Ɛsidirasi 7 - Cebaara Bible 2010

Sáriga-wòlow Ɛsidirasi kéeli

¹ Kérigèle bee pyele kadoʔo ma, a ki ga pye Pɛrisi fànʔafɔw Aritakisɛrikisɛsi fǎngi làla ni, a Ɛsidirasi pan, wi lè Seraya jáaw, Seraya wi lè Azariya jáaw, Azariya wi lè Hilikiya jáaw,

² Hilikiya wi lè Syalumi jáaw, Syalumi wi lè Sadɔki jáaw, Sadɔki wi lè Ahitubi jáaw,

³ Ahitubi wi lè Amariya jáaw, Amariya wi lè Azariya jáaw, Azariya wi lè Merayɔti jáaw,

⁴ Merayɔti wi lè Zeraya jáaw, Zeraya wi lè Uzii jáaw, Uzii wi lè Bukii jáaw,

⁵ Bukii wi lè Abisyuwa jáaw, Abisyuwa wi lè Fineyasi jáaw, Fineyasi wi lè Eleyazari jáaw, Eleyazari wi lè sáriga-wòlobèle kàfɔlɔ Aarɔn jáaw.

⁶ Ɛsidirasiw bee n yìri Babilɔni ma n pan, làlwaw sɛ́bɛkanwaa wi pye, wee wi da tɔ̀nɔ n Mowizi làlwaw kɔ́rɔ sámaga n cán lè, wee Yawe Isirayɛli Kolocɔlɔw kaan lè. A fànʔafɔw wi yanyɛɛriyi myɛ kaan wi ma àmɛɛ wi Kolocɔlɔw kɔ́lɔ da pye wi na lè.

⁷ A Isirayɛli wóbèle pèle wɔ́ɔ̀ pan Zyerusalɛmi ma pe lè sáriga-wòlobèle pèle, ní Levii wóbèle pèle, ní ŋùuvɔbèle pèle, ní kpàánweegèle kɔ̀rɔsiifɔbèle pèle, n fàra Netinyɛbèle pèle na fànʔafɔw Aritakisɛrikisɛsi fǎngi yɛ̀ʔɛlɛ kɔrɔsiin wólo na.

⁸ A Ɛsidirasi baa nan Zyerusalɛmi na fànʔafɔw fànʔa yɛ̀ʔɛlɛ kɔrɔsiin wólo, yeye kagunɔ wógi na,

⁹ wi maa tánʔani séli n yiri Babilɔni ni yezeligi cânzelige na, a ki ga pye yeye kagunɔ wógi cânzelige na, a wi nan Zyerusalɛmi na àmɛɛ wi Kolocɔlɔw kɔjànga da pye wi na lè.

¹⁰ Níì cán Ɛsidirasi maa wi fúngi yaʔa Yawe làlwaw tamana, ní wi kpéʔeleli na, ní i syɛ́ɛnbèle tama Isirayɛli làlwaw kajoogéle, ní sínni kèlē na.

Fáliw Aritakisɛrikisɛsi kàlifáa Ɛsidirasi ma lè

¹¹ Sɛ́bɛw fànʔafɔw Aritakisɛrikisɛsi da kaan sáriga-wòlow Ɛsidirasi ma lè, wi lè sɛ́bɛkanw, woro syɛ́ɛnri di nyɛ dee naa, Ɛsidirasi wi da ni syɛ́ɛnri sɛ́bɛ, dee Yawe joo n gbàn lè, n fàra wi làlwaw kèlē na Isirayɛli ye kéeli na:

¹² «Aritakisɛrikisɛsi wi lè fànʔafɔbèle fànʔafɔlɔ, woro wi sɛ́bɛw naa kaan Ɛsidirasi ma wi lè sáriga-wòloo, ní sɛ́bɛkaɔn, woro wee wi nyɛ̀ʔɛni Kolocɔlɔɔ làlwa cán lè.

¹³ Mii n gi joo n gbàn níì jo, Isirayɛli syɛ́ɛnbèle bele myɛ, ní wi sáriga-wòlobèle, ní Levii ye wóbèle be nyɛ mii fǎngi tɛ́nɛmɛ ni lè, ní i caa bi kári Zyerusalɛmi ma lè, pe be yaʔa paa syée ní mɔ ní.

¹⁴ Ncan fànʔafɔw ní wi yarifɔbèle kɔrɔsiin n mɔ tun mɔ í sa sɛʔɛwelele kpéʔele Zyuda, ní Zyerusalɛmi kéeli na, bi yɛlɛ ní mɔ Kolocɔlɔw làlwa ní, woro wee wi nyɛ mɔ kɔ́yi ni lè,

¹⁵ mɔ si kári ní wálifiiw, ní tɛ́ɛw ní, wee fànʔafɔw ní wi yarifɔbèle kɔrɔsiin kɔ̀rirɔ n kaan Isirayɛli Kolocɔlɔw ma lè, woro wee tɛɛkòrogo gi nyɛ Zyerusalɛmi ni lè,

¹⁶ ní wálifiiw ní tɛ́ɛwee myɛ mɔ a taa lè Babilɔni tári myɛ ni, n fàra kínidɛnɛgi yakaanra na, dee syɛ́ɛnbèle, ní sáriga-wòlobèle a kaan lè be Kolocɔlɔw kpaʔa kéele na ki lè Zyerusalɛmi ni.

¹⁷ Koro na mi sa ŋàʔana mi náapɛʔɛlɛ, ní bàpɔɔlɔ, ní bàpiigéle syɔɔ ní wáliw bee ní bi fàra yaweegèle bee míimɛ sáriga, ní ge sáriga-yólogow na, bi wòlo sáriga, sáriga-wòlo-yafaangi na yele Kolocɔlɔw kpaʔa ni ki nyɛ lè Zyerusalɛmi ni.

¹⁸ Yariga o yariga ga sáà yɛlɛ yele ma bi kpéʔele ní wálifiiw wozaɔn, ní tɛ́ɛw ní lè, mɔ ní mɔ senyɛnbèle ní, ki n yɛlɛ ye gi kpéʔele bi yɛlɛ ní yele Kolocɔlɔw nyɛ́nɛ kéele ní.

¹⁹ Yayigeleri di kaan mɔ ma lè mɔ Kolocɔlɔw kpaʔa fáli kéele na, sa di tɛ́ʔɛ Zyerusalɛmi ni, mɔ Kolocɔlɔw yɛ́ʔɛ ma.

²⁰ Yariraa màko ga níì pye mɔ na mɔ Kolocɔlɔw kpaʔa kéele na, mɔ a di wòlo fànʔafɔw kpaʔa lɔ́rɔ ni.

²¹ Mii Aritakisɛrikisɛsi, wi lè fànʔafɔw, mii wi gee naa nyuu ni gbàngí cábigi jelige wálitɛʔɛbéle myɛ ma níì jo sáriga-wòlow Ɛsidirasi wi lè nyɛ̀ʔɛni Kolocɔlɔɔ làlwa sɛ́bɛkaɔn, gee myɛ wi ga ni caa be ma lè, paa gi kaangi wi ma làla o làla,

²² pe a ra kaangi wi ma bi taa sa nan wálifiio cúlobéle selebinnɛ ní saala kagunɔ, ní bile cúlobéle sirakama ní selebingéle kagunɔ, ní dùvɛɛn lítiribéle selebingéle siin, ní sìnmɛ lítiribéle selebingéle siin na, sólomi sáā kaangi wi ma córomɔ fun.

²³ Nyɛ̀ʔɛni Kolocɔlɔɔ ga gee myɛ joo n gbàn lè, ki n yɛlɛ gi kpéʔele gi kpéʔeleganmi na nyɛ̀ʔɛni Kolocɔlɔɔ kpáagi kéele na, koro ga pye wi fundanʔari a kɔ́ too fànʔafɔw fànʔa, ní wi jáabèle na í.

²⁴ Wolo a wɔ́ɔ ní gi joo yele ma si yele pye, nyǔnyi lɔ́rɔ, wàlá fǎngi wáli, wàlá céwologo ga yɛlɛ kaa syoo sáriga-wòlobèle, ní Levii ye, ní ŋùuvɔbèle, ní kpàánweegèle kɔ̀rɔsiifɔɔlɔ, ní Netinyɛbèle, ní Kolocɔlɔɔ kpáagi bee falipyebèlē ma í.

²⁵ Mɔ si na Ɛsidirasi, ki n yɛlɛ mi kacɔɔnribéle ní kútiijoobéle télege bi yɛlɛ ní Kolocɔlɔɔ sícilimi ní bi nyɛ mɔ ma lè, koro ga pye paa cábigi jelige syɛɛnnɛ myɛ kútii nyuu ní sínnɛ ní, poro bele pe mɔ Kolocɔlɔw làlwa kèlē cán lè, máā wi tèé bele na pe nyɛ lè pe ga wi cán í.

²⁶ Syɔ́ɔnwee faala ga pye lè wi ga mɔ Kolocɔlɔw làlwa ní fànʔafɔw làlwa cò í, kútiiw a tɔ̀nɔ́ too wee bee na, pe wi kpóo, wàlá bi wi nɛnɛ yirige tári ni, wàlá bi wáli nyɔ́ɔgaa taʔa wi na, wàlá bi wi le kàso ni.»

Ɛsidirasi n bariga kaan Kolocɔlɔɔ ma

²⁷ Yawe n yɛlɛ waa wi kpɔ̀ʔɔrɔ́, wi lè wolo tóolɛɛbèle Kolocɔlɔɔ, àmɛɛ wi gi lége fànʔafɔw fúngo ni lè wi Yawe kpáagi sámaga ki nyɔɔ kánmi bee na lè, ki lè Zyerusalɛmi ni,

²⁸ níì wi funjǎngi tɛ̀ɛn mii na fànʔafɔw, ní wi yarifɔbèle, ní wi séew syɛɛnkpolobéle myɛ nyɛ́nɛ na. Mii n fànʔa taa Yawe mii Kolocɔlɔw kɔ́lɔ báriga ni ki da pye mii na lè, n Isirayɛli kùndigibèle kpóʔoro jàngó be kári ní mii ní.