Ezekyɛli 8 - Cebaara Bible 2010

Yasunzunri Yawe kpɔ̀ʔɔrɔli kpaʔa ni

¹ A ki ga baa pye yɛ̀ʔɛlɛ kɔrɔni wóli yeye kɔrɔni wóʔo canya kagunɔ wógi na, mii maa pye wodɛ́ɛɔn ní mii kpáagi ni, Zyuda wolɛɛbèle si i nyɛ wodɛ́ɛnbéle ní mii yɛ́ʔɛ ma, a Kàfɔw Yawe kɔ́gi tìgi n too mii na.

² A mii i wéle, a mii yarigaa nyaa, ki kánmi maa syɔɔn wíri. Naà maa séli gi sárigèle na n tìgi táàma, níì séli sárigèle na n lúgu ǹjoʔo ma, koro maa pye gbɛ̀ɛnmaa félege, bee bi daragi lè gbanʔama.

³ A gi kɔlɔ̀ niwirige sánʔa n mii cò ǹjoogannaa na. A pǐli mii yìrige n pye tári ní nyɛ̀ʔɛni nínge ni, níì kári ní mii ní yanyaaya ni, yee yi yìri Kolocɔlɔɔ ma lè, Zyerusalɛmi ma, fungo ma kpàánweeli ma, solomɔkulo kàbangi na, beè yejaagi yasungo nyɛ lè, gee gi yejaagi wáa Yawe na lè.

⁴ Wéle, Isirayɛli Kolocɔlɔw nìjangbɔɔrɔ maa pye yaà, n yɛlɛ ní gi ní àmɛɛ mii da di nyaa yanyaagi ni, jǐnlɔgi ni lè.

⁵ A wi mii pye: «Syɔɔn-pya, nyapiigèle yìrige mi wéle solomɔkulo kàbangi na.» A mii nyapiigèle yìrige n wéle solomɔkulo kàbangi na, a mii wéle n yasungi bee nyaa ki lè yejaagi wóʔo, sáriga-wòlo-yafaangi kpàánweele solomɔkulo kàbangi na, tɛɛ̀jeeli ni.

⁶ A wi mii pye: «Syɔɔn-pya, gee be kpéʔele lè, a mɔ i gi nyaagi lé, gee bee n jo kapeekpoloyi Isirayɛli kpáagi wòolo kpéʔele lè nɛɛ naa, koro ga pye mii i léeli mii tɛɛcǎngi na? Mɔ si a ní kapeekpoloyaa nyaa.»

⁷ Lǎli bee ni a wi mii kɔ́ri n kári kàcooli tɛɛ̀jeele ma. A mii wéle n weʔe nyaa gúngi na.

⁸ A wi mii pye: «Syɔɔn-pya, gúngi fùru.» A mii gúngi fùru, wéle, a weʔe kúun.

⁹ A wi mii pye: «Jée mi yanɔnʔɔbeeyi wéle, yee be kpéʔele nɛɛ naa lè!»

¹⁰ A mii jée ní i wéle, a mii yafulolori niwiriye féleye myɛ, ní yawee-nɔ́nʔɔyi niwiriye féleye myɛ nyaa, Isirayɛli kpáagi wòolo yasunyo myɛ si i nyɛ wogánʔana-wòloyo ní tǒw na n wi màʔa.

¹¹ Isirayɛli kpáagi wolɛɛbèle pèle togoye taanri ní kpɔrigɔ, poro bele nínge ni Syafan jáaw Yaazanya da pye lè, pe maa pye woyérebéle ní yasunyi bee yɛ́ʔɛ ma, pe myɛ nibin nibin si i nyɛ ní nùndaanni yasorigogo yalegéle ní kɔ́yi ni, á nùndanʔa yasorigogo fafaankpɔʔɔ si i yìrigí.

¹² A wi mii pye: «Syɔɔn-pya, a mɔ gi nyaa lé gee Isirayɛli kpáagi wòolo wolɛɛbèle kpéʔele yébilimi ni lè, pe myɛ nibin nibin pe kpaafunyi ni yi nyìn yɛɛcɔɔpiigèle na lè? Níì cán pe i gi nyuu níì jo: ‹Yawe o wolo nyaagi í, Yawe n tári yaʔa.› »

¹³ A wi mii pye: «Mɔ a ní sèʔé kapeekpoloyaa nyaa, yee be kpéʔele lè.»

¹⁴ A wi mii kɔ́ri n kári Yawe kpáagi kpàánweele ma, solomɔkulo kàbangi na. Wéle, càbala n pye yaà wodɛ́ɛnbéle ní ni nyaan Tamuzi kéeli na.

¹⁵ A wi mii pye: «A mɔ gi nyaa lé syɔɔn-pya? Mɔ a ní kapeekpoloyaa nyaa, yee yi kpólo n sɔ̀lɔ yee naa na lè.»

¹⁶ A wi mii kɔ́ri n jée Yawe kpáagi fungoma kàcoolo ni. Wéle, nànbēle toko ní kagunɔ félege n pye yaà Yawe kpɔ̀ʔɔrɔli kpaʔa kpaaweele na, kpáali ní sáriga-wòlo-yafaangi nínge ni, a be kàdoyi wáa Yawe kpɔ̀ʔɔrɔli kpaʔa ma níì yɛ́ɛyi wáa canʔafolomɔ ma ní i tíri ni tuun tári na canʔafolomɔ ma, cángi yɛ́ʔɛ ma.

¹⁷ A wi mii pye: «A mɔ gi nyaa lé syɔɔn-pya? Yanɔnʔɔyi Zyuda kpáagi wòolo kpéʔele lè nɛɛ naa ni mii fúngi taanri, yoro ga nɛʔɛ n yɛlɛ nya ì? A gi si níì yɛlɛ lé be tári nyìn péemi na, si kòro bàā mii fúngi yìrigí? Wéle, pe i kágangi nùuní fínaagèle na.

¹⁸ Mii wɔ́ɔgēle, mii fundanʔagbɔɔrɔtɔw a yarigaa pye. Mii a tée nyinimɛ nyaa í, mii a canmi-cɔɔnrigɔ kpéʔele í. Pe ga ni fúlo ni yákpogèle wáa mii líiweegèle taana, mii a lóʔo be ma í.»