Ezekyɛli 41 - Cebaara Bible 2010

¹ A wi kári ní mii ní kpɔ̀ʔɔrɔli kpaʔa ma, a wi sáà gàángèle tímana, làa nibin yɛ́ʔɛ kpɔ́ʔɔganma maa pye mɛ́tiribéle taanri kàbangaa na, ní mɛ́tiribéle pèle taanri kàbangee na, n yɛlɛ ní tɛɛcǎngi kpɔ́ʔɔganma ní.

² Kpaaweeli kpɔ́ʔɔganma maa pye mɛ́tiribéle kagunɔ, lɛ̀ʔɛlee n pye mɛ́tiribéle siin ní tíla, a lee pye siin ní tíla. A wi kpɔ̀ʔɔrɔli kpaʔa tɔnɔganma tímana, a gi pye mɛ́tiribéle toko, á gi kpɔ́ʔɔganmi pye mɛ́tiribéle kɛɛ.

³ Koro kàdoʔo ma, a wi jée fungo ma n kpaaweeli gàángéle tímana, a ge pye mɛ́tiribéle nibin nibin, á kpaaweeli si i nyɛ mɛ́tiribéle taanri, kpaaweeli kpɔ́ʔɔganma si i nyɛ mɛ́tiribéle taanri ní tíla.

⁴ A wi tɛɛgaa tímana, a gi tɔnɔganmi pye mɛ́tiribéle kɛɛ, a gi kpɔ́ʔɔganmi pye mɛ́tiribéle kɛɛ, kpɔ̀ʔɔrɔli kpaʔa yɛ́ʔɛ ma, a wi mii pye: «Gee naa gi nyɛ tɛɛcàndelegi.»

Lɛ̀ʔɛgèle kpaafunyo kéele

⁵ A wi kpáagi gúnbiige tímana, a gi pye mɛ́tiribéle taanri, lɛ̀ʔɛgèle kpaafunyo yi pye n kpáagi màʔa lè, á yoro kpóloganmi pye mɛ́tiribéle siin-ziin.

⁶ Lɛ̀ʔɛgèle kpaafunyo yi pye lɛ̀ʔɛgèle ni lè, yi n pye kpaataʔaya taanri-daanri, yi myɛ nibin nibin n pye kpaafunyo toko ní kpɔrigɔ kpɔrigɔ, yi maa faan n sogi gunbiigi na gi kpáagi màʔa lè, yi si da táriga kpáagi gunbiige tiimaa na í.

⁷ Kpaafunyi maa kpólo n kári yiyɛɛ gurugo àmɛɛ yi tɔnɔ n lúgu lè, ànbée gi pye n kpáagi màʔa. Níì cán tɛɛ̀lúgugéle na pe da ni lúru ni kpáagi máari. A lariga pye kánmi bee na kpáagi ǹjoʔomaw ni, a pe i lúru bi séli táàma kpaataʔagi na, bi jée níngi wóʔo ni bàā syée ǹjoʔo ma wógi ma.

⁸ A mii tɔnɔganmi kɔ̀rɔsíi n kpáagi màʔa. A mii gi nyaa n séli lɛ̀ʔɛgèle kpaafunyo kapɔɔnbéle na, koro n pye kàgaan-nyɛ́nbolo, gee bee n jo mɛ́tiri-forobéle taanri.

⁹ Lɛ̀ʔɛgèle kpaafunyo kafugo ma gúngo yɛ́ʔɛ kpɔ́ʔɔganma n pye mɛ́tiribéle siin ní tíla. Lariwaagi gi pye lɛ̀ʔɛgèle kpaafunyo kpaʔa,

¹⁰ ní kpaafunyi nínge ni yi kpáagi màʔa lè, ki kpɔ́ʔɔgaanmi maa pye mɛ́tiribéle kɛɛ.

¹¹ Lɛ̀ʔɛgèle kpaafunyo kpaaweegéle maa yɛʔɛ̀ wáa lariwaagi ma, tɛɛ̀jeelaa n pye solomɔkulo ma, a tɛɛjeelaa pye wòrogulo ma, á lariwaagi kpɔ́ʔɔganma pye mɛ́tiribéle siin ní tíla n gi màʔa.

¹² Kpáagee ki da yɛʔɛ̀ wáa lariwaagi ma lè canʔajeemɛ kabangi na, ki kpɔ́ʔɔganmi maa pye mɛ́tiribéle toko ní kpɔrigɔ ní kagunɔ, kpáagi gunbiige kagomɔ kpɔ́ʔɔganma si i nyɛ mɛ́tiribéle siin ní tíla n gi màʔa, á gi tɔnɔganmi pye mɛ́tiribéle togoye siin ní kagunɔ.

¹³ A wi kpáagi tímana, a gi tɔnɔganmi pye mɛ́tiribéle togoye siin ní kpɔrigɔ, lariwaagi n fàra kpáagi, ní gi gunbiiyi na, toro tɔnɔganmi n pye mɛ́tiribéle togoye siin ní kpɔrigɔ.

¹⁴ Kpáagi yɛ́ʔɛ kpɔ́ʔɔganma n fàra lariwaagi na ki lè canʔafolomɔ ma, koro kpɔ́ʔɔganmi n pye mɛ́tiribéle togoye siin ní kpɔrigɔ.

¹⁵ A wi kpáagi tɔnɔganma tímana, ki pye kpɔ̀ʔɔrɔli kpaʔa kàdoʔo ma lè, n fàra tɛɛsɔ̀lɔyi na yi pye lɛ̀ʔɛgèle ni lè, a toro pye mɛ́tiribéle togoye siin ní kpɔrigɔ. Kpɔ̀ʔɔrɔli kpaʔa gi lè fungo ma, ní nìkpaanyi yi pye lè kàfugo ma,

Kpɔ̀ʔɔrɔli kpaʔa fungomaw

¹⁶ ní tɛɛ̀jeeyi, ní túnmɔri cɔ̀ɔ fɛ̀nɛtiribéle, ní tɛɛsɔ̀lɔyi yi kpaataʔayi taanri máari lè tɛɛ̀jeeyi zìnmɛ na, pe maa toro tɔ́n ní tiire ní n gi màʔa n kpàra n séli kpaadaali na n sáà nan fɛ̀nɛtiribèle na, á fɛ̀nɛtiribèle si i wodɔnbéle ní.

¹⁷ N séli kpaaweeli ǹjoʔo ma, fwɔɔ n sáà nan kpáagi fungomaw na, ní kàfugo ma, n gunbiigi myɛ màʔa n kpàra, fungomaw, ní kàfugomaw maa tímana.

¹⁸ A be syerubɛnbéle ní sɛʔɛwara kpéʔele gi na. Sɛʔɛwara n pye syerubɛnbèle siin-ziin nínge ni. Yɛɛcɔɔgèlē siin-ziin maa pye syerubɛnbèle na.

¹⁹ Syɔɔn yɛ́ɛcɔɔlɔ maa pye kàbangee na n wáa sɛʔɛwaraa ma, á càaraɔ yɛ́ɛcɔɔlɔ si i nyɛ kàbangee na n wáa sɛʔɛwaree ma. A gi pye nya n kpáagi màʔa.

²⁰ N séli kpaadaali na n sáà nan kpaaweeli ǹjoʔo na, pe maa syerubɛnbéle, ní sɛʔɛwara sámaga yaà, ní kpɔ̀ʔɔrɔli kpaʔa gúnbiige na wɔ́ɔgēle.

²¹ Kpɔ̀ʔɔrɔli kpaʔa kpaaweele kabanya sicɛrɛ tímanama maa pye sèjira, tɛɛcàndelegi yɛ́ʔɛ má kánma maa pye felenijanga.

²² Sàriga-wòlo-yafaangi maa pye tiire wóʔo, ki ǹjogi tɔnɔganma maa pye mɛ́tiri nibin ní tíla, ki níngi tɔnɔganma si i nyɛ mɛ́tiri nibin. Ki jɛ̀ɛ́ngèle, ní gi kpàcɔrɔbèle myɛ n pye tiire. A nǎnw mii pye: «Tàbaliw wi nyɛ wee naa, wee wi nyɛ lè Yawe yɛ́ʔɛ ma.»

²³ Kpaaweegéle siin ge pye kpɔ̀ʔɔrɔli kpaʔa, ní Tɛɛcàndelegi na.

²⁴ Kɔ̀ripiiye siin-ziin kɔriyɔ yi pye kpaaweegèle na, yi myɛ siin-ziinw maa ni kàragí ni máari kpaaweegèle na, kɔ̀ripiiye siin kɔrigɔ n pye kpaaweelee na, a kɔ̀ripiiye siin kɔrigɔ pye lee na.

²⁵ Pe maa syerubɛnbéle, ní sɛʔɛwara sámaga kpɔ̀ʔɔrɔli kpaʔa kɔ̀riyɔ na, àmɛɛ ti da sámaga gunbiiyi na lè. Tiire tunbadɔʔɔlɔ maa pye nìkpaangi yɛ́ʔɛ ma kàfugi na.

²⁶ Tunmɔrɔ cɔ̀ɔ fɛ̀nɛtiribéle, ní sɛʔɛwara n pye kàbanyi myɛ na n màʔa, nìkpaangi lɛ̀ʔɛgēle ni, ní kpáagi lɛ̀ʔɛgēle kpaafunyo na, ní tíiri tunbadɔʔɔgèlē na.