Ezekyɛli 7 - Cebaara Bible 2010

Yawe i làrizanni gàlagí kéele nyuu

¹ Yawe syɛ́ɛnri n nan mii na, wi n jo:

² «Mɔ, syɔɔn-pya, Kàfɔw Yawe wi gee naa joo Isirayɛli tásaligi ma níì jo: ‹Ki n kwɔ́ɔ! Kwɔ́ɔmi i maa, pi n nan tári láʔagéle sicɛrɛ na!

³ Tɔ́ɔliw ni kwɔ́ɔmi i maa mɔ ma. Mii a mii fundanʔari tórigo mɔ kurugo, mii a kútiiw kúun mɔ na bi yɛlɛ ní mɔ kóloyi ní, mii a mɔ yanɔnʔɔyi myɛ wɔʔɔgɔ taʔa mɔ na,

⁴ mii a tée mɔ nyaa nyinimɛ wóo ní í, mii a canmi-cɔɔnrigɔ kpéʔele í. Mii a tɔ̀nɔ́ mɔ yíbe mɔ tánʔaganmi kéele na. Mɔ yanɔnʔɔyi a kòro mɔ níngi ni, yele si a gi cán bi cán mii wi nyɛ Yawe.› »

⁵ Kàfɔw Yawe wi syɛ́ɛnri naa joo níì jo: «Wɔʔɔgɔ, wɔʔɔgɔ nibin pee! Wéle, ki i maa!

⁶ Kwɔ́ɔmi i maa, pi i maa, pi n kòro nyɛ̀nɛ na mɔ kánmi na! Wéle, pi i maa bee!

⁷ Mɔ wee wi nyɛ lè wodɛ́ɛɔn ní tári ni, mɔ na gi nan! Lǎli i maa, cángi i nùuní ni maa, ki lè nyáʔamini canʔa, fundaanra yákpogéle a ní lóʔo nyanbeleyi na í!

⁸ Tɔ́ɔliw ni mii a mii fundanʔagbɔɔri yàli mɔ na, ki a ní mɔn í, fwɔɔ bi sa nan mii fundanʔari tɛɛ̀laʔala na mɔ kánmi na. Mii a kútiiw kúun mɔ na bi yɛlɛ ní mɔ kóloyi ní, mii a mɔ yanɔnʔɔyi myɛ wɔʔɔgɔ taʔa mɔ na.

⁹ Mii a tée nyinimɛ nyaa í, mii a canmi-cɔɔnrigɔ kpéʔele í. Mii a wɔʔɔgi taʔa mɔ na bi yɛlɛ ní mɔ tánʔaganmi ní, mɔ yanɔnʔɔyi a kòro mɔ níngi ni. Yele a gi cán bi cán mii wi nyɛ Yawe, wee wi kpumɔnrɔ kpéʔele lè.

¹⁰ Cángi wéle gee! Ki wéle, ki i maa! Mɔ wógi i maa! Sàbinni n fyɛ́ɛn! Nɛ̀ɛgbɔʔɔgi n folo n yiri!

¹¹ Tanʔari n yìri n pye sàbinnɛ péemi ma, yafyɛn ga níì kòro be ma í, pe nɛʔɛmɛ kafulogo a ní pye beè í, pe nɛʔɛmi ní gi myɛ ní wàa a ní kòro be ni í! Pe o nyaan ni peele be kéeli na í!

¹² Lǎli i maa, cángi i nùuní! Yasyɔɔw ga yɛlɛ waa fundaanra kpéʔele í, yapáraw ga yɛlɛ waa kùu káyaʔa kpéʔele í! Níì cán fundanʔari fànʔa n folo n yiri kěgi syɛɛnnɛʔɛmɛ myɛ kánma na.

¹³ Yapáraw a ní tée wi yariga taa, gee wi pára lè í, àlí wi ga kòro sìi na. Níì cán yanyaagi gi nyɛ be syɛɛnnɛʔɛmi kánma na lè, ki a sàa í. Syɔɔn o syɔɔn kolomi n gi yaʔa wi a gbǎn wiyɛɛ zyɔɔ í.

