Ezekyɛli 40 - Cebaara Bible 2010

NYƐʔƐNA KPƆʔƆRƆLI KPAʔA YANYAʔA KEELE Sélimi syɛ́ɛnrɛ

¹ Wolo cò-mí-kárili yɛ̀ʔɛlɛ toko ní kagunɔ wóli na, yɛ́ɛli sélimɛ na, yégi canya kɛɛ wóʔo na, kěgi toogwɔɔlɔ kàdoʔo ma yɛ̀ʔɛlɛ kɛɛ ní sicɛrɛ wóli na, cángi bee na Yawe kɔ́gi maa pye mii na, a wi kári ní mii ní yaà.

² Kolocɔlɔɔ yanyaaya ni wi kári ní mii ní Isirayɛli tári ma, ní sáà mii télege nyanbe-nyundɔnɔ-tèlege na, gee na ki da pye lè móō kàʔa n faan yaà wòrogulo kàbangi na.

³ A wi kári ní mii ní yaà, wéle, nànwaa maa pye yaà, wee cére kánma pi da kanyɛɛnrɛ wómɔ wíri lè. Lɛn mɛ́ɛnnɛ maa pye wi kɔ́gi ni n fàra yatimana-kàgaanna na, wi si i nyɛ woyéreo ní kpàánweeli taana.

⁴ A nǎnw bee mii pye: «Syɔɔn-pya, da wéle ní mɔ nyapiigèle ní, da lúro ní mɔ líiweegèle ní! Mɔ yákiriw yaʔa gee myɛ na mii a tɛ̀ɛn mɔ na lè. Níì cán mɔ tórigoli nyúngo gi nyɛ nɛɛ naa jàngó mɔ í ba gi wéle, si gi fílige tɛ̀ɛn Isirayɛli kpáagi wòolo na, gee myɛ mɔ a nyaa lè.»

Kadàali ní kàfugo ma kpàánweegèle kéele

⁵ Wéle, tò n pye kàfugo ma n kpáagi màʔa n kpàra, yatimana-kàgaanna si i nyɛ nǎnw kɔ́lɔ ni, lee tɔnɔganma pi da pye lè mɛ́tiribéle taanri. A wi tǒw kpɔ́ʔɔganma tímana, a wi pye kàgaan-nyɛ́nnɛ nibin, a wi ǹjogi tɔnɔganma pye kagaan-nyɛ́nnɛ nibin.

⁶ A wi fíige kpàánweeli kàbaan na, lee li yɛʔɛ̀ wáa canʔafolomɔ ma lè, n lúgu li tɛɛ̀lúgugèle na, n kpàánweeli tɛɛ̀jeele tímana, a li kpɔ́ʔɔganmi pye kàgaan-nyɛ́nnɛ nibin, kpàánweeli kpɔ́ʔɔganma yagana.

⁷ Kpaafunyi myɛ nibin nibin tɔnɔganma ní yi kpóloganmi maa pye kàgaan-nyɛ́ngéle nibin nibin, mɛ́tiribéle siin-ziin ní tíla si i nyɛ kpaafunyi lariya ni. Fungo ma kpàánweeli tɛɛ̀jeele kpaanweele nikpanʔa taana, li kpɔ́ʔɔganmi maa pye kàgaan-nyɛ́nnɛ nibin.

⁸ A wi fungo ma kpàánweeli nìkpanʔa tímana a gi pye kàgaan-nyɛ́nnɛ nibin.

⁹ A wi kpàánweeli nìkpanʔa tímana, a gi pye mɛ́tiribéle sicɛrɛ, ki gàángèle kpóloganma si i nyɛ mɛ́tiribéle nibin nibin. Kpàánweeli nìkpanʔa maa pye fungo ma.

¹⁰ Kpaafunyi yi pye canʔafolomɔ kabangi kpàánweele na lè, yi nyɔ́ɔgi maa pye, taanri i nyɛ kàbangee na, a taanri i nyɛ kàbangee na, yi myɛ taanri-daanriw maa pye tímana-níjanma na. Gàángèle ge pye lè kàbanyi myɛ na, ke maa wɔ́ɔ̀ pye tímana-níjanma na.

¹¹ A wi kpàánweeli nyɔ́ɔ kpɔ́ʔɔganma tímana a li pye mɛ́tiribéle kagunɔ, á li tɔnɔganmi pye mɛ́tiribéle kɔrɔni ní tíla.

