Ezekyɛli 5 - Cebaara Bible 2010

Kolocɔlɔɔ a Isirayɛli ye wɔʔɔ

¹ «Mɔ si na, syɔɔn-pya, ŋɔséetàaɔn láa mi pye bàʔajɔɔ-kùnu-ŋɔ́nɔ, wi tɛ́ʔɛ mi mɔ nyúngi, ní mɔ baʔajɔɔw kùnu, koro kàdoʔo ma, mí cúlo láa mi di tíla tíla.

² Tɛ́ɛnni canya ga foro kěgi taana kapɛɛnni kánma na lǎli ni lè, mɔ a di tílayi taanri wógaa láa bi sórigo naanyìnge ni, kěgi nínge ni, mí tílagee láa mi kpúmɔn ní ŋɔséew ní mi kěgi màʔa, mí gee láa mi kóri mi wáa káfalagi kurugo. Mii a ba ŋɔséew kɔ́n bi taʔa be na.

³ Mí di tàa cɛɛri láa mi pwɔɔ mɔ buronyɔɔw ni.

⁴ Mí ní dee bee tàa cɛɛri láa mi wáa náagi ni, mi toro sórigo náagi ni. Naà a yiri yaà Isirayɛli kpáagi wòolo myɛ kánma na.»

⁵ Kàfɔw Yawe wi syɛ́ɛnri naa joo níì jo: «Zyerusalɛmi wii, mii maa wi télege tári syɛɛnfeleye nínge ni, ní tátɛɛyi yi wi màʔa lè,

⁶ a wi si céemɛ le wiyɛɛ ni mii làlwaw kajoogéle ní mii làlwaw kèlē kánma na ní peemɛ ní n sɔ̀lɔ tári syɛɛnfeleye na, ní tátɛɛyi na yi wi màʔa lè, níì cán pe n mii làlwaw kajoogéle yaʔa, pe o táanri ni yɛlɛgi ní mii làlwaw kèlē ní í.

⁷ Gee bee na Kàfɔw Yawe jo: ‹Ncan yele n yeyɛɛ bye niceebéle n sɔ̀lɔ syɛɛnfeleyi na yi yele màʔa lè, yele ga tánʔa n yɛlɛ ní mii làlwaw kèlē ní í, wàlá n mii làlwaw kajoogéle foro í, yele si ga wɔ́ɔ̀ gi kpéʔele n yɛlɛ ní syɛɛnfeleyi kalɛɛgéle ní yi yele màʔa lè í.›

⁸ Gee bee na Kàfɔw Yawe jo: ‹Mii wɔ́ɔgēle! Ní mɔ ní mii cáan. Mii a mii kútiiw kèlē kpéʔele foro mɔ níngi ni tári syɛɛnfeleye nyɛ́nɛ na.

⁹ Mii si a gi kpéʔele mɔ na, mɔ yanɔnʔɔyi myɛ kéele na, gee gi lè mii da kɔ́ɔ̀ gi kpéʔele í, mii si a ní wɔ́ɔ gi felege kpéʔele í.

¹⁰ Koro na tofɔɔlɔ a ba ra be pìibēle káa mɔ níngi ni, pìibēle í wɔ́ɔ ra be tòōlo káa. Mii a mii kútiiw kèlē kpéʔele foro mɔ na, bele myɛ pe ga kòro mɔ ma lè, mii a be cariga káfalagi kàbanya myɛ na.› »

¹¹ Kàfɔw Yawe n jo: «Koro na mii woweew mɛ́ʔɛ na, àmɛɛ mɔ mii tɛɛcǎngi nɔ́nʔɔ lè ní mɔ katoolɛɛri myɛ, ní mɔ yanɔnʔɔyi myɛ ní, mii a wɔ́ɔ láʔa mɔ na, mii a tée mɔ nyaa nyinimɛ wóo ní í, mii wɔ́ɔgēle, mii a gi kpéʔele nyinimɛ fun.

¹² Káfalagi yáama, ní kateekpɔɔgi a mɔ syɛ́ɛnbèle tílataanri wógaa kpóo mɔ níngi ni, ŋɔséew si tílagee kpóo cáan bi mɔ màʔa, mii si gee cariga bi tórigo káfalagi kàbanya myɛ na, si ŋɔséew kɔ́n bi taʔa be na.

¹³ Mii fundanʔari a kári fwɔɔ sa nan láʔali na. Mii a mii fundanʔagbɔɔri cáan be na mii fúngi si tìgi, mii a niyɛɛ fúngi nyíngi, pe a gi cán bi cán mii Yawe wi gi joo ní yejaʔa ní, níì gi kpéʔele be na fwɔɔ n sáà nan mii fundanʔagbɔɔri láʔala na.

¹⁴ Mii a mɔ kpéʔele gurubɛɛrɛ, ní tɛɛfaʔaga tári syɛɛnfeleye nínge ni, yee yi mɔ màʔa lè, ní kozɔ̀lɔbèle myɛ nyɛ́nɛ na.

¹⁵ Lǎli ni mii ga mii kútiiw kèlē kpéʔele n foro mɔ na lè ní fundanʔara, ní fundanʔagbɔɔrɔ ní, ní fundanʔagbɔɔrɔ kpúmɔnrɔ ní, mɔ a pye faʔara yála, ní tɛʔɛlɛgɛ yála, ní sàmina yála, ní fyáara yáriga syɛɛnfeleyi ma yi mɔ màʔa lè, mii Yawe wi jo nya.

¹⁶ Gàlagíw ŋáaya yi lè kateekpɔɔgi wóyo, lǎli ni mii ga yee bee tɛ́ʔɛ bi be ŋɔɔn lè, yoro yee yi sámaga n kpéʔele bi gàlagí pye lè, mii a yee bee ŋɔɔn bi yele kálagi. Níì cán mii a kateekpɔɔgi fàra yele wɔʔɔyi na, mii a lìíli ceri láʔa yele na.

¹⁷ Mii a kateekpɔɔgi, ní yaweepeeyi tórigo yele kurugo, dee bee a mɔ bɔ̀nɔ pìibēle ni, káfalagi yáama, ní sìsyaanw a sɔ̀lɔ mɔ níngi ni. Mii a ŋɔséew yaʔa wi ba too mɔ na. Mii Yawe wi jo nya.»