Ezekyɛli 6 - Cebaara Bible 2010

Dee di joo lè yasunzunbèle kánma na

¹ Yawe syɛ́ɛnri n nan mii na wi n jo:

² «Syɔɔn-pya, mɔ yɛ́ɛgi fíige Isirayɛli nyanbeleyi kàbaan na, mí kérigèle nyaa mi joo yi kánmi na.

³ Mɔ a gi joo si jo: ‹Isirayɛli nyanbeleyi, ye Kàfɔw syɛ́ɛnrɛ lóʔo, ti lè Yawe syɛ́ɛnri! Kàfɔw Yawe wi syɛ́ɛnri naa joo nyanbeleyi, ní dǎndamayi ma, ní gòrógoroweeyi, ní jǐnlɔyi ma níì jo: Wéle, mii i ŋɔséew yiri ni maa yele kánmi na. Mii a yele sáriga-wòlo-tɛ́ɛyi kálagi.

⁴ Yele sáriga-wòlo-yafaanyi a kálagi. Yele nùndaanni yasorigoro pɛ́ɛgéle a tɔ́nʔɔnɔ, mii si yele woguubèle cáan yele yasunyi yɛ́ʔɛ ma.

⁵ Mii a Isirayɛli ye woguubèle cáan be yasunyi yɛ́ʔɛ ma, mii a yele kaceri cariga bi yele sáriga-wòlo-yafaanyi màʔa.

⁶ Tɛʔɛ o tɛʔɛ ni yele nyɛ lè wodɛ́ɛnbéle ní, yele kěyi a pye gurubɛɛrɛ, yele sáriga-wòlo-tɛ́ɛyi si pye tɛɛ̀kalagiya, yele kolomɔ sáriga-wòlo-yafaanyi í too, yele yasunyi a jabagi bi kwɔ́ɔ yiri yaà. Yele nùndaanni yasorigoro yalegéle a kpúmɔn jabagi, yele fáliw í kurugo láʔa yaà.

⁷ Syɛ̀ɛnnɛ saʔa a kpóo cáan yele níngi ni. Yele a gi cán bi cán mii wi nyɛ Yawe.

⁸ Kàjáa mii a yele pèle cɛɛri yaʔa be kòro sìi na, bele pe a syɔɔ ŋɔséew ma lè syɛɛnfeleyi nínge ni, lǎli ni yele a cariga bi kári lè tátɛɛyɛ saʔa ni.

⁹ Lǎli bee ni bele pe ga kòro yele ni lè syɛɛnfeleyi nínge ni, beè pe a pye lè pulobèlē, pe a sɔ̀ngí taa mii kéeli na, níì cán mii a be kanɔnʔɔbye-fúnyi tɔ́nʔɔnɔ, yoro yee yi da wàli n léeli mii na lè, á be kanɔnʔɔri nyapiigéle kòro kanɔnʔɔri na ni kpéʔele ní be yasunyi ní. A be wéle láagi kwɔ́ɔ peyɛɛ ni kapeeyi myɛ kéele na, yee be kpéʔele lè pe yanɔnʔɔyi báriga ni.

¹⁰ Pe a gi cán bi cán mii wi nyɛ Yawe, si wɔ́ɔ gi cán àmɛɛ mii jo mii a kapeegi bee taʔa poro na lè, gee bee o nyɛ gbanzan í.› »

¹¹ Kàfɔw Yawe wi syɛ́ɛnri naa joo níì jo: «Kadaagèle kóri keyɛɛ na, mí yédaali súu tári na mí jo: ‹Céì!› Nɔ́nʔɔbeeri myɛ kéele na, dee Isirayɛli kpáagi wòolo kpéʔele lè, poro bele ŋɔséew, ní kateekpɔɔgi, ní káfalagi yáama a kpóo cáan lè.

¹² Wee wi ga léeli lè káfalagi yáama a wee bee kpóo, wee wi ga nùuni lè ŋɔséew a wee bee kpóo cáan, wee wi ga kòro lè kěgi ni, gee taana pe a tɛ́ɛn kapɛɛnni kánma na lè, kateekpɔɔgi a wee bee kpóo. Mii a tɔ̀nɔ́ gi pye be na fwɔɔ bi sa nan mii fundanʔagbɔɔri tɛɛ̀laʔala na.

¹³ Lǎli ni pe woguubèle ga baa pye lè pe yasunyi nínge ni, n be sáriga-wòlo-yafaanyi màʔa dǎndama-tɔ́nɔyi myɛ, ní nyanbeleyi myɛ ǹjoyo ni, ní tiipiriyi myɛ, ní syɛni tiitɔnyi myɛ láara ni, beè pe da ni nùndaanteeli yárira sórogi lè be yasunyi myɛ ma, lǎli bee ni yele a gi cán bi cán mii wi nyɛ Yawe.

¹⁴ Mii a mii kɔ́gi sánʔa bi taʔa be na. Mii a tári kàriga tɛɛwaʔa bi sɔ̀lɔ, ní tɛɛ̀kalagiga bi sɔ̀lɔ Dibila fìími tára na, ní tɛʔɛ o tɛʔɛ ni pe ga tɛ́ɛn lè. Pe a gi cán bi cán mii wi nyɛ Yawe.»