¹² Mɛ́tiri tíla gúnbiige n pye kpaafunyi yɛ́ʔɛ ma, kàbangee, ní gee na. Kpáayi maa pye, kàbangee ma mɛ́tiribéle taanri, gee ma mɛ́tiribéle taanri.

¹³ A wi kpàánweeli tímana, n séli kpaafungee nyáʔarā ma n sáà nan gee wóro na, yi yɛʔɛ̀ wáa yiyɛɛ ma lè, a li kpɔ́ʔɔganmi pye mɛ́tiribéle kɛɛ ní siin ní tíla.

¹⁴ A wi wɔ́ɔ̀ nìkpaangi kpɔ́ʔɔganma tímana, a gi pye mɛ́tiribéle kɛɛ. Kadàali si maa kpàánweeli nìkpanʔa màʔa n kpàra.

¹⁵ Larigee gi pye lè kpàánwee-jéeli, ní fungo ma kpàánweeli nìkpanʔa nínge ni ki n pye mɛ́tiribéle toko ní kagunɔ.

¹⁶ Tunmɔrɔ cɔ̀ɔ fɛ̀nɛtiribéle n pye kpaafunyi, ní yi gàángèle na, kpàánweeli fungo ma, n li màʔa n kpàra. Fɛ̀nɛtiribèle pèle n wɔ́ɔ̀ pye nìkpaanyi na fungo ma, n yi màʔa n kpàra. Sɛʔɛwara niwiriye maa kánʔana n wòlo gàángèle na.

¹⁷ A wi kári ní mii ní kàfugo ma kàcooli ma, kpaafunyo, ní tɛɛmaraga maa pye yaà n kàcooli màʔa. Kpaafunyo toko ní kpɔrigɔ yi pye tɛɛmaragi bee na.

¹⁸ Tɛɛmaragi maa pye kpàánweegèle lɛ̀ʔɛgēle ni, níì pínɛ n yɛlɛ ní kpàánweegèle tɔnɔganma ní, koro gi pye tɛɛmaragi, gee gi tìgi lè n sɔ̀lɔ.

¹⁹ A wi kpɔ́ʔɔganmi tímana, n séli táàma kpàánweeli yɛ́ʔɛ ma fwɔɔ n sáà nan táàma kadàali nyɔ́ɔ na, a gi pye mɛ́tiribéle togoye siin ní kpɔrigɔ canʔafolomɔ ma, ní solomɔkulo ma.

²⁰ A wi kpàánweeli tɔnɔganma, ní li kpɔ́ʔɔganmi tímana, loro lee li da yɛʔɛ̀ wáa lè kàfugo ma kadàali solomɔkulo kàbangi ma.

²¹ Li kpaafunyi maa pye taanri kàbangee na, taanri gee na, li gàángèle ní li nìkpaanyi maa pye tímana-níjanma na ní kpàánweeselili ní, ke tɔnɔganmi n pye mɛ́tiribéle toko ní kagunɔ kagunɔ, ke yɛ́ɛyi kpóloganma si i nyɛ mɛ́tiribéle kɛɛ ní siin-ziin ní tíla.

²² Li fɛ̀nɛtiribèle, ní li nìkpaanyi, ní li sɛʔɛwari tímanama maa pye sèjira ní kpàánweelee ní li yɛʔɛ̀ wáa canʔafolomɔ ma lè. Tɛɛ̀lúgugéle kɔrɔsiin na pe da ni lúru ni jǐn li ni, koro gele yɛ́ʔɛ ma li nìkpaanyi da pye lè.

²³ Kpàánweelaa n pye yaà fungo ma kadàali na n yɛʔɛ̀ wáa solomɔkulo kàbangi kpàánweele ma, ní canʔafolomɔ kabangi kpàánweele ma. N séli kpàánweelee ma n sáà nan lee na, a wi ge canʔanaganmi tímana, a bi pye mɛ́tiribéle togoye siin ní kpɔrigɔ.

²⁴ A wi kári ní mii ní wòrogulo ma, beè wòrogulo kàbangi kpàánweele pye lè. A wi gàángèle, ní nìkpaanyi tímana yaà, dee bee tímanama n pye sèjira.

