Ezekyɛli 48 - Cebaara Bible 2010

Solomɔkulo kàbangi syɛɛnfeleye lɛɛgéle

¹ Syɛɛnfeleyi mɛ́ɛyɛ yi nyɛ yee naa. Nlaa yaà solomɔkulo láʔali ma, bàā syée Hetilɔn kólogi sɔ́lɔgɔmɔ ni, bi fala Hamati kàbangi na, n kári Hasaari-Enɔn ma, Damasi láʔagologi na solomɔkulo ma, Hamati kàbangi na, n séli canʔafolomɔ ma n sáà nan canʔajeemɛ na, koro i nyɛ Dan syɛɛnfelegi wóʔo.

² N séli Dan láʔagologi na canʔafolomɔ ma n sáà nan canʔajeemɛ na, koro i nyɛ Azɛɛri syɛɛnfelegi wóʔo.

³ N séli Azɛɛri láʔagologi na canʔafolomɔ ma n sáà nan canʔajeemɛ na, koro i nyɛ Nɛfitalii syɛɛnfelegi wóʔo.

⁴ N séli Nɛfitalii láʔagologi na canʔafolomɔ ma n sáà nan canʔajeemɛ na, koro i nyɛ Manase syɛɛnfelegi wóʔo.

⁵ N séli Manase láʔagologi na canʔafolomɔ ma n sáà nan canʔajeemɛ na, koro i nyɛ Efirayimi syɛɛnfelegi wóʔo.

⁶ N séli Efirayimi láʔagologi na canʔafolomɔ ma n sáà nan canʔajeemɛ na, koro i nyɛ Wurubɛn syɛɛnfelegi wóʔo.

⁷ N séli Wurubɛn láʔagologi na canʔafolomɔ ma n sáà nan canʔajeemɛ na, koro i nyɛ Zyuda syɛɛnfelegi wóʔo.

Yawe lɛɛli

⁸ N séli Zyuda láʔagologi na canʔafolomɔ ma n sáà nan canʔajeemɛ na, koro a pye tɛ́ɛgee yele a yirige bi yaʔa lè, ki kpɔ́ʔɔganmi a pye cúlobéle kɛɛ ní siin ní tíla, ki tɔnɔganmi si pye àmɛɛ lɛɛgèle gele nyɛ lè bi séli canʔafolomɔ ma bi sa nan canʔajeemɛ na, tɛɛcǎngi si pye níngi ni.

⁹ Tɛɛgee yele a yirige bi yaʔa Yawe ma lè, ki tɔnɔganmi a pye cúlobéle kɛɛ ní siin ní tíla, ki kpɔ́ʔɔganmi si pye cúlobéle kagunɔ.

¹⁰ Sáriga-wòlobèle wólo li a pye lɛɛjanni bee, ki solomɔkulo kàbangi tɔnɔganma a pye cúlobéle kɛɛ ní siin ní tíla, ki canʔajeemɛ kabangi kpɔ́ʔɔganma si pye cúlobéle kagunɔ, ki canʔafolomɔ kabangi kpɔ́ʔɔganma í pye cúlobéle kagunɔ, ki wòrogulo kàbangi tɔnɔganma si pye cúlobéle kɛɛ ní siin ní tíla, Yawe tɛɛcǎngi si pye níngi ni.

¹¹ Koro a pye sáriga-wòlobèle wóʔo, poro bele be wòlo Sadɔki pìíbèle nínge ni n yaʔa kɔlɔ̀ na lè, poro bele be kòro mii fáliw na ni kpéʔele lè pe ga téè pùuni n láʔa lǎli ni Isirayɛli ye da ni pùuní ni láari lè í, ní àmɛɛ Levii ye pùuni n láʔa lè í.

¹² Kánmi bee na lɛɛlɛ a pye be ma, lee li a wòlo lè tári lɛɛjandeele ni, Levii ye láʔagologi lɛ̀ʔɛlɛ ni.

