Ɛsidirasi 6 - Cebaara Bible 2010

Fànʔafɔw Dariyusi syɛɛnlurugori

¹ Lǎli bee ni a fànʔafɔw Dariyusi gi joo n gbàn níì jo be caa be wéle yaà sɛ́bɛbèle tɛɛ̀tɛʔɛgɛ ni, lɔ́ri tɛɛkɔngɔ ni, Babilɔni ni.

² A be sɛ́bɛmigio nyaa Mɛdi ye tári kènirige ni ki lè Akimeta, wee ni sɔ̀ngudaara kéeli naa da sɛ́bɛ lè n jo:

³ «Fànʔafɔw Sirusi fǎngi yɛɛzelile na, fànʔafɔw Sirusi kéeli naa joo n gbàn níì jo: ‹Kolocɔlɔɔ kpáagi gi nyɛ lè Zyerusalɛmi ni, ki n yɛlɛ kpáagi í ní faan bi pye tɛɛgaa, beè pe a ra sárigaw wóo lè. Ki kàpɔɔnw n yɛlɛ bi sámaga nìri. Ki ǹjogi tɔnɔganma a pye mɛ́tiribéle toko ní kpɔrigɔ, ki yɛ́ɛgi kpɔ́ʔɔganma í pye mɛ́tiribéle toko ní kpɔrigɔ.

⁴ Ki a faan ní kàdɛnɛgboloyo kóloyo taanri, ní tiifɔ́nrɔ kologo nibin ní. Ki faanni wáli si yiri fànʔafɔw kpaʔa ni.

⁵ N fàra gee bee na Kolocɔlɔɔ kpáagi yayigelere di lè tɛ́ɛw, ní wálifiiw wóro, dee Nebukadinezari yirige lè Zyerusalɛmi kpɔ̀ʔɔrɔli kpaʔa ni n pan Babilɔni ma, ti a lúrugo kaan, ti láa bi sa tɛ́ʔɛ Zyerusalɛmi kpɔ̀ʔɔrɔli kpaʔa ni, tɛ́ɛgee ni ti da pye lè Kolocɔlɔɔ kpáagi ni.

⁶ Tɔ́ɔliw ni cábigi jelige guvɛrinɛɛri Tatinayi, ní Syetari-Bozinayi, ní yele bele ye nyɛ lè be pínɛnyɛnbèle, Afarisaki wóbèle, cábigi jeligɔgee na, ye láʔa ye yére.

⁷ Ye Kolocɔlɔɔ kpáagi bee fáli yaʔa waa syée. Ki n yɛlɛ Zyefubèle guvɛrinɛɛri ní Zyefubèle wólɛɛbéle í ní gi faan gi tɛ́ɛgi ni.

⁸ Gee yele a kpéʔele bi Zyefubèle wólɛɛbèle bee dɛ̀ɛmɛ lè Kolocɔlɔɔ kpáagi bee faanna na, gee naa mii a joo gbàn kéeli bee na: Wáli n yɛlɛ bàā wóo fànʔafɔw lɔ́rɔ ni, cábigi jelige woolo nyúnyo lɔ́rɔ ni bàā kaangi nǎnbèle bee ma làla o làla koro ga pye fáliw a kɔ́ yére í.

⁹ Pe màko ga pye yárigee na lè bi pye sáriga-sórigoo nyɛ̀ʔɛni Kolocɔlɔɔ ma, gee bee n yɛlɛ kaa kaangi be ma canʔa o canʔa sìnlaʔa ni bi yɛlɛ ní Zyerusalɛmi sáriga-wòlobèle syɛ́ɛnrɛ ní, gee bee n jo náapebiigéle, ní bàpɔɔlɔ, ní bàpiigéle, ní yaliire, ní solomɔ, ní dùvɛɛn, n fàra sìnmɛ na.

¹⁰ Koro ga pye paa nùndaanni sáriga wóo nyɛ̀ʔɛni Kolocɔlɔɔ ma, sáā Kolocɔlɔɔ nyɛ́ɛri fànʔafɔw sìi, ní wi jáabèle sìi kéele na.

¹¹ Gee si mii a joo gbàn lè syɔɔn o syɔɔn kéele na, wee wi ga kajooli naa kálagi lè, koro gi nyɛ gee naa: Pe a tiinnaa kíle yirige wi kpáagi ni bi yérige si wi cɔ̀rɔ li na, wi kpáagi si kàri gurubɛɛtoʔo.

