Ɛsidirasi 10 - Cebaara Bible 2010

Zyefubèle n syɛɛnfeleyi càbala yaʔa

¹ N Ɛsidirasi yaʔa wi i nyaan níì tìgi n too Kolocɔlɔɔ kpáagi yɛ́ʔɛ ma, ní i nyɛ́ɛrigi naa nyɛ́ɛri ní i be kapeeli nyuu ni tèé kánmi naa na a Isirayɛli syɛɛnnɛʔɛmɛ piyɛɛ gbóʔoro wi taana nǎnbèle ní cébèle, ní pìíbèle, a syɛ́ɛnmi tɔ̀nɔ n nyatinnɛʔɛmɛ wo.

² Lǎli bee ni Syekanya wi lè Yehiyɛli jáaw, Elami yòdaʔayi ni, a woro gi joo Ɛsidirasi ma níì wi pye: «Wolo n kapeʔe pye wolo Kolocɔlɔw na, àmɛɛ wolo syɛɛnfeleyaa càbala pɔri lè. Kàjáa tɔ́ɔliw ni, sɔ̀ngumɔ tɛɛtaʔala n sèʔê kòro Isirayɛli ye ma kéeli naa na.

³ Wolo a joogaanna kpéʔele lǎli naa ni ní wolo Kolocɔlɔw ní bi jo wolo a cébèle bee myɛ, ní be pìíbèle yaʔa bi yɛlɛ ní mii kàfɔw syɛ́ɛnrɛ, ní bele wóro ní be cɛ̀lɛ́ wolo Kolocɔlɔw tundunro yɛ́ʔɛ ma lè. Ki a kpéʔele bi yɛlɛ ní làlwaw ní.

⁴ Ki n yɛlɛ mi yìri níì cán kéeli naa i nyɛ mɔ wólo. Wolo a pye ní mɔ ní. Nìrimɛ le, mí kàa pye.»

⁵ Lǎli bee ni a Ɛsidirasi yìri, níì sáriga-wòlobèle kùndigibéle, ní Levii ye, ní Isirayɛli ye myɛw kɔ́ri be kàli bi gi tɛ̀ɛn gee poro joo lè, poro a gi foro. A be kàli.

⁶ A Ɛsidirasi náà yìri n núngo Kolocɔlɔɔ kpáagi yɛ́ʔɛ ma, n sáà jée Yohanan kpaafungi ni, wi lè Eliyasyibi jáaw. Wi jée yaà lè, wi ga búru lìi í, wi ga lɔ̀ʔɔ gbaa í, níì cán wi maa pye kùu káyaʔa na wojo-mí-káribèle kapeʔe kéele na.

⁷ A pe gi jáari Zyuda, ní Zyerusalɛmi myɛw ni níì jo, wojo-mí-káribèle myɛ n yɛlɛ bi peyɛɛ gbóʔoro Zyerusalɛmi ni.

⁸ Nɛɛ ní canya taanri fúngo ni, wee wi ga pye lè wi ga pan n yɛlɛ ní kùndigibèle, ní wolɛɛbèle syɛ́ɛnrɛ ní í, pe a wee bee kɔ́lɔ yárira myɛ syɔɔ wi na, si wi tiimaw nɛnɛ yirige wojo-mí-káribèle syɛɛnkpoʔolomɔ ni.

⁹ A Zyuda, ní Bɛnzyamɛ nǎnbèle myɛ peyɛɛ gbóʔoro Zyerusalɛmi ni cányi taanri fúngo ni, koro n pye yeye kpanjɛrɛ wógi canya toko wógi na. Syɛ́ɛnbèle myɛ maa tɛ́ɛn Kolocɔlɔɔ kpáagi kàcoolo kadàala na. Pe maa ni cɛ̀lɛ́ kéeli bee na, ní àmɛɛ zěgi da ni tuun lè.

¹⁰ Ɛsidirasi wi lè sáriga-wòlow, a woro yìri n yére níì be pye: «Amɛɛ yele syɛɛnfeleyaa càbala pɔri lè, koro n pye kapeʔe n níì kàa fàra Isirayɛli ye kolomi na.

¹¹ Tɔ́ɔliw ni ki n yɛlɛ ye yére yele kapeegèle ni Yawe yele tóolɛɛbèle Kolocɔlɔɔ yɛ́ʔɛ ma, ye wi nyɛnɛ kéeli kpéʔele. Ye yeyɛɛ wàli ye láʔa tári syɛɛnfeleye, ní syɛɛnfeleyi càbala na.»

¹² A syɛɛnkpoʔolomi myɛ gi joo wi ma ní yákpogbɔɔlɔ ní níì jo: «Ɛɛn! Wolo a gi kpéʔele àmɛɛ mɔ gi joo lè.

¹³ Kàjáa syɛ́ɛnmi n nɛʔɛ, ki si i nyɛ zěgi làla, wo si a gbǎn kòro kàfugi na í, gee naa si caa o nyɛ canʔa nibin, wàlá canya siin fáli í. Níì cán bele be kapeele pye wolo ni kéeli naa na lè pe n nɛʔɛ.

¹⁴ Koro na ki n yɛlɛ wolo kùndigibèle í kòro naa syɛɛnkpoʔolomi myɛ sìndɛʔɛ ni. Bele myɛ be nyɛ lè wolo kěyi ni syɛɛnfeleyaa càbala láafɔɔlɔ, poro a ra maa làridɛ̀ɛ́ngèle ni. Kěyi myɛ wólɛɛbéle ní be kútiijoobèle a pínɛ da maa ní be ní, fwɔɔ bi taa wolo Kolocɔlɔw fundanʔagbɔɔrɔ í láʔa wolo na kéeli naa pyele na.»

