Ezekyɛli 44 - Cebaara Bible 2010

Canʔafolomɔ kpaánweeli yaʔala fànʔafɔbili ma

¹ A wi lúru n kári ní mii ní tɛɛcǎngi kàfugo ma kpàánweele ma, lee li da wáa canʔafolomɔ ma lè. Li maa pye wodɔnnɔ ní.

² A Yawe mii pye: «Kpàánweeli naa a kòro wodɔnnɔ ní, li a múgu í, syɔɔn faala a sɔ̀lɔ li ni í, níì cán nɛɛ bee Yawe Isirayɛli Kolocɔlɔw sɔ̀lɔ n jée. Li a kòro wodɔnnɔ ní.

³ Fànʔafɔbili si na, àmɛɛ li nyɛ lè fànʔafɔbile, li a gbǎn tɛ́ɛn yaà bi lìíli lìi Yawe yɛ́ʔɛ ma. Li a sɔ̀lɔ kpàánweeli nìkpanʔa kólogo ni bi jée, si ní lúru yiri konijangi ni.»

Pe a fɔ̀lɔ nibɔɔn í jée kpɔ̀ʔɔrɔli kpaʔa ni í

⁴ A wi kári ní mii ní solomɔkulo kàbangi kpàánweele ma, kpáagi yɛ́ʔɛ ma. Mii maa ni wéle, a mii wéle n gi nyaa a Yawe nìjangbɔɔri i Yawe kpáagi nyìngí. A mii too n yɛ́ɛgi cíbele tári na.

⁵ A Yawe mii pye: «Syɔɔn-pya, mɔ yákiriw yaʔa gi na, mí gi wéle ní mɔ nyapiigèle ní! Gee myɛ mii a joo mɔ ma Yawe kpáagi làlwa kajoogéle myɛ kéele na lè, ní gi làlwabèle myɛ kéele na lè, ki lóʔo mɔ líiweegèle ni. Yákirii yaʔa cama jéeganmi na kpáagi ni, ní tɛɛcǎngi tɛɛyirigéle myɛ kéele na.

⁶ Mɔ a gi joo niceebèle ma, pe lè Isirayɛli kpáagi wòolo, si be pye: ‹Kàfɔw Yawe wi syɛ́ɛnri naa joo níì jo: Yele yanɔnʔɔyi myɛ n nɛʔɛ n yɛlɛ nya, yele Isirayɛli kpáagi wòolo.

⁷ Yele n nibɔɔnnɔ lége mii tɛɛcǎngi ni, pe lè sìngɛ́nɛbéle fúnyi ni, ní sìngɛ́nɛbéle céri na, jàngó bi mii kpáagi córo yafaʔaga. Lǎli ni yele mii lìíli kaangi lè, li lè kaasǐnmi, ní sìsyaanw, a be mii joogaanni kálagi yele yanɔnʔɔyi myɛ kpéʔelele báriga ni.

⁸ Yele ga yákirii yaʔa mii yacanri fáli na í, fwɔɔ a yele syɛ́ɛnbèle bee télege pe i mii fáliw kpéʔele mii tɛɛcǎngi ni yele sìndɛɛgi ni.›

⁹ Kàfɔw Yawe wi syɛ́ɛnri naa joo níì jo: ‹Nibɔɔn faala wi lè sìngɛ́nɛɔ fúngi ni, ní sìngɛ́nɛɔ céri na, wi a tée jée mii tɛɛcǎngi ni í, nibɔnbèle pe a pye Isirayɛli ye níngi ni lè poro wàa faala.

Gee gi joo Levii ye kéeli na lè

¹⁰ « ‹Gee si gi Levii ye kéeli kwɔ́ɔ lè, poro bele be peyɛɛ léeli mii na lè, lǎli ni Isirayɛli ye da ni pùuní lè, ní i lúrugu mii kurugo ni taari be yasunyi na lè, bele bee a ba be kolomi túgoro tugo.

¹¹ Pe a pye mii tɛɛcǎngi ni falipyebèlē, poro bele má pe a kpáagi kpaaweegéle kpaàwelere fáli kaan lè, jàngó be pye kpáagi fáli na. Poro pe a ra sáriga-sórigow, ní sárigasanw yaweegéle kɔnɔgi syɛ́ɛnbèle ma, pe a ra yèré syɛ́ɛnbèle yɛ́ʔɛ ma bàā báara be ma.

¹² Amɛɛ pe da ni báara syɛ́ɛnmi ma pi yasunyi yɛ́ʔɛ ma lè, n pye tɛɛtoolo Isirayɛli kpáagi wòolo ma lè, ní be kolomi sábabu, gee bee na mii mii kɔ́gi yìrige níì kàli n kaan be ma, Kàfɔw Yawe wi jo nya, pe a be kolomi túgoro tugo.

¹³ Pe a ní nùuni fwɔɔ bi ba nan mii na jàngó bàā sáriga-wòlori fáli kpéʔele mii ma í, pe a ní nùuni fwɔɔ bi ba nan mii tɛɛcǎnyi na í, yi lè mii tɛɛcàndeleyi. Pe a be nyáʔamini túgoyo tugo, ní yanɔnʔɔyi be kpéʔele lè yoro túgoyi.

¹⁴ Mii a kpáagi fáli kɔ̀rɔsiile kaan be ma, pe a ra gi fáliw myɛ kpéʔele, ní gee myɛ gi yɛlɛ bàā kpéʔele yaà lè.

