Ezekyɛli 42 - Cebaara Bible 2010

Kpɔ̀ʔɔrɔli kpaʔa kpaasogoloyo

¹ A wi yiri ní mii ní n kári kàfugo ma kadàali ma, solomɔkulo kàbangi na, níì fala ní mii ní kpaafunyi ma yi pye lè lariwaagi zìnmɛ na, ní wɔ́ɔ̀ yɛʔɛ̀ wáa kpáagi ma, ki lè solomɔkulo ma.

² Kàbangee má, beè solomɔkulo kàbangi kpàánweele pye lè, ki tɔnɔganmi maa pye mɛ́tiribéle togoye siin ní kpɔrigɔ á gi kpɔ́ʔɔganmi pye mɛ́tiribéle toko ní kagunɔ.

³ Gee bee maa pye fungo ma kadàali zìnmɛ na mɛ́tiribéle kɛɛ, ní kàfugo ma kadàali tɛɛmaraga zìnmɛ na, tɛɛsɔ̀lɔyɔ n pye yaà a gee yɛʔɛ̀ wáa gee ma, kpaataʔaya taanri wóyo.

⁴ Tɛɛsɔ̀lɔgɔ n pye yaà kpaafunyi yɛ́ʔɛ ma, gee kpɔ́ʔɔganma bi pye lè mɛ́tiribéle kagunɔ, n wáa fungo ma, á gi tɔnɔganmi pye mɛ́tiribéle togoye siin ní kpɔrigɔ. Yi kpaaweegèle maa wáa solomɔkulo ma.

⁵ Njoʔo ma kpaafunyi maa cɛ́rɛ n sɔ̀lɔ táàma wóyi na, ní kpáagi nínge wóyo na, níì cán ǹjoʔo ma tɛɛsɔ̀lɔyi maa kpólo táàma wóyi, ní níngi wóyo na.

⁶ Yi maa pye kpaataʔaya taanri-daanri, kàjáa gàángéle ga pye yi na àmɛɛ kadàagèle wòʔolo pye lè í. Koro na n séli kpaadaali na, ǹjoʔo ma kpaafunyi maa cɛ́rɛ n sɔ̀lɔ táàma wóyi, ní níngi wóyo na.

⁷ Kàfugo ma kadàali jásaa wi da tímana n kári ní kpaafunyi ní lè, kàfugo ma kadàali kàbaan kpaafunyo yɛ́ʔɛ ma, wi tɔnɔganmi maa pye mɛ́tiribéle toko ní kagunɔ.

⁸ Níì cán kàfugo ma kadàali kàbaan kpaafunyo tɔnɔganma maa pye mɛ́tiribéle toko ní kagunɔ kagunɔ. Kàjáa kàbangee ki da yɛʔɛ̀ wáa kpɔ̀ʔɔrɔli kpaʔa ma lè, ki maa pye mɛ́tiribéle togoye siin ní kpɔrigɔ.

⁹ Mɔ ga yìri yaà kàfugo ma kadàali ma, canʔafolomɔ tɛɛ̀jeeli n pye kpaafunyi bee táàma.

¹⁰ Kpaafunyaa si maa níì pye yaà kadàali jásaa kàbanbile ma, canʔafolomɔ kabangi na, n yɛʔɛ̀ wáa tɛɛwaagi, ní kpáagi ma.

¹¹ Tɛɛsɔ̀lɔgɔ n pye yi yɛʔɛ̀ ma, àmɛɛ gee pye lè kpaafunyi yɛ́ʔɛ ma yi pye lè solomɔkulo kàbangi na. Yi kàbanyi tɔnɔganma ní yi kpóloganmi maa pye sèjira, yi tɛɛyiriyi, ní yi taaniganmi, ní yi kpaaweegèle maa tiyɛɛ wíri.

¹² Anbée wòrogulo kàbangi kpaafunyo kɔriyɔ da pye. Kɔ̀rigɔ n pye tɛɛsɔ̀lɔgi tɛɛ̀jeele na, tɛɛsɔ̀lɔgi ki da pye lè téw canʔafolomɔ kabangi jásaa yɛ́ʔɛ ma, beè pe da ni jǐn lè.

¹³ A wi mii pye: «Kpaafunyi yi nyɛ solomɔkulo ma lè, ní kpaafunyee yi nyɛ wòrogulo ma lè, yoro yee yi nyɛ tɛɛwaagi yɛ́ʔɛ ma lè, kpaafunjǎnyi yii, nɛɛ bee sáriga-wòlobèle a ra yacandeleri líi, poro bele be nùuní Yawe na lè. Pe a ra yacandeleri téeri yaà, ti lè yakaanyi, ní kapeegèle kùsulugo sáriga yaweegéle, ní kolomi sáriga, níì cán tɛ́ɛgi bee i nyɛ tɛɛcànga.

¹⁴ Lǎli ni sáriga-wòlobèle ga jée lè pe a yiri tɛɛcǎngi ni bi jée kàfugo ma kadàali ni í, fwɔɔ pe be yaleri wòlo bi yaʔa beè, dee ní be fáliw kpéʔele lè, níì cán yaleri bee i nyɛ yacanra. Pe si a buroyaa nikwɔɔ le bi kári tɛ́ɛgi ma gi yaʔa syɛ́ɛnmi ma lè.»

Kpɔ̀ʔɔrɔli kpaʔa fungomaw

¹⁵ Lǎli ni wi kpɔ̀ʔɔrɔli kpaʔa tímana n kwɔ́ɔ fungo ma lè, a wi foro ní mii ní kpàánweeli ni li nyɛ lè canʔafolomɔ kabangi na, ní baa kadàali tímana n màʔa n kpàra.

¹⁶ Wi n canʔafolomɔ kabangi tímana ní yatimana-kàgaanni ní, a ki myɛw pye kàgaan-nyɛ́ngéle saala siin ní dabata, koro n pye ní yatimana-kàgaanni ní.

¹⁷ A wi solomɔkulo kàbangi tímana, a gi myɛ bìnɛw pye kàgaan-nyɛ́ngéle saala siin ní dabata, koro n pye ní yatimana-kàgaanni ní.

¹⁸ A wi wòrogulo kàbangi tímana ní kàgaanni ní, lee li pye lè yatimana wóli, a gi pye kàgaan-nyɛ́ngéle saala siin ní dabata, koro n pye ní yatimana-kàgaanni ní.

¹⁹ A wi fíige canʔajeemɛ kabangi na n kàgaan-nyɛ́ngéle saala siin ní dabata tímana yaà, koro n pye ní yatimana-kàgaanni ní.

²⁰ A wi gunbiigi kàbanya sicɛrɛ tímana n gi màʔa n kpàra, ki tɔnɔganmi maa pye kàgaan-nyɛ́ngéle saala siin ní dabata, a gi kpɔ́ʔɔganmi wɔ́ɔ i nyɛ kàgaan-nyɛ́ngéle saala siin ní dabata, ki si maa tɛɛcǎngi, ní fòrobáa tɛ́ɛgi wàli n láʔa yiyɛɛ na.