Ezekyɛli 43 - Cebaara Bible 2010

Kolocɔlɔɔ lúrubanni kpɔ̀ʔɔrɔli kpaʔa ma

¹ A wi kári ní mii ní kpàánweeli ma li nyɛ canʔafolomɔ kabangi na lè.

² Wéle, a mii Isirayɛli Kolocɔlɔw nìjangbɔɔrɔ nyaa a di yìri canʔafolomɔ ma ni maa. Wi yákpoli maa pye àmɛɛ lònɛʔɛgɛ tinmɛ nyɛ lè, a tári i daragi wi nìjangbɔɔri báriga ni.

³ Yanyaagi mii da nyaa lè, ki maa yanyaagee wíri, gee mii da nyaa lè, lǎli ni mii da pan kěgi kálagila kéele na lè. A yanyaayi bee gee wíri, gee mii da nyaa Kebaari cábigi nyɔ́ɔ na lè. Lǎli bee ni a mii too n yɛ́ɛgi cíbele tári na.

⁴ A Yawe nìjangbɔɔri sáà foro kpàánweeli ni li yɛʔɛ̀ wáa canʔafolomɔ ma lè, ni syée kpáagi ma.

⁵ Lǎli bee ni, a Pǐli mii láa n yìrige n kári fungo ma kadàali ma. Wéle, a mii gi nyaa a Yawe nìjangbɔɔri i kpáagi nyìngí.

⁶ A mii wàa yákpolo lóʔo yaà kpáagi ni a wi i nyuu ní mii ní, á nànwaa si i nyɛ woyéreo ní mii taana.

⁷ Wi n mii pye: «Syɔɔn-pya, nɛɛ naa wi nyɛ mii fàngoli tɛ́ʔɛ, tɛ́ɛgee ni mii a mii yédaagèle taʔa lè. Beè mii a tɛ́ɛn kòro kwɔ́ɔmɔ fun Isirayɛli ye níngi ni. Isirayɛli kpáagi wòolo, ní be fànʔafɔbèle a ní mii mɛ́ɛcǎngi nɔ́nʔɔ ní be kanɔnʔɔri, ní be fànʔafɔbèle woguubéle ní, pe sáriga-wòlo-tɛ́ɛyi ni í.

⁸ Pe maa be tɛɛ̀jeeli kpéʔele mii tɛɛ̀jeeli taana, n be kpaaweegèle gàángéle kpéʔele mii kpaaweegèle gàángéle taana, á gungo yagana pye mii ní be níngi ni. Kánmi bee na pe mii mɛ́ɛcǎngi nɔ́nʔɔ ní yanɔnʔɔyi ní be kpéʔele lè. Koro na n mii yaʔa mii fundanʔari ni, a mii be sórigo mɛnɛ mɛnɛ.

⁹ Tɔ́ɔliw ni pe a be kanɔnʔɔbyeri, ní be fànʔafɔbèle woguubéle léeli mii na, mii a tɛ́ɛn kòro be níngi ni kwɔ́ɔmɔ fun.

¹⁰ Mɔ syɔɔn-pya, ki n yɛlɛ mi kpɔ̀ʔɔrɔli kpaʔa kánma tɛ̀ɛn Isirayɛli kpáagi wòolo na, ki n yɛlɛ pe kolomi kèlē í fɛ̀ɛrɛ wáa be na, pé tímana gi faangaanmi na.

¹¹ Gee myɛ be kpéʔele lè, ki ga pye be na fɛ̀ɛrɛ, mi kpáagi naa kánma tɛ̀ɛn be na, gee bee n jo ki tɛɛ̀laʔagèle, ní gi tɛɛyirigèle, ní gi tɛɛ̀jeegèle, ní gi kánmi myɛ. Ki kajoogèle myɛ, ní gi kánmi myɛ, ní gi làlwabèle myɛ fílige mi sɛ́bɛ pe nyɛnɛ na. Koro ga pye pe gi kánmi, ní gi kajoogèle myɛ sámaga be cò, si ge kpéʔele foro.

¹² Kpáagi kajoolo wéle lee: Nyanbelegi ǹjoʔo ni, tɛ́ɛgee myɛ ki gi màʔa n kpàra lè, koro i nyɛ tɛɛcàndelege. Koro gi nyɛ kajooli kpáagi kéele na.»

Sáriga-wòlo-yafaangi ní sárigaw kéele

¹³ Sáriga-wòlo-yafaangi tímanama bi nyɛ bee naa, mɛ́tiri tílaw tímanama na. Wéegi ki da gi màʔa n kpàra lè, ki cùruganmi maa pye mɛ́tiri tíla, a gi kpɔ́ʔɔganmi pye mɛ́tiri tíla. Nyɔɔwara maa pye kàfugo ma, toro yɛ́ɛgi kpɔ́ʔɔganma maa pye santimɛtiribéle toko ní kagunɔ, n gi màʔa, koro gi pye sáriga-wòlo-yafaangi tɛɛ̀sigi-yérele.