Gee gi joo sáriga-wòlobèle kéele na lè

¹⁵ « ‹Kàjáa Levii ye sáriga-wòlobèle be lè Sadɔki jáabèle, poro bele kɔ́lɔ na mii tɛɛcǎngi fáli da pye lè, lǎli ni Isirayɛli ye da ni peyɛɛ pùuní ni léeli mii na lè, bele bee a ba ra nùuní mii na bàā mii fáliw kpéʔele, pe a ba ra yèré mii yɛ́ʔɛ ma bàā kaasǐnmi, ní sìsyaanw kaangi mii ma, Kàfɔw Yawe wi jo nya.

¹⁶ Bele bee a ra jǐn mii tɛɛcǎngi ni, poro pe a ra nùuní mii tàbaliw na bi pye mii fáliw na, pe a kòro bàā mii fáliw kpéʔele.

¹⁷ Lǎli ni pe ga nan fungo ma kadàali kpàánweele na lè, pe a lɛn fàni búroyo le. Lǎli ni pe ga pye lè fáliw na fungo ma kadàali kpàánweele na, ní kpáagi ni, bàsiire yála a kɔ́ pye be na í.

¹⁸ Lɛn fàni nyùnbwɔɔyɔ a pye be nyúnyi ni ní lɛn fàni kùrusiibéle pe sárigèle na. Pe a kɔ́ sɛntiiri faala tɛ́ʔɛ bi peyɛɛ bwɔɔ í, gee bee si kɔ́ kakpegi kaan kaa be ŋuu í.

¹⁹ Lǎli ni pe ga yiri lè bi sa jée kàfugo má kadàali ni, kàfugo ma kadàali ni beè syɛ́ɛnbèle nyɛ lè, pe a búroyi wòlo, yee ní pe ga fáliw pye lè bi tɛ́ʔɛ tɛɛcǎngi kpaafungo ni, si buroyaa nikwɔɔ le, jàngó pe a kɔ́ syɛ́ɛnbèle fóro ní be búroyi ní í.

²⁰ Pe a kɔ́ be nyúnyi kùnu í, pe si a wɔ́ɔ kɔ́ be ǹjoori yaʔa di tɔnɔ í, kàjáa ki n yɛlɛ paa be ǹjoori cɛnɛ.

²¹ Sáriga-wòloo faala ga yɛlɛ wi dùvɛɛn gbaa lǎli ni wi ga ni jǐn fungo má kadàali ni lè í.

²² Wi a kɔ́ lɔgucaa láa wi cɔɔ̀ í, wàlá wee nàɔn wi wi yaʔa lè í, kàjáa wi a Isirayɛli kpáagi yòdaʔaya nàngeele sinján pìcaawaa pɔri, wàlá lɔgucewaa, wee nàɔn wi da pye lè sáriga-wòlowaa.

²³ Pe a ra mii syɛ́ɛnbèle tama pe yacanga cán wàli yapeʔe ni, pe a gi yaʔa pe gi cán wàlimee bi nyɛ lè yanɔnʔɔgɔ, ní yamunugo níngi ni.

²⁴ Kàsiiw kèlē ni, pe a ra yèré yaà bàā kányɛɛgi nyuu, pe a ra kútiiw nyuu bi yɛlɛ ní mii kajoogbangèle ní. Pe a mii làlwabèle ní mii làlwaw kèlē cò mii fɛ́tiibèle myɛ ni, si mii cândɛnɛyi yaʔa.

²⁵ Sáriga-wòloo a kɔ́ nùuni kpóō na bi wiyɛɛ nɔ́nʔɔ í, fwɔɔ kúw ga pye wi toò, wàlá wi nɔɔ̀, wàlá wi pyà, wee wi lè nàɔn wàlá cɔlɔɔ, wàlá wi senyɛnnàɔn, wàlá wi senyɛnjaà, wee wi lè wi ga kɔ́ɔ̀ cèpɔrigɔ kpéʔele í.

²⁶ Wi jéemununi ga kpéʔele n kwɔ́ɔ, pe a canya kɔrɔsiin córo yaʔa wi ma.

²⁷ Cángee na wi a jée tɛɛcǎngi ni lè, fungo ma kadàali ni, wi a wi sárigaw wòlo kapeeli kéele na, Kàfɔw Yawe wi jo nya.

²⁸ Kɔ́rigee pe a taa lè koro gi nyɛ gee naa: Mii wi a pye be kɔ́rigi. Yele a kɔ́ lɛɛlɛ kaan be ma Isirayɛli ni í, mii wi a pye be lɛɛli.

²⁹ Yakaanyi ní sárigaw yárira kapeeli kéele na, ní sárigaw yárira, kolomi kéele na, toro ti a pye be yaliiri, n fàra yáriri na pe yaʔa lè péw Kolocɔlɔɔ ma Isirayɛli ni, toro a pye be worò.

³⁰ Yaliifɔnri yaliiselire myɛ, ní yele sáriga-yirigew myɛ, cɔɔnrimɔ fun ni, dee bee a pye sáriga-wòlobèle wóro. Yele a ra yele búrumii-pírigegi wozelige kaangi sáriga-wòlobèle ma, koro ga pye dùbaw í kòro yele kpáayi na.

³¹ Sáriga-wòlobèle a ra yakuugo faala, wàlá yaweʔe wogáa-gòrolo káara káa í, féjɛnʔɛ yoo, yaweele yoo.