²⁵ Fɛ̀nɛtiribéle maa pye kpàánweeli bee ní li nìkpaanyi na n di màʔa n kpàra àmɛɛ fɛ̀nɛtiribèle bele wozanbèlē nyɛ lè. Li tɔnɔganmi maa pye mɛ́tiribéle toko ní kagunɔ, li yɛ́ɛgi kpɔ́ʔɔganma si i nyɛ mɛ́tiribéle kɛɛ ní siin ní tíla.

²⁶ Tɛɛ̀lúgugéle kɔrɔsiin na pe da ni lúru ni jǐn li ni, koro gele yɛ́ʔɛ ma nìkpaanyi pye lè. Sɛʔɛwara n pye li gàángèle na kàbanyi myɛ na.

²⁷ Kpàánweele n pye fungo ma kadàali na wòrogulo kàbangi na. N séli kpàánweelee ma n sáà nan lee na, wòrogulo kàbangi na, a wi ge canʔanaganmi tímana, a bi pye mɛ́tiribéle togoye siin ní kpɔrigɔ.

Kadàali ní fungo ma kpàánweegèle

²⁸ A wi foro ní mii ní wòrogulo kàbangi kpàánweele ni n kári fungo ma kadàali ma. A wi wòrogulo kàbangi kpàánweele tímana, a li tímanami pye sèjira.

²⁹ Li kpaafunyi, ní li gàángèle, ní li nìkpaanyi tímanama maa pye sèjira. Fɛ̀nɛtiribéle maa pye kpàánweeli bee ní nìkpaanyi na n di màʔa n kpàra. Li tɔnɔganmi maa pye mɛ́tiribéle toko ní kagunɔ, li yɛ́ɛgi kpɔ́ʔɔganma si i nyɛ mɛ́tiribéle kɛɛ ní siin ní tíla.

³⁰ Nìkpaanya maa li màʔa n kpàra, yee tɔnɔganma bi pye lè mɛ́tiribéle kɛɛ ní siin ní tíla, yi yɛ́ɛyi kpóloganma si i nyɛ mɛ́tiribéle kɛɛ ní siin-ziin ní tíla.

³¹ Li nìkpaanyi maa sogi kàfugo ma kadàali na. Sɛʔɛwara maa pye li gàángèle na, ní tɛɛ̀lúgugéle kɔrɔtaanri bàā lúru da jǐn li ni.

³² A wi jée ní mii ní fungo ma kadàali ni, canʔafolomɔ kabangi na. A wi kpàánweeli tímana, a li tímanami pye sèjira.

³³ Li kpaafunyi, ní li gàángèle, ní li nìkpaanyi tímanama maa pye sèjira. Fɛ̀nɛtiribéle maa pye kpàánweeli bee, ní li nìkpaanyi na n di màʔa n kpàra. Yi tɔnɔganmi maa pye mɛ́tiribéle toko ní kagunɔ kagunɔ, yi yɛ́ɛyi kpóloganma si i nyɛ mɛ́tiribéle kɛɛ ní siin-ziin ní tíla.

³⁴ Li nìkpaanyi maa sogi kàfugo ma kadàali na. Sɛʔɛwara maa pye li gàángèle kàbanya myɛ na, ní tɛɛ̀lúgugéle kɔrɔtaanri bàā lúru da jǐn li ni.

³⁵ A wi kári ní mii ní solomɔkulo kpàánweeli ma. A wi sáà li tímana, a li tímanami pye sèjira,

³⁶ n wɔ́ɔ̀ fàra li kpaafunyi, ní li gàángèle, ní li nìkpaanyi na. Fɛ̀nɛtiribéle maa li màʔa n kpàra. Li tɔnɔganmi maa pye mɛ́tiribéle toko ní kagunɔ, li yɛ́ɛgi kpɔ́ʔɔganma si i nyɛ mɛ́tiribéle kɛɛ ní siin ní tíla.

³⁷ Li nìkpaanyi gàángéle maa sogi kàfugo ma kadàali na. Sɛʔɛwara maa pye li gàángèle kàbanya myɛ na, ní tɛɛ̀lúgugéle kɔrɔtaanri bàā lúru da jǐn li ni.

³⁸ Kpaafungaa n pye yaà, gee kpaaweele li da kúun lè kpàánweegèle gàángéle nínge ni. Nɛɛ bee pe da ni sáriga-sórigow yaweekɔnɔgigéle jée.

