Ezekyɛli 9 - Cebaara Bible 2010

Zyerusalɛmi kpúmɔnri kéele

¹ Koro kàdoʔo ma a wi yákpogbɔɔlɔ wáa mii líiyi taana níì jo: «Ye nùuni naa, yele bele ye a pye lè kěgi kpúmɔnfɔɔlɔ, ye myɛ nibin nibin, ní kálagi-mí-kwɔ́ɔli yakpumɔnyɔ ní kɔ́yi ni!»

² Wéle, a mii nànbēle kɔrɔni nyaa a be yìri solomɔkulo kàbangi ǹjoʔo ma kpàánweele ma ni maa, pe myɛ nibin nibin si i ní be gàlagíw pyele yakpaliya ní be kɔ́yi ni. Nànwaa n pye be níngi ni ní lɛn búrogo ní, lángirikpolo si i nyɛ wojɔrɔlɔ ní wi cèsiinyungi na. A be pan n baa yére kanyɛɛnri sáriga-wòlo-yafanʔa taana.

³ Isirayɛli Kolocɔlɔw nìjangbɔɔrɔ ti da pye syerubɛnbèle na lè, a di yìri yaà n kári kpáagi kpaaweele ma, á wi nǎnw yeri, wee wi da lɛn búrogi le lè lángirikpoli si i wojɔrɔlɔ ní wi cèsiinyungi na.

⁴ A Yawe wi pye: «Sɔ̀lɔ mi màʔa kěgi nínge ni, Zyerusalɛmi níngi ni, mi fɛ̀ɛ kpúmɔn syɛ́ɛnbèle gbáagéle na, bele be cɛ́ɛn lè, ní i nyaan yanɔnʔɔyi myɛ kéele na yi kpéʔele lè gi ni.»

⁵ A wi gi joo wozanbèle ma a mii gi lóʔo, níì be pye: «Ye taʔa wi na ye jée kěgi ni, ye sa ra kpúmɔn, yele a tée kɔ́ nyinimɛ nyaa í, yele a kɔ́ canmi-cɔɔnrigɔ kpéʔele í!

⁶ Yaa kúu ye be myɛ kwɔ́ɔ, n wolɛɛbèle pínɛ nìgɔcaribèle, ní nàngeele sinján pìcaabèle, ní pìíbèle, ní cébèle ni. Kàjáa wee na fɛ̀ɛ́w ga pye lè yele a kɔ́ tánga wee bee na í, ye séli mii tɛɛcǎngi na!» A be séli nǎnbèle na, wolɛɛbèle bee pe da pye lè kpáagi yɛ́ʔɛ ma.

⁷ A wi be pye: «Ye kpáagi nɔ́nʔɔ, ye kàcoogèle nyìn kúbèle na, ye yiri!» A be yiri n kpúmɔn n màʔa kěgi ni.

⁸ Lǎli ni si be pye ni kpúmɔn lè, mii maa pye mii nibin woyéreo ní, a mii too n yɛ́ɛgi cíbele tári na, ní i yákpoli wáa níì jo: «Ee Kàfɔw Yawe, a mɔ a Isirayɛli wogorobèle myɛ kálagi kwɔ́ɔ lé àmɛɛ mɔ mɔ fundanʔagbɔɔri yàli lè nya Zyerusalɛmi na?»

⁹ A wi mii yari: «Isirayɛli kpáagi, ní Zyuda kpáagi wòolo kolomɔ n tɔ̀nɔ n kpɔ́ʔɔ n sɔ̀lɔ. Tári n nyìn syɛɛnkpoori na, kěgi n nyìn kakolobyeri na, níì cán pe i gi nyuu níì jo: ‹Yawe n tári yaʔa, Yawe o yafyɛn nyaagi í.›

¹⁰ Mii wɔ́ɔgēle, mii a pye nyinimɛ fun, mii a canmi-cɔɔnrigɔ kpéʔele í. Mii a be kapyegèle lúrugo cáan pe nyúnyi ni.»

¹¹ Wéle, nǎnw na lɛn búrogi da pye lè, lángirikpoli si i nyɛ wojɔrɔlɔ ní wi cèsiinyungi na, a woro wi fáliw tɛ̀ɛn kánmi naa na níì jo: «Mii n gi kpéʔele n foro, gee mɔ joo n gbàn mii ma lè.»