¹² Fànʔafɔlɔ o fànʔafɔlɔ, ní syɛɛnfelege o syɛɛnfelege ga kɔlɔ̀ sánʔa bi kajooli naa kálagi bi Kolocɔlɔɔ kpáagi bee cáan ki nyɛ lè Zyerusalɛmi ni, Kolocɔlɔwee wi wi mɛ́ɛgi yaʔa a gi pye tɛ́ɛgi bee ni lè, ki n yɛlɛ wi bele bee cáan. Mii Dariyusi wi kéeli naa joo n gbàn, ki n yɛlɛ li kpéʔele kelekele.› »

¹³ Lǎli bee ni cábigi jelige tára guvɛrinɛɛri wi lè Tatinayi, ní Syetari-Bozinayi, ní be pínɛnyɛnbèle, a poro fànʔafɔw Dariyusi tundunri kpéʔele kelekele dee wi joo n tórigo be ma lè.

Kolocɔlɔɔ kpáagi ki níì faan lè, ki kàlifaali kéele

¹⁴ A Zyefubèle wólɛɛbéle i syée faanni kurugo, a fáliw nyɔɔ n yɛlɛ ní kanyaajoow Agizye kanyaajoori, ní Ido jáaw Zakarii kanyaajoori ní. Pe n faanni pye n baa kwɔ́ɔ n yɛlɛ ní gee ní Isirayɛli ye Kolocɔlɔw da joo n gbàn lè, n wɔ́ɔ̀ yɛlɛ ní Sirusi ní Dariyusi, ní Pɛrisi fànʔafɔw Aritakisɛrikisɛsi da joo n gbàn lè.

¹⁵ A kpáagi faan n kwɔ́ɔ Adari yégi candaanri wóʔo na, fànʔafɔw Dariyusi fǎngi yɛ̀ʔɛlɛ kɔrɔni wólo na.

¹⁶ Isirayɛli ye pe lè sáriga-wòlobèle, ní Levii ye, ní wojo-mí-káribèle wozanbèlē, a poro Kolocɔlɔɔ kpáagi bee kàlifaala kpéʔele ní fundaanra ní.

¹⁷ A be náapɛʔɛlɛ dabata, ní bàpɔɔlɔ sirakele, ní bàpiigéle saala siin wòlo sáriga Kolocɔlɔɔ kpɔ̀ʔɔrɔlɔ kpáagi bee kàlifaala kéele na, níì sikepɔɔlɔ kɛɛ ní siin wòlo sáriga Isirayɛli ye myɛw kapeele kéele na, n yɛlɛ ní Isirayɛli syɛ́ɛnfeleyi nyɔ́ɔ ní.

¹⁸ A be sáriga-wòlobèle télege n yɛlɛ ní be kabiyi ní, ní Levii ye, n yɛlɛ ní be tílaganmi ní Kolocɔlɔɔ fáliw pyele na Zyerusalɛmi ni, n yɛlɛ ní gi ní àmɛɛ gi sɛ́bɛ lè Mowizi sɛ́bɛw ni.

Zyefubèle n Sɔ̀lɔ-mí-yaʔali séri kpéʔelele

¹⁹ A wojo-mí-káribèle baa Sɔ̀lɔ-mí-yaʔali séri kpéʔele yɛ́ɛli yezelige canya kɛɛ ní sicɛrɛ wógi na.

²⁰ Sáriga-wòlobèle, ní Levii ye maa pínɛ n peyɛɛ jéemununi fáli kpéʔele, pe myɛ maa mùnu n nyɔɔ. A be Sɔ̀lɔ-mí-yaʔali sáriga yaweegéle kɔnɔgi wojo-mí-káribèle myɛ kéele na, ní be senyɛnbèle kéele na, pe lè sáriga-wòlobèle, n fàra peyɛɛ tiimaw na.

²¹ Isirayɛli wóbèle pe da cò n kári á pe lúru n pan lè, a poro Sɔ̀lɔ-mí-yaʔali lìile lìi, n fàra bele myɛ na pe da peyɛɛ ceri n láʔa lè syɛɛnfeleyi yanɔnʔɔrɔ na, ní baa fàra be na a pe i Yawe caa wi lè Isirayɛli Kolocɔlɔw.

²² A be Levé fun búruw séri kpéʔele canya kɔrɔsiin fúngo ni ní fundaanra ní. Níì cán Yawe maa fundaanra kaan be ma àmɛɛ wi Asirii fànʔafɔw fúngo kàriga pe kàbangi na lè, bi fànʔa le be kɔ́yi ni Kolocɔlɔɔ kpáagi faanna fáli pyele ni wi lè Isirayɛli Kolocɔlɔw.