kpéʔele, mii mǎà dée pye Kirisi púlo í.

Kánmee na Pɔli kàri lè pìituɔn

¹¹ Ni senyɛ̀nnɛ, mii a gi joo yele ma, Syɛɛnjóocǎnri mii joo yele ma lè, syɔɔn wóro ban í,

¹² níì cán mii ga di taa syɔɔn ma í, syɔɔn ga wɔ́ɔ̀ mii tama di na í, kàjáa Zyezu Kirisi wi di tɛ̀ɛn mii na.

¹³ Yele n gi lóʔo àmɛɛ mii da ni Zyefubèle sérikologo táanri lè booma ni, lǎli bee ni mii maa ni Kolocɔlɔɔ Egiliziw wɔʔɔ gbanʔama ní i wi kálagi.

¹⁴ Mii maa ni syée yɛʔɛ̀ ma Zyefubèle sérikologo ni n sɔ̀lɔ mii felegefɔ-nyɛ́nbèle saʔa na, be nyɛ lè mii kàdanbèle, níì cán mii maa niyɛɛ gaan mii tóolɛɛbèle kalɛɛgéle ma n sɔ̀lɔ.

¹⁵ Kàjáa wee wi mii nyɛ́nɛ n wòlo n yaʔa kɔlɔ̀ na sáni mii nɔ́ɔw í mii see lè, lǎli ni wi mii yeri wi nyínimi báriga ni lè,

¹⁶ àmɛɛ ki wi dɛ́nɛ bi wi Jáaw tɛ̀ɛn mii na lè jàngó mii í da wi kéeli nyuu syɛɛnfeleyi ma lè, lǎli bee wonijanna ni mii ga syɔɔn faala yíbe í.

¹⁷ Bele be sélì pye lè pìitunbéle mii yɛ́ʔɛ ma, mii ga wɔ́ɔ̀ kári Zyerusalɛmi ma n sáà poro yíbe í. Kàjáa mii maa kári Arabii tári ma níì lúru n kári Damasi ma.

¹⁸ A yɛ̀ʔɛlɛ taanri ga kwɔ́ɔ a mii kári Zyerusalɛmi ma wo sa woyɛɛ ján, mii ní Sefasi ní, ní sáà canya kɛɛ ní kagunɔ kwɔ́ɔ yaà ní wi ní.

¹⁹ Kàjáa mii da pìitunzanbèle nyaa í kapye Zyaki ban í wi lè Kàfɔw senyɛnnɛ.

²⁰ Syɛ́ɛnri naa mii sɛ́bɛ lè bi tórigo yele ma, Kolocɔlɔɔ n gi cán jànvaa o nyɛ di ni í.

²¹ Koro kàdoʔo ma a mii jée Sirii tári tɛ́ɛyaa ni, ní Silisii tári tɛ́ɛyaa ní.

²² Kirisi egilizibèle be nyɛ lè Zyude tári ni, pe da kɔ́ɔ̀ mii cán í.

²³ Kàjáa pe maa ni gi lúro pèle ma a be jo: «Wee wi da ni wolo wɔʔɔ lè booma ni, wi i tágali kéele nyuu ni téè tɔ́ɔliw ni, lee wi da ni caa bi kálagi lè.»

²⁴ A be i Kolocɔlɔɔ kpɔ̀ʔɔrɔ́ mii kéeli na.