Ɛsidirasi 3 - Cebaara Bible 2010

Zyozuwe ní Zorobabɛli n níì sériw séli

¹ A yeye kɔrɔsiin wógi baa nan n Isirayɛli ye yaʔa wodɛ́ɛnbéle ní be kěyi ni. Lǎli bee ni a syɛ́ɛnbèle myɛ peyɛɛ gbóʔoro Zyerusalɛmi ni àmɛɛ nàɔn nibin nyɛ lè.

² Zyozuwe wi lè Yosadaki jáaw, woro ní wi senyɛnbèle pe lè sáriga-wòlobèle, n fàra Syeyalityɛli jáaw Zorobabɛli ní wi senyɛnbèle na, a poro yìri n Isirayɛli Kolocɔlɔw sáriga-wòlo-yafanʔa faan, koro ga pye bàā sáriga-sórigow wóo gi na bi yɛlɛ ní gee ní gi sɛ́bɛ Kolocɔlɔɔ syɔ́ɔnw Mowizi làlwaw sɛ́bɛ ní lè.

³ A be sáriga-wòlo-yafaangi faan gi kàpɔɔnlɛɛw na, àlí n gi yaʔa pe maa fyáa tɛ́nɛmi syɛ̀ɛnnɛ na, a be sáriga-sórigow wòlo gi na Yawe ma nyǐngi nyɔ́ɔ sáriga-sórigoo ní cângwɔɔgi nyɔ́ɔ sáriga-sórigoo.

⁴ A be Kpáagèle Láara Tɛ́ɛnnɛ fɛ́tii kpéʔele n yɛlɛ ní gi ní àmɛɛ gi sɛ́bɛ lè, ní i sáriga-sórigow wóo canʔa o canʔa ni yɛlɛgi ní cányi myɛ wóo nyɔ́ɔ ní gi tɛ̀ɛn lè.

⁵ Koro kàdoʔo ma a be canʔa o canʔa sáriga-sórigow wòlo n fàra yevɔnyi sáriga-sórigoo, ní kpóʔorojǎngèle myɛ ke yaʔa Yawe ma lè koro wów, ní kínidɛnɛgi yakaanya wóo na, wee ní syɔɔn o syɔɔn da ni maa Yawe ma lè.

⁶ N séli yeye kɔrɔsiin wógi cânzelige na, a be sáriga-sórigow wòlolo séli Yawe ma. Yawe kpɔ̀ʔɔrɔli kpaʔa kàpɔɔn si da kɔ́ɔ̀ le í.

⁷ A be wáli kaan kàdɛnɛdanbèle ní kpaatɔnbèle ma, níì yaliire, ní yagbaʔa, ní sìnmɛ tórigo Siidɔn ye, ní Tiiri ye ma, jàngó be Liban sɛdiri tíiraa tórigo sólomi lɔ̀ʔɔ na ti ba nan Zyafa na, n yɛlɛ ní gi ní àmɛɛ Pɛrisi fànʔafɔw Sirusi gi joo be ma lè.

⁸ Pe nan lè Kolocɔlɔɔ kpáagi na Zyerusalɛmi ni, a ki ga pye yɛɛziin wóli yeziin wóʔo na, Zorobabɛli wi lè Syeyalityɛli jáaw, ní Zyozuwe wi lè Yosadaki jáaw, ní be senyɛnzanbèle be lè sáriga-wòlobèle, ní Levii ye n fàra bele myɛ na pe da yìri púlori na n lúru n pan Zyerusalɛmi ma lè, a poro fáliw séli. Levii wóbèle be yɛ̀ʔɛlɛ toko toko taa lè, ní poro yɛ́ʔɛ ma wóbèle, a be poro télege paa Yawe kpáagi fáli kɔ̀rɔsíi.

⁹ Lǎli bee ni a Zyozuwe ní wi jáabèle, ní wi senyɛnbèle, ní Kadimyɛli, ní wi jáabèle pe lè Zyuda ye n fàra Menadadi jáabèle, ní wi jáabèle jàala, ní be senyɛnbèle na, pe lè Levii ye, a poro myɛw pínɛ n yìri n pye Kolocɔlɔɔ kpáagi fálipyebèlē kɔrɔsiifɔɔlɔ.

¹⁰ Lǎli ni falipyebèle Yawe kpɔ̀ʔɔrɔli kpaʔa kàpɔɔn le lè, a be sáriga-wòlobèle yérige yaà ní be búroyi ní, búruwiibèle si i nyɛ be ma, Levii ye pe lè Azafi yòdaʔayi n fàra poro na ní kanyɛɛnri kadaforo yáriya ní, koro ga pye paa Yawe sòoló bi yɛlɛ ní kánmee ní Isirayɛli fànʔafɔw Davidi tɛ̀ɛn lè.

¹¹ A pe i ŋúnugi syoo peyɛɛ ma ni Yawe sòoló, ní i bariga kaangi wi ma níì jo: «Níì cán wi n nyɔɔ, níì cán wi funjǎngi a tée kwɔ́ɔ Isirayɛli kàbangi na í.» A syɛ́ɛnbèle myɛ i yákpogèle wáa gbanʔama ni Yawe kpɔ̀ʔɔrɔ́, níì cán pe maa Yawe kpáagi kàpɔɔn le.

¹² Kàjáa saʔa maa pye sáriga-wòlobèle, ní Levii ye, ní narigbaayi kùndigibéle ni, bele be lɛɛ lè, ní da kpaaseligi nyaa, a poro i nyaan ni yákpogèle wáa lǎli ni pe da ni kpáagi bee kàpɔɔn nii pe nyɛnɛ na lè, a syɛɛnnɛʔɛmɛ wɔ́ɔ i fundaanra yákpogéle wáa,

¹³ a gi pye syɔɔn a gbǎn fundaanri yákpogéle kafulogo, ní syɛ́ɛnbèle nyɛnigɛ kafulogo cán bi wàli í, níì cán syɛ́ɛnbèle maa ni yákpogèle wáa gbanʔama fwɔɔ a kàfulogi i lúro léelige.