¹⁵ Zyonatan wi lè Azayɛli jáaw, ní Yaziya wi lè Tikiva jáaw, poro yagana be syɛ́ɛnri bee kábala, Mesyulami, ní Levii ye wów wi lè Syabetayi, a poro fàra be na,

¹⁶ kàjáa wojo-mí-káribèle maa gi kpéʔele n yɛlɛ ní gi ní àmɛɛ ki da joo lè. A be sáriga-wòlow Ɛsidirasi ní narigbaayi kùndigibèle pèle nyɛ́nɛ n wòlo n yɛlɛ ní be tofɔlɛɛyi narigbaaya ní, poro myɛw maa nyɛ́nɛ n wòlo pe mɛ́ɛyi na. A poro tɛ́ɛn yeye kɛɛ wógi cânzelige na bi kéeli bee sɛʔɛ sɛʔɛ.

¹⁷ Nǎnbèle bele myɛ be syɛɛnfeleyaa càbala pɔri lè, a be poro kéeli cɔɔnri n kwɔ́ɔ yezeligi cânzelige na.

Zyefubèle kolomɔfɔɔlɔ mɛ́ɛyɛ

¹⁸ A pèle nyaa sáriga-wòlobèle jàala ni, bele be syɛɛnfeleyaa càbala pɔri lè, poro be nyɛ: Zyozuwe wi lè Yosadaki jáaw, woro jáabèle, n fàra wi senyɛnbèle jàala na, pe lè Maaseya, ní Eliyezɛɛri, ní Yaribi, ní Gedaliya.

¹⁹ A be pínɛ n bɛ̀ɛ gi na ní kàliga ní níì jo poro a poro cébèle yaʔa, si bàpɔlɔ wòlo sáriga poro kolomi kéele na.

²⁰ Imɛɛri yòdaʔayi wòolo be nyɛ bele naa: Hananii, ní Zebadya.

²¹ Harimi yòdaʔayi wòolo si i nyɛ Maaseya, ní Elii, ní Syemayeya, ní Yehiyɛli, ní Ozyasi.

²² Pasyuri yòdaʔayi wòolo si i nyɛ Eliyoyenayi, ní Maaseya, ní Isimayɛli, ní Netaneyɛli, ní Yozabadi, ní Eleyasa.

²³ Levii wóbèle ni: Yozabadi, ní Syimeyii, ní Kelaya, pe wɔ́ɔ̄ yiri lè Kelita, n fàra Petahiya, ní Zyuda, ní Eliyezɛɛri na.

²⁴ Ŋúnuŋùúbèle ni: Eliyasyibi. Kpàánweegèle kɔ̀rɔsiifɔɔlɔ ni: Syalumi, ní Telɛmi, ní Urii.

²⁵ Isirayɛli wozanbèle bele ni Pareyɔsyi yòdaʔayi wòolo: Aramya, ní Yiziya, ní Malikiya, ní Miyamɛ, ní Eleyazari, ní Malikiya, ní Benaya.

²⁶ Elami yòdaʔayi wòolo si i nyɛ: Matanya, ní Zakarii, ní Yehiyɛli, ní Abidii, ní Yeremɔti, ní Elii.

²⁷ Zatu yòdaʔayi wòolo si i nyɛ: Eliyoyenayi, ní Eliyasyibi, ní Matanya, ní Yeremɔti, ní Zabadi, ní Aziza.

²⁸ Bebayi yòdaʔayi wòolo si i nyɛ: Yohanan, ní Hananya, ní Zabayi, ní Atilayi.

²⁹ Banii yòdaʔayi wòolo si i nyɛ: Mesyulami, ní Maluki, ní Adaya, ní Yasyubi, ní Syeyali, ní Aramɔti.

³⁰ Pahati-Mowabi yòdaʔayi wòolo si i nyɛ: Adina, ní Kelali, ní Benaya, ní Maaseya, ní Matanya, ní Besaleyɛli, ní Binuyi, ní Manase.

³¹ Harimi yòdaʔayi wòolo si i nyɛ: Eliyezɛɛri, ní Yisyiya, ní Malikiya, ní Syemayeya, ní Simeyɔn,

³² ní Bɛnzyamɛ, ní Maluki, ní Syemariya.

³³ Hasyumi yòdaʔayi wòolo si i nyɛ: Matinayi, ní Matata, ní Zabadi, ní Elifelɛti, ní Yeremayi, ní Manase, ní Syimeyii.

³⁴ Banii yòdaʔayi wòolo si i nyɛ: Maadayi, ní Amirami, ní Uyɛli,

³⁵ ní Benaya, ní Bedya, ní Keluhu,

³⁶ ní Vanya, ní Meremɔti, ní Eliyasyibi,

³⁷ ní Matanya, ní Matinayi, ní Yasayi,

³⁸ ní Banii, ní Binuyi, ní Syimeyii,

³⁹ ní Syelemya, ní Natan, ní Adaya,

⁴⁰ ní Makinadibayi, ní Syasyayi, ní Syarayi,

⁴¹ ní Azareyɛli, ní Syelemya, ní Syemariya,

⁴² ní Syalumi, ní Amariya, ní Zyozɛfu.

⁴³ Nebo yòdaʔayi wòolo si i nyɛ: Yeyiyɛli, ní Matitya, ní Zabadi, ní Zebina, ní Yadayi, ní Zyowɛli, ní Benaya.

⁴⁴ Poro myɛw maa syɛɛnfeleyaa càbala láa. A cébèle bee pèle pìibēle see be ma.