¹³ Levii ye wógi a sɔ́lɔgɔ sáriga-wòlobèle láʔagologo nyɔ́ɔ na bi kári, ki tɔnɔganmi a pye cúlobéle kɛɛ ní siin ní tíla, ki kpɔ́ʔɔganmi si pye cúlobéle kagunɔ, tɔnɔganmi myɛ a pye cúlobéle kɛɛ ní siin ní tíla, kpɔ́ʔɔganmi si pye kagunɔ.

¹⁴ Pe a gbǎn yafyɛn pára gi ni í. Ki a gbǎn fàli í, wàlá bi syɔɔ kaan wàa ma í, níì cán ki n yaʔa kɔlɔ̀ na Yawe ma.

Kěgi lɛɛgéle ní fànʔafɔbili wólo

¹⁵ Cúlobèle siin ní tíla wi a kòro lè kpɔ́ʔɔganmi na cúlobèle kɛɛ ní siin ní tíla ni, toro a córo fòrobáa tɛ́ʔɛ bi yaʔa kěgi ma, ní syɛ́ɛnbèle tɛɛkòroyo, ní yaweenaʔa-tɛ́ɛgi kéele na, kěgi si pye níngi ni.

¹⁶ Ki tímanami wéle bee: Solomɔkulo kàbangi a pye mɛ́tiribéle selebinnɛ ní sirakele ní togoye siin ní kpɔrigɔ, wòrogulo kàbangi í pye mɛ́tiribéle selebinnɛ ní sirakele ní togoye siin ní kpɔrigɔ, canʔafolomɔ kabangi í pye mɛ́tiribéle selebinnɛ ní sirakele ní togoye siin ní kpɔrigɔ, canʔajeemɛ kabangi i pye mɛ́tiribéle selebinnɛ ní sirakele ní togoye siin ní kpɔrigɔ.

¹⁷ Tɛɛgaa a kúun yaʔa bi kěgi màʔa, solomɔkulo ma mɛ́tiribéle togoye kɔrɔni ní kagunɔ, wòrogulo ma togoye kɔrɔni ní kagunɔ, canʔafolomɔ ma togoye kɔrɔni ní kagunɔ, canʔajeemɛ ma togoye kɔrɔni ní kagunɔ.

¹⁸ Tɛɛsangi ki a kòro lè bi sɔ́lɔgɔ kári tɛɛcǎngi kàbandɔnɔgɔ nyɔ́ɔ na, ki a pye canʔafolomɔ ma cúlobéle kagunɔ, canʔajeemɛ ma cúlobéle kagunɔ, koro a sɔ́lɔgɔ kári tɛɛcǎngi nyɔ́ɔ na, yáriree ti a ra taagi gi ni lè, bele be báara kěgi ma lè, ti a pye bele bee lìile.

¹⁹ Bele si pe a ra báara kěgi ma lè, bele pe a láa Isirayɛli syɛɛnfeleyi myɛ ni lè, poro pe a ra di fála.

²⁰ Tɛ́ɛgee myɛ ki a yirige bi yaʔa lè, ki tɔnɔganmi a pye cúlobéle kɛɛ ní siin ní tíla, ki kpɔ́ʔɔganmi í pye cúlobéle kɛɛ ní siin ní tíla. Yele a tílaya sicɛrɛ wógi yirige tɛɛcǎngi ni, koro í pye kěgi wóʔo.

²¹ Gee si ki a kòro lè, koro a pye fànʔafɔbili wóʔo, tɛɛcǎngi kàbanya siin na, ní kěgi wóʔo kàbaan na, bi sɔ́lɔgɔ kári cúlobèle kɛɛ ní siin ní tíla wógi nyɔ́ɔ na pe yirige n yaʔa lè, bi kári fwɔɔ sa nan canʔafolomɔ, ní canʔajeemɛ tɛɛ̀laʔali na, cúlobèle kɛɛ ní siin ní tílaw sɔ́lɔgɔmɔ ni, canʔajeemɛ kabangi tɛɛ̀laʔala ma, koro a tímana kári sèjira lɛɛgèle sɔ́lɔgɔmɔ ni. Koro a pye fànʔafɔbili wóʔo. Lɛɛjanni, ní kpáagi sáriga-wòlo-tɛ́ʔɛ si pye níngi ni.