¹⁴ Pe i búruw wíi, kérigèle myɛ n sámaga n yaʔa, kàjáa wàa faala o syée kapɛɛnni na í. Níì cán mii fundanʔari fànʔa n folo n yiri be syɛɛnnɛʔɛmi kánma na.

Syɔɔn faala a syɔɔ kpúmɔnri ma í

¹⁵ «Ŋɔséew i nyɛ kàfugo ma, káfalagi yáama ní kateekpɔɔgi si i nyɛ fungo ma! Wee wi nyɛ sìnbirigi ni lè, ŋɔséew a wee bee kpóo, wee wi nyɛ kěgi ni lè kateekpɔɔgi ní káfalagi yáama a wee bee lìi.

¹⁶ Pe wogorobèle a fàn bi syɔɔ, pe a pye nyanbeleyi na àmɛɛ jǐnlɔyi kàtogèlē nyɛ lè. Pe myɛ nibin nibin i cɛ́ɛn pe kolomi kéele na.

¹⁷ Kɔ́yi myɛ fànʔa n kwɔ́ɔ, yégunyi myɛ i nyangi ni ŋuu lɔ̀ʔɔ.

¹⁸ Pe i gɔ̀nvaʔaya nii buroyo, fyáakpɔɔri si i be tɔ́ngi, fɛ̀ɛrɛ n yɛ́ɛyi myɛ tɔ́n, pe nyúnyi myɛ n kùnu.

¹⁹ Pe a be wáliw wáa kàlari-kóloyi ni, pe tɛ́ɛw si ba pye yafɔnʔɔgɔ. Pe wálifiiw, ní be tɛ́ɛw a gbǎn be syɔɔ Yawe fundanʔagbɔɔri canʔa na í. Pe a gbǎn be yákpodiriyi tín í, wàlá bi be fícarigèle nyìn í. Níì cán koro gi pye pe kàdɛnɛ-gbírigegi, ní be kolomi nyúngo.

²⁰ Pe n be nɛ̀ɛnyɛnɛgi pye pe fèrejǎnri, pe n di tàa pye yariyaa niwiriye, yi lè be yanɔnʔɔyi, ní be kapeekpoloyi. Koro na mii a di tàa kpéʔele be ma yafɔnʔɔyɔ.

²¹ Mii a di le nibɔɔnnɔ kɔ́yɔ ni pe di fuguri láa, bi di pye tári kakazuubéle yakoliro, koro ga pye pe di kpéʔele yafaʔaga.

²² Mii a kàdoʔo wáa be ma, syɛ́ɛnbèle a mii lɔ́ri tɛɛkɔngɔ nɔ́nʔɔ. Nijamaya a jée gi ni bi gi nɔ́nʔɔ.

²³ Nyɔ̀ʔɔdiriye sámaga! Níì cán tári n nyìn syɛɛnkpoori kútii na, kěgi n nyìn kaŋágabyeri na.

²⁴ Syɛɛnfeleyi yi pee n sɔ̀lɔ lè, mii a yoro kɔ́ri yi pan jàngó yi ba be kpáayi syɔɔ taa. Mii a fànnɛʔɛgɛfɔbèle nɛ̀ɛgbɔʔɔgɔ kwɔ́ɔ, pe tɛɛcǎnyi a nɔ́nʔɔ.

²⁵ Fyáakpɔɔri i maa! Pe i yɛɛ̀nyingi caa, ki si a taa í.

²⁶ Wɔʔɔgaa a ra taari wɔʔɔgaa na, kaloʔobɛnʔɛ a ra fàrá kaloʔobɛnʔɛ na. Pe i kanyaajooo yíbe yanyaaya na, làlwaw si a fɔ̀n sáriga-wòloo ma, yarili a fɔ̀n wolɛɛbèle ma.

²⁷ Fànʔafɔw i nyɛ kùu káyaʔa na, fànʔafɔbili n fûnnyaʔamira le burogo, tári syɛ̀ɛnnɛ kɔ́yɔ i cɛ̀lɛ́. Mii a be cò bi yɛlɛ ní be tánʔaganmi ní, mii a kútiiw kúun be na bi yɛlɛ ní be tiimaa kútiiw ní, pe a gi cán bi cán mii wi nyɛ Yawe.»