Ezekyɛli 4 - Cebaara Bible 2010

Ezekyɛli ní tɛ́ɛnni kéele Zyerusalɛmi taana kapɛɛnni kánma na

¹ «Mɔ si na, syɔɔn-pya, ki n yɛlɛ mi jòfáanyinnɛ láa, mí li tɛ́ʔɛ miyɛɛ yɛ́ʔɛ ma, mí kàʔa kán li na, koro í pye Zyerusalɛmi.

² Mí gi pye pèle í tɛ́ɛn gi taana kapɛɛnni kánma na, mí bǒboliyo sámaga gi kánmi na, mí tɛɛ̀lúguyo yérige gi kánmi na, mí kapɛɛnkpumɔnbéle télege gi taana, mí tòjaa-mazinbéle tɛ́ʔɛ mi gi màʔa.

³ Mɔ si na, mi tunmɔrɔ yakpakpaʔa láa mi gi yérige gi pye tunmɔrɔ tò mɔ ní kěgi nínge ni, mí yɛʔɛ̀ wáa kěgi ma mí tɛ́ɛn gi taana kapɛɛnni kánma na. Ki a pye kègaa, gee taana be tɛ́ɛn kapɛɛnnɛ kánma na lè. Koro i nyɛ fɛ̀ɛ Isirayɛli kpáagi wòolo kánma na.

⁴ Mɔ si na, sínɛ kàmɔnɔ lɛʔɛli na mí Isirayɛli kpáagi wòolo kolomɔ taʔa yaà. Mɔ a be kolomi túgoro tugo cányi myɛ ni, yee nyɔ́ɔ mɔ a sínɛ lè lɛ̀ʔɛli bee na.

⁵ Mii wi a cányi nyɔ́ɔ córo taʔa mɔ na, yee yi yɛlɛ ní be kolomi yɛ̀ʔɛlɛ nyɔ́