Ezekyɛli 46 - Cebaara Bible 2010Gee gi jo fànʔafɔbili yagana kéele na lè 1 «Kàfɔw Yawe wi syɛ́ɛnri naa joo níì jo: ‹Fungo ma kadàali kpàánweele li nyɛ canʔafolomɔ kabangi na lè, li a kòro wodɔnnɔ ní fáliw canya kɔrɔni fúngo ni, kàjáa li a múgu cândɛnɛgi canʔa na, si wɔ́ɔ múgu yevɔngi na. 2 Fànʔafɔbili a sɔ̀lɔ kàfugo ma kpàánweeli nìkpanʔa kólogo ni bi jée sa yére kpaaweeli kɔ̀ritelige taana. Sáriga-wòlobèle a li sáriga-sórigow ní li pínɛnyɛnnɛgi sáriga wòlo. Li a kpùmɔnɔ kpàánweeli tɛɛ̀jeele na, si lúru yiri, kpàánweeli si a tɔ́n í bi taa ba nan cângwɔɔgi nyɔ́ɔ na. 3 Tári syɛ̀ɛnnɛ a ra kpùmɔnɔ́ Yawe yɛ́ʔɛ ma kpàánweeli bee tɛɛ̀jeele na, cândɛnɛgi canya, ní yevɔnyi na. 4 Sáriga-sórigow fànʔafɔbili a wòlo Yawe ma lè cândɛnɛgi canʔa na, wi a pye tɛɛlɛ fun bàpiigéle kɔrɔni, ní tɛɛlɛ fun bàpɔlɔ nibin, 5 ní wi míimi yakanʔa efa-nyɛ́nnɛ, ki a pye lè bàpɔw kéele na, bapiigèle wóʔo si pye, gee wi ga tímana lè, sìnmɛ hɛn-nyɛ́nnɛ si pye ní efa o efa ní. 6 Yevɔngi canʔa na, wi a tɛɛlɛ fun náapebile nibin, ní bàpiigéle kɔrɔni, ní bàpɔlɔ nibin wòlo sáriga di pye tɛɛlɛ fun wóro. 7 Wi a míimɛ yakanʔa efa-nyɛ́nnɛ nibin wòlo sáriga náapeli kéele na, ní efa-nyɛ́nnɛ nibin bàpɔw kéele na, ní gee wi ga tímana lè bàpiigèle kéele na, sìnmɛ hɛn-nyɛ́nnɛ si pye ní efa o efa ní. 8 Lǎli ni fànʔafɔbili ga ni jà jée lè, li a jée kpàánweeli nìkpanʔa kólogo ni, si ní lúru bi yiri kólogi bee wonijanga ni. 9 Lǎli ni tári syɛ̀ɛnnɛ ga pan Yawe yɛ́ʔɛ ma lè kpóʔorojǎngèle kéele na, wee wi ga jée lè solomɔkulo kàbangi kólogo kpaanweele ni n sáà kpɔ̀ʔɔrɔli kpéʔele, wee bee a yiri wòrogulo kàbangi kólogo kpaanweele ni, wee si wi ga jée lè wòrogulo kàbangi kólogo kpaanweele ni wi a yiri solomɔkulo kàbangi kólogo kpaanweele ni, syɔɔn faala ga yɛlɛ wi lúru yiri konijangi kpàánweele ni í, fwɔɔ syɔɔn o syɔɔn í yiri kpàánweelee ni li nyɛ lè wi zǐnmi na. 10 Fànʔafɔbili a pye be níngi ni bi pínɛ jée pe làrijeeli ni, si yiri pe làriyirili ni. Gee gi joo lè sárigafeleyi wòloganma kéele na 11 « ‹Fɛ́tiibèle canya, ní kpóʔorojàngèle canya yakanʔa a pye míimɛ efa-nyɛ́nnɛ nibin náapeli kéele na, ní efa-nyɛ́nnɛ nibin bàpɔw kéele na, ní gee wi ga tímana lè bàpiigèle kéele na. Sìnmɛ hɛn-nyɛ́nnɛ si pye ní efa o efa ní. 12 Fànʔafɔbili ga ni jà kínidɛnɛgɛ sáriga-sórigoo wòlo Yawe ma, wàlá kínidɛnɛgɛ pínɛnyɛnnɛgɛ sáriga, pe a canʔafolomɔ kabangi kpàánweele múgu li ma, li a li sáriga-sórigow, ní li pínɛnyɛnnɛgi sáriga wòlo yaà beè bi yɛlɛ ní gi ní àmɛɛ li gi kpéʔele cândɛnɛgi canʔa ni lè. Koro kàdoʔo ma li a yiri, li ga tɛ́nɛ̀ yiri, pe a canʔafolomɔ kabangi tɔ́n. 13 Mɔ a ra yɛɛlɛ nibin tɛɛlɛ fun bàpile wóo sáriga-sórigoo canʔa o canʔa Yawe ma. Mɔ a ra wi wóo nyɛ̀ʔɛ nyɔ́ɔ o nyɛ̀ʔɛ nyɔ́ɔ na. 14 Mɔ a ra míimɛ yakanʔa efa tílaya kɔrɔni wóʔo fàrá yaà nyɛ̀ʔɛ nyɔ́ɔ o nyɛ̀ʔɛ nyɔ́ɔ na, bee pe a pírige ní hɛn tílaya taanri sinmɛ ní lè. Koro ki a pye míimi yakanʔa Yawe ma. Bàngwɔɔ làlwa wii, wee wi tɛ́ʔɛ bi kòro beè lè làla o làla. 15 Pe a ra bàpili, ní míimi yakanʔa, ní sǐnmi wóo nyɛ̀ʔɛ nyɔ́ɔ o nyɛ̀ʔɛ nyɔ́ɔ na, di pye bàngwɔɔ sáriga-sórigoo.› » Fànʔafɔbili jàala kɔ́rigɔ kéele 16 Kàfɔw Yawe wi syɛ́ɛnri naa joo níì jo: «Fànʔafɔbili ga yarigaa kaan wi jaawaa ma, gee bee a pye kɔrigɔ wi jáaw bee jàala ma. Ki a kòro be woʔò bi pye be kɔrigɔ. 17 Kàjáa li ga yarigaa wòlo li kɔ́rigi ni n kaan li falipyewaa ma, yárigi bee a pye li falipyew wóʔo bi taa ba nan wɔ́rɔdi yɛ́ɛlɛ na, koro kàdoʔo ma wi a gi lúrugo kaan fànʔafɔbili ma. Li kɔ́rigi a pye li jáabèle yagwɔɔlɔ wóʔo. 18 Fànʔafɔbili a kɔ́ yafyɛn wòlo syɛ́ɛnbèle kɔ́rigɔ ni í, li a kɔ́ be lɛɛgèle nɛnɛ syɔɔ be na í. Gee li a kaan lè kɔrigɔ li jáabèle ma, li a gi wòlo gee ni gi nyɛ li ma lè, koro ga pye wàa faala a kɔ́ fɔ̀n wi kɔrigɔ ni mii syɛ́ɛnbèle nínge ni í.» Kpɔ̀ʔɔrɔli kpaʔa tɛɛsɔʔɔyɔ kéele 19 Tɛɛ̀jeeli li pye lè kpàánweeli taana, a wi foro ní mii ní loro ni n jée kpaafunjǎnyi ni yi yaʔa lè sáriga-wòlobèle ma, yee yi nyɛ solomɔkulo kàbangi na lè. Wéle, tɛɛgaa maa pye yaà láʔali na, canʔajeemɛ ma. 20 A wi mii pye: «Nɛɛ bee sáriga-wòlobèle a ra kolomi sáriga, ní kapeegèle kùsulugo sáriga káara soori, bi wɔ́ɔ ra míimi yakaanya fwóo yaà, koro ga pye pe a kɔ́ yiri ní di ní kàfugo ma kadàali na bi syɛ́ɛnbèle fóro í.» 21 A wi yiri ní mii ní kàfugo ma kadàali ma, níì sɔ̀lɔ ní mii ní kadàali jɛ̀ɛ́ngéle sicɛrɛ ma. Wéle, kadàali jɛ̀ɛ́nnɛ o jɛ̀ɛ́nnɛ n pye ní kadàala ní. 22 Cévo-vaanbinɛyɛ kadàagēle n pye yaà kadàali jɛ̀ɛ́ngéle sicɛrɛ na, ke tɔnɔganmi n pye mɛ́tiribéle toko toko, ke kpóloganmi si i nyɛ mɛ́tiribéle kɛɛ ní kagunɔ kagunɔ, ke myɛ sicɛrɛw maa pye tímana-níjanma na. 23 Kadɛnɛrɛ kàkɔlɔyɔ maa ke myɛ nibin nibin sicɛrɛw màʔa, á tɛɛsɔʔɔyɔ faan n télege kàkɔlɔyi na n yi màʔa n kpàra. 24 A wi mii pye: «Tɛɛsɔʔɔyi yi nyɛ yee naa, nɛɛ naa kpáagi falipyebèlē a ra syɛ́ɛnbèle sáriga káara soori.» |
Kolocɔlɔɔ Syɛ́ɛnri © Bible Society of Côte d'Ivoire, 2008.
Bible Society of Côte d'Ivoire