²² Levii ye wógi sɔ́lɔgɔmɔ, ní kěgi wóʔo sɔ́lɔgɔmɔ, gee ki a pye lè fànʔafɔbili wóʔo, ki a pye níngi ni Zyuda tɛɛ̀laʔali, ní Bɛnzyamɛ tɛɛ̀laʔali nínge ni. Koro a pye fànʔafɔbili wóʔo.

Wòrogulo kàbangi syɛɛnfeleye lɛɛlɛ

²³ Syɛɛnfeleyi wozanya wóyo wéle yee: N séli canʔafolomɔ ma n sáà nan canʔajeemɛ na, koro a pye Bɛnzyamɛ syɛɛnfelegi wóʔo.

²⁴ N séli Bɛnzyamɛ láʔagologi na canʔafolomɔ ma n sáà nan canʔajeemɛ na, koro a pye Simeyɔn syɛɛnfelegi wóʔo.

²⁵ N séli Simeyɔn láʔagologi na, canʔafolomɔ ma n sáà nan canʔajeemɛ na, koro a pye Isakari syɛɛnfelegi wóʔo.

²⁶ N séli Isakari láʔagologi na, canʔafolomɔ ma n sáà nan canʔajeemɛ na, koro a pye Zabulɔn syɛɛnfelegi wóʔo.

²⁷ N séli Zabulɔn láʔagologi na, canʔafolomɔ ma n sáà nan canʔajeemɛ na, koro a pye Gadi syɛɛnfelegi wóʔo.

²⁸ N séli Gadi láʔagologi na, wòrogulo kàbangi wóʔo a láa yaà bi séli Tamari ma bi kári sa nan Meriba lǒgi na Kadɛsyi ma, fwɔɔ bi sa nan lòcoologi na Sólomi Lòkpɔʔɔ kabaan na.

²⁹ Tári bee yele a lɛɛ Isirayɛli syɛɛnfeleyi na ní gɔ̌nwáara ní di pye be kɔrigɔ, toro ti a pye be lɛɛgèle, Kàfɔw Yawe wi jo nya.

Zyerusalɛmi kpàánweegèle kɛɛ ní siin kéele

³⁰ Kěgi tɛɛ̀jeegéle ge nyɛ gele naa: Solomɔkulo kàbangi na gi nyɛ lè mɛ́tiribéle selebinnɛ ní sirakele ní togoye siin ní kpɔrigɔ,

³¹ kěgi kpàánweegéle a pye bi yɛlɛ ní Isirayɛli syɛɛnfeleyi mɛ́ɛyɛ ní, kpàánweegéle taanri a pye solomɔkulo ma, kpàánweelaa a pye Wurubɛn wólo, kpàánweelaa í pye Zyuda wólo, kpàánweelaa í pye Levii wólo.

³² Canʔafolomɔ kabangi na ki nyɛ lè mɛ́tiribéle selebinnɛ ní sirakele ní togoye siin ní kpɔrigɔ, kpàánweegéle taanri a pye yaà, kpàánweelaa a pye Zyozɛfu wólo, kpàánweelaa í pye Bɛnzyamɛ wólo, kpàánweelaa í pye Dan wólo.

³³ Wòrogulo kàbangi na ki nyɛ lè mɛ́tiribéle selebinnɛ ní sirakele ní togoye siin ní kpɔrigɔ, kpàánweegéle taanri a pye yaà, kpàánweelaa a pye Simeyɔn wólo, kpàánweelaa í pye Isakari wólo, kpàánweelaa í pye Zabulɔn wólo.

³⁴ Canʔajeemɛ kabangi na ki nyɛ lè mɛ́tiribéle selebinnɛ ní sirakele ní togoye siin ní kpɔrigɔ, kpàánweegéle taanri a pye yaà, kpàánweelaa a pye Gadi wólo, kpàánweelaa í pye Azɛɛri wólo, kpàánweelaa í pye Nɛfitalii wólo.

³⁵ Ki màʔa-mí-kpàraw tò a pye mɛ́tiribéle selebingéle sicɛrɛ ní saala kagunɔ. Bi séli cángi bee na, kěgi mɛ́ʔɛ a pye: «Yawe i nyɛ nɛɛ naa.»