Ɛsidirasi 9 - Cebaara Bible 2010

Zyefubèle saʔa n táraa nikwɔɔ càbala pɔri

¹ Gee bee cɔɔnrigwɔɔlɔ kadoʔo ma, a kùndigibèle pan mii ma n baa jo: «Isirayɛli syɛ́ɛnbèle, ní sáriga-wòlobèle, ní Levii ye ga wàli n láʔa tátɛɛyi syɛ̀ɛnnɛ, ní be yanɔnʔɔri na í, ti lè Kanaan ye, ní Hɛti ye, ní Perezi ye, ní Yebusi ye, ní Amɔn ye, ní Mowabi ye, ní Ezyipiti ye, ní Amɔri ye wóri.

² Níì cán pe n bele bee pìíbèle pèle láa be càbala, ní wɔ́ɔ̀ pèle láa n kaan pe jáabèle ma, a syɛɛnfelecǎngi nyáʔami tátɛɛyi bee syɛ̀ɛnnɛ ni, àlí kùndigibèle, ní kútiijoobèle be pye wozelibèle kapeegi bee pyele na.»

³ Lǎli ni mii kéeli bee lóʔo lè, a mii mii búrogi ní mii burogbɔɔgi cò n sulugu, níì mii ǹjooraa, ní mii bàʔajɔɔwaa cò n kíle n kɔ́nɔgi, níì tɛ́ɛn funbɛɛnrɛ na.

⁴ Bele myɛ pe da ni cɛ̀lɛ́ lè Isirayɛli Kolocɔlɔw syɛ́ɛnrɛ kéele na, a poro peyɛɛ gbóʔoro n pan mii ma, wojo-mí-káribèle kapeʔe kéele na. A mii funbɛɛnrɛtɔw tɛ́ɛn n kòro nya fwɔɔ n baa nan cângwɔɔgi nyɔ́ɔ sáriga làriwololo na.

Ɛsidirasi n nyɛ́ɛri kolomi fɔ̀ɔlɔ kéele na

⁵ A ki ga pye cângwɔɔgi nyɔ́ɔ sáriga làriwololo ni, a mii yìri mii nɛ̀ɛjɛrɛgi tɛɛ̀tɛ́ɛnnɛ ni, ní mii búrogi, ní mii burogbɔɔgi ní wozuluguyo ní, a mii tìgi n too n yégunri cáan níì kɔ́yi yìrige Yawe mii Kolocɔlɔw ma,

⁶ níì jo: «Mii Kolocɔlɔw, mii n curugo, fɛ̀ɛrɛ n mii taa, bi mii yɛ́ɛgi yìrige bi mɔ wéle, ee mii Kolocɔlɔw. Níì cán wolo kolomi kèlē n nɛʔɛ fwɔɔ n wolo tɔ́n, a wolo kakolobyeri taani tiyɛɛ na fwɔɔ n sáà nan nyɛ̀ʔɛni na.

⁷ Nlaa yaà wolo tóolɛɛbèle canya na, wolo n kolo gbanʔama fwɔɔ n baa nan cángi naa na. Wolo kakolobyeri kéele na wolo, ní wolo fànʔafɔbèle, ní wolo sáriga-wòlobèle da le tátɛɛyi fànʔafɔɔlɔ, ní ŋɔséew, ní púlori, ní fugurili kɔ́yɔ ni, n fàra fɛ̀ɛ́ri na àmɛɛ gi nyɛ wo na lè níjanʔa.

⁸ Kàjáa lǎli naa ni, ki ga mɔn í, Yawe wolo Kolocɔlɔw n nyɔɔ wolo na, níì wo pèle yaʔa a wo kòro sìi na, níì tɛɛlaraga kaan wolo ma wi tɛɛcǎngi ni, koro ga pye wolo Kolocɔlɔw í gbɛ̀ɛnmɛ yirige wolo nyapiigèle í da nyaagi, si sìi cɛɛri kaan wolo ma wolo púlori fáli ni.

⁹ Níì cán wolo i nyɛ pulobèlē kàjáa n wolo yaʔa wolo púlori ni wolo Kolocɔlɔw ga wolo yaʔa í. Wi n wi funjǎngi tɛ́ʔɛ n wolo tɔ́n Pɛrisi fànʔafɔbèle yɛ́ʔɛ ma, bi ní sìíw lúrugo kaan wolo ma koro ga pye wolo í ní wolo Kolocɔlɔw kpaʔa yìrige, bi gi gurubɛɛ-toogi yìrige jàngó bi tɛɛlaraga kaan wolo ma Zyuda, ní Zyerusalɛmi ni.

¹⁰ Ee wolo Kolocɔlɔw, tɔ́ɔliw ni, nyàʔá si wolo a ní joo gee bee kadoʔo ma? Níì cán wolo n mɔ kajoodɛ̀ɛngèle yaʔa,

¹¹ gele mɔ da joo n yaʔa wolo ma mɔ falipyebèle nyɔ́ɔyɔ ni lè pe lè kanyaajoobèle níì jo: ‹Táree ni yele a sa jée bi di syɔɔ taa di pye yele wóro lè, ti i nyɛ táraa, dee di nɔ́nʔɔ lè tári bee syɛɛnfeleye nɔ́nʔɔrɔ báriga ni. Pe n di nyìn ní be nɔ́nʔɔri kapyere ní n séli láʔalee na fwɔɔ n sáà nan lee na.

¹² Koro na yele a kɔ́ ra yele calipiigèle kaangi pe jáabèle ma í, yele a wɔ́ɔ kɔ́ ra be calipiigèle kaangi yele jáabèle ma í. Yele a tée kɔ́ be keele yaʔa li wári yele na yele í da be yɛɛ̀nyinge, wàlá be nyɔɔmɔ caa í. Kánmi bee na yele a fànʔa taa, yele a ra tári yacanra líi, si di yaʔa di kòro làla o làla kɔrigɔ yele pìíbèle ma.›

¹³ Gee bee myɛ gi wolo taa lè wolo péemi kapyere, ní wolo kapeekpɔɔgi kéele na, á mɔ sèʔê pèle yaʔa a be pye wolo ni wogorobéle, wolo Kolocɔlɔw, mɔ si ga wolo wɔʔɔ n yɛlɛ ní wolo kolomi kèlē ní í,

¹⁴ a wolo da yɛlɛ lé bi ní séli bàā mɔ kajoodɛ̀ɛngèle kálagi sáā cèpɔrigi kpéʔele ní yanɔnʔɔri bee kpéʔelefɔɔlɔ ní? Mɔ fúngi a tanʔa wolo kurugo mɔ í wolo kálagi fwɔɔ bi taa pèle a ní pye wogorobéle wàlá wozyɔɔbéle wolo ni í ì?

¹⁵ Yawe, Isirayɛli Kolocɔlɔw, mɔ n sín, níì cán wolo n kòro níjanʔa àmɛɛ wogorobéle nyɛ lè. Wolo wo nyɛ bele mɔ yɛ́ʔɛ ma ní wolo kolomi ní, bi si pye kánmi bee felege na, wolo a gbǎn yére mɔ yɛʔɛ ma í.»