¹⁴ N séli yaà gi nɔ́nʔɔ ma, tári na, n sáà nan gi níngi faanlaʔama na, ki maa pye mɛ́tiri nibin, á gi kpɔ́ʔɔganmi pye mɛ́tiri tíla. N séli níngi faanlaʔama na n sáà nan ǹjoʔo ma, koro maa pye mɛ́tiribéle siin, ki kpɔ́ʔɔganmi si i nyɛ mɛ́tiri tíla.

¹⁵ Sáriga-wòlo-yafaangi ǹjoʔomaw wi pye lè náagi tɛɛkpàraga, wi tɔnɔganmi n pye mɛ́tiribéle siin, á nyɛngéle sicɛrɛ pye náagi tɛɛkpàraga na.

¹⁶ Náagi tɛɛkpàraga kàbanya sicɛrɛ tímanama maa pye sèjira, mɛ́tiribéle kɔrɔni kɔrɔni.

¹⁷ Tɛɛfaanlaʔagee siin wóʔo kàbanya sicɛrɛ tímanama maa pye sèjira, mɛ́tiribéle kɔrɔsiin-ziin. Nyɔɔwara maa pye kàfugo ma, toro yɛ́ɛgi kpɔ́ʔɔganma maa pye santimɛtiribéle toko ní kagunɔ n gi màʔa. Wéegi ki da gi màʔa n kpàra lè koro cùruganmi maa pye mɛ́tiri tíla, ki tɛɛ̀lúgugèle maa pye canʔafolomɔ kabangi na.

¹⁸ A wi mii pye: «Syɔɔn-pya, Kàfɔw Yawe wi syɛ́ɛnri naa joo níì jo: ‹Làlwaw kèlē wéle gele, sáriga-wòlo-yafaangi kéele na, cángee na pe a gi faan jàngó bàā sáriga-sórigow wóo gi na lè, si wɔ́ɔ ra sìsyaanw nyari nyari gi na.

¹⁹ Mɔ a náapebile kaan sáriga-wòlobèle ma, pe lè Levii ye, pe nyɛ lè Sadɔki yòdaʔagi wòolo, poro bele be nùuní mii na lè bàā mii fáliw kpéʔele, Kàfɔw Yawe wi jo nya, lee bee í pye sáriga, kapeeli kéele na.

²⁰ Mɔ a li sìsyaanwaa láa bi taʔa sáriga-wòlo-yafaangi nyɛ́ngéle sicɛrɛ na, ní gi faanlaʔami jɛ̀ɛ́ngéle sicɛrɛ na, ní gi nyɔɔwari na ti gi màʔa lè. Kánmi bee na mɔ a sáriga-wòlo-yafaangi nɔ́nʔɔrɔ láʔa, mɔ a kapeegèle kùsulugo fáli kpéʔele gi na.

²¹ Mɔ a kapeeli kùsulugo sáriga náapɛɛlɛ cò, pe a li sórigo kpáagi tɛ́ɛgaa ni, gee be yaʔa lè tɛɛcǎngi kàdoʔo ma.

²² Canziin wógi na, mɔ a tɛɛlɛ fun sikepɔlɔ cò bi wòlo sáriga kapeeli kùsulugo kéele na, pe a sáriga-wòlo-yafaangi nɔ́nʔɔrɔ láʔa, àmɛɛ pe a di láʔa náapeli báriga ni lè.

²³ Lǎli ni mɔ ga kwɔ́ɔ kapeeli kùsulugo sáriga wòlolo na lè, mɔ a tɛɛlɛ fun náapebile, ní tɛɛlɛ fun bàpɔlɔ cò yaweeyiligèle ni bi wòlo sáriga.

²⁴ Mɔ a ba ge wòlo sáriga Yawe yɛ́ʔɛ ma, sáriga-wòlobèle a solomɔ wáa ge na si ge pye sáriga-sórigoo Yawe ma.

²⁵ Canya kɔrɔsiin fúngo ni, mɔ a ra sikepɔlɔ wóo sáriga canʔa o canʔa, kapeeli kùsulugo kéele na. Pe a wɔ́ɔ ra náapebile, ní bàpɔlɔ có yaweeyiligèle ni bàā wóo sáriga, ke myɛ í pye tɛɛlɛ fun wòʔolo.

²⁶ Canya kɔrɔsiin fúngo ni pe a kapeegèle kùsulugo fáli kpéʔele sáriga-wòlo-yafaangi kéele na, pe a gi jéemununi fáli kpéʔele si gi yaʔa kɔlɔ̀ na Kolocɔlɔɔ ma.

²⁷ Lǎli ni cányi bee ga foro lè, bi séli canya kɔrɔtaanri wógi na bàā syée yaà, sáriga-wòlobèle a ra yele sáriga-sórigow, ní yele pínɛnyɛnnɛgi sáriga wóo sáriga-wòlo-yafaangi na, mii si fɔ̀lɔ yele na, Kàfɔw Yawe wi jo nya.› »