³⁹ Tàbalibéle n pye kpàánweeli nìkpanʔa ni, siin n pye kàbangee na, a siin pye gee na, jàngó paa sáriga-sórigow yaweegéle kɔnɔgi be na, kapeegèle kùsulugo sáriga, ní kolomi sáriga kéele na.

⁴⁰ Kàfugo ma kàbangi na, beè syɛ́ɛnbèle da ni lúru ni jǐn solomɔkulo kpàánweeli ni lè, tàbalibéle n pye yaà siin kàbangee na, siin gee na, kpàánweeli nìkpanʔa kabaan na, tàbalibèle pèle siin n pye yaà.

⁴¹ Tàbalibéle n pye kpàánweeli lɛ̀ʔɛgēle ni, sicɛrɛ kàbangee na, sicɛrɛ gee na, a pe myɛ bìnɛw pye tàbalibéle kɔrɔtaanri, poro bele na pe da ni sárigaw yaweegéle kɔnɔgi lè.

⁴² Kàdɛnɛgboloyo tàbalibéle sicɛrɛ maa níì pye yaà sáriga-sórigow kéele na, pe tɔnɔganmi maa pye santimɛtiribéle togoye taanri ní kpɔrigɔ ní kagunɔ kagunɔ, a be yɛ́ɛyi kpóloganma i nyɛ santimɛtiribéle togoye taanri ní kpɔrigɔ ní kagunɔ kagunɔ, pe ǹjoyi tɔnɔganma si i nyɛ mɛ́tiri-tílabéle. Yáriree ní pe sáriga-sórigow ní sárigasanw yaweegéle kɔnɔgi lè, poro na ti da ni taari.

⁴³ Pe nyɔɔwari maa pye kadaala yɛ́ʔɛ kpɔ́ʔɔganma, poro maa sámaga n tɛ́ʔɛ yaà fungo ma n màʔa n kpàra. Tàbalibèle bee na sárigaw káara da ni taari.

⁴⁴ Ŋùuvɔbèle kpaafunyo n pye yaà fungo ma kpàánweeli kàdoʔo ma, fungo ma kadàali na, kpaafungaa n pye solomɔkulo kpàánweeli lɛ̀ʔɛlɛ ni, níì yɛʔɛ̀ wáa wòrogulo kàbangi na, á gee si i nyɛ canʔafolomɔ kpaánweeli lɛ̀ʔɛlɛ ni, níì yɛʔɛ̀ wáa solomɔkulo ma.

⁴⁵ A wi mii pye: «Kpaafungi naa gi yɛʔɛ̀ wáa wòrogulo ma lè, koro i nyɛ sáriga-wòlobèle wóʔo, poro bele be fáliw kpéʔele kpáagi ni lè.

⁴⁶ Kpaafungee si gi yɛʔɛ̀ wáa solomɔkulo ma lè, koro i nyɛ sáriga-wòlobèle wóʔo, poro bele be sáriga-wòlo-yafaangi fáli kpéʔele lè. Poro be nyɛ Sadɔki jáabèle, poro bele pe da ni nùuní lè Yawe na Levii jáabèle ni, ni wi fáliw kpéʔele.»

⁴⁷ A wi kadàali tímana, a li kàbanyi tímanama pye sèjira, mɛ́tiribéle togoye siin ní kpɔrigɔ kpɔrigɔ, sáriga-wòlo-yafaangi maa pye kpáagi yɛ́ʔɛ ma.

Kpɔ̀ʔɔrɔli kpaʔa kánma

⁴⁸ A wi jée ní mii ní kpɔ̀ʔɔrɔli kpaʔa nìkpanʔa ni. A wi nìkpaangi gàángéle tímana, a kàbangee pye mɛ́tiribéle siin ní tíla, a gee pye mɛ́tiribéle siin ní tíla. Kpàánweeli yɛ́ʔɛ kpɔ́ʔɔganma maa pye mɛ́tiri nibin ní tíla kàbangee na, ní nibin ní tíla kàbangee na.

⁴⁹ Nìkpaangi tɔnɔganma maa pye mɛ́tiribéle kɛɛ, ki yɛ́ɛgi kpɔ́ʔɔganma si i nyɛ mɛ́tiribéle kagunɔ ní tíla. Pe si i lúru tɛɛ̀lúgugéle na ni jǐn gi ni. Gàángèle kèle maa pye tɛɛ̀jeeli gàángéle taana, làa maa pye kàbangee na lee si i nyɛ kàbangee na.