Ezekyɛli 47 - Cebaara Bible 2010

Kpɔ̀ʔɔrɔli kpaʔa púloweele kéele

¹ A wi kári ní mii ní kpáagi tɛɛ̀jeele ma. Wéle, lɔ̀ʔɔ maa ni púlo ni yirigi kpáagi tɛɛ̀jeele láara ni canʔafolomɔ ma, níì cán kpáagi yɛ́ʔɛ maa wáa canʔafolomɔ ma. Lǒgi maa ni tíri táàma kpáagi kàliige kabangi na, sáriga-wòlo-yafaangi wòrogulo ma.

² A wi mii yirige solomɔkulo kàbangi kpàánweele kólogo ni, níì mii pye a mii i máari kàfugo ma fwɔɔ n taa n sáà nan kàfugo ma kpàánweeli na li yɛʔɛ̀ wáa lè canʔafolomɔ ma, wéle, lǒgi maa ni fóo ni yirigi kàliige kabangi na.

³ Lǎli ni nǎnw kári lè canʔafolomɔ kabangi na mɛɛnnɛ n pye wi ma kɔ́gi ni, a wi sáà mɛ́tiribéle saala siin ní dabata tímana. Lǎli bee ni a wi i mii jelegi lǒgi na, lǎli ni wi mii jelegi lè, lǒgi maa nan mii ma kajinlemi na.

⁴ A wi níì mɛ́tiribèle pèle saala siin ní dabata tímana ní ní i mii jelegi lǒgi na, lǎli ni wi mii jelegi lè, lǒgi maa nan mii ma yégunyi na. A wi níì mɛ́tiribèle pèle saala siin ní dabata tímana ní ní i mii jelegi, lǎli ni wi mii jelegi lè, lǒgi maa nan mii ma sárigèle na.

⁵ A wi níì mɛ́tiribèle pèle saala siin ní dabata tímana. Ki si maa kàri n pye lònɛʔɛgɛ, gee gi lè mii da pye bi gbǎn gi jeli í, níì cán lǒgi maa tɔ̀nɔ n cùru n pye fwɔɔ mɔ í da nyángi gi ni. Ki maa pye lònɛʔɛgɛ, gee gi lè syɔɔn a gbǎn gi jeli í.

⁶ A wi mii pye: «Syɔɔn-pya, mɔ n gi nyaa kɛ̀ɛ?» A wi kári ní mii ní, níì lúru n pan ní mii ní lònɛʔɛgi nyɔ́ɔ ma.

⁷ Lǎli ni wi lúru n pan ní mii ní lè, wéle, tiinɛʔɛrɛ maa pye yaà lònɛʔɛgi nyɔ́ɔ na jeligɔyi siin na.

⁸ A wi mii pye: «Lǒgi naa i syée canʔafolomɔ tɛ́nɛmi kàbaan na, ki i tíri ni jǐn Araba ni, bi sa jée sólomi lɔ̀ʔɔ ni. Lǎli ni ki ga sáà jée sólomi lɔ̀ʔɔ ni lè, ki lǒyi a kàri wojanya ní.

⁹ Tɛ́ɛyee myɛ ni lònɛʔɛgi ga fóo n nan lè, sìi yála o sìi yála li fíigi ni máari lè li a sìi taa. Fánɛʔɛrɛ a pye yaà, níì cán lǒgi naa ga nan tɛ́ɛgee na lè lǒyi a kàri wojanya ní, sìi a pye tɛ́ɛyi myɛ ni beè lònɛʔɛgi ga nan lè.

¹⁰ Lǎli bee ni cɔ̀ɔwáabéle a ra kòró yaà ki nyɔ́ɔgi na. Bi séli Ɛn-Gedii na fwɔɔ bi sa nan Ɛn-Egilayimi na, pe a ra cɔ̀ɔ́bèle cɛ̀ɛ́ yaà. Fábèle bee a pye àmɛɛ sólomi lòkpɔʔɔ faala félege nyɛ lè, pe a nɛʔɛ gbanʔama.

¹¹ Gi fàduluyi, ní gi pùndɛɛyi lòyo si a nyɔɔ í, yi a yaʔa sólomi ma.

¹² Tiisanyi féleye myɛ a ra fíin lònɛʔɛgi kàgomɔ na, ki lógbebèle siin na. Yi wári a tée ra fánagi í, yi yasanri a ra kwóo í, yi a ra yasanvɔnrɔ sangi yeʔe o yeʔe, níì cán ki lógi n yìri tɛɛcǎngi ma. Yi yasanri a pye lìile, yi wári si pye tiinmɛ.»

Yawe n Isirayɛli láʔagoloyi kúun

¹³ Kàfɔw Yawe wi syɛ́ɛnri naa joo níì jo: «Tári láʔagoloyo yi nyɛ yee naa, dee yele a lɛɛ lè kɔrigɔ Isirayɛli syɛɛnfeleyi kɛɛ ní siin na. Zyozɛfu si a lɛɛgéle siin taa.

¹⁴ Yele myɛ kɔ́riyi lɛɛgéle a pye sèjira, níì cán mii n mii kɔ́gi yìrige níì kàli yele tóolɛɛbèle ma níì jo mii a di kaan be ma. Koro na tári bee a ba lɛɛ yele na kɔrigɔ.

¹⁵ Tári láʔagoloyo yi nyɛ yee naa: Solomɔkulo kàbangi láʔagologo a séli Sólomi Lòkpɔʔɔ na Hetilɔn kólogi na bi kári sa nan Sedadi tɛɛ̀jeeli,

¹⁶ ní Hamati, ní Berota, ní Sibirayimi na, Damasi láʔagologi, ní Hamati láʔagologi nínge ni, ní Hasɛɛri-Hatikɔn wi nyɛ lè Horan láʔagologi kàbaan na.

¹⁷ Kánmi bee na láʔagologi a pye, bi séli yaà sólomi lɔ̀ʔɔ na bi sa nan Hasari-Enɔn na, ki lè Damasi láʔagologi na, ní Safɔn wi lè solomɔkulo kàbangi na, ní Hamati láʔagologi na, koro ki a pye solomɔkulo kàbangi.

¹⁸ Canʔafolomɔ kabangi a pye Zyuridɛn, wi lè Horan, ní Damasi níngi ni, ní Galaadi, ní Isirayɛli tári nínge ni. Yele a gi tímana bi séli solomɔkulo kàbangi láʔagologo na bi kári fwɔɔ sa nan canʔafolomɔ kabangi solomɔ lɔ́ʔɔ na, koro ki a pye canʔafolomɔ kabangi.

¹⁹ Wòrogulo kàbangi wóʔo a séli Tamari na, bi kári fwɔɔ sa nan Meriba lògi na, Kadɛsyi ma, si kári fwɔɔ bi sa nan lókologi na Sólomi Lòkpɔʔɔ kabaan na, koro ki a pye wòrogulo kàbangi láʔagologo, wòrogulo ma.

²⁰ Sólomi Lòkpɔʔɔ ki a pye canʔajeemɛ kabangi bi séli láʔagologi na bi sa nan Hamati tɛɛ̀jeeli na, koro ki a pye canʔajeemɛ kabangi.

²¹ Yele a tári bee lɛɛ yeyɛɛ na bi yɛlɛ ní Isirayɛli syɛɛnfeleyi nyɔ́ɔ ní.

²² Yele a di lɛɛ yeyɛɛ na kɔrigɔ ní gɔ̌nwáara ní ti pye yele ní nibɔnbèle wóro, poro bele pe baa tɛ́ɛn yele níngi ni lè, poro bele pe jaafɔɔlɔ see yele níngi ni lè, yele a be córo àmɛɛ kànɔɔnnɔ nyɛ lè Isirayɛli ye níngi ni. Pe a taa ní yele ní kɔ́rigi lɛɛlɛ na, ní gɔ̌nwáara ní, Isirayɛli syɛɛnfeleyi nínge ni.

²³ Syɛɛnfelegee wòolo nínge ni nibɔnw ga tɛ́ɛn lè poro níngi ni yele a wi kɔ́rigi kaan wi ma, Kàfɔw Yawe wi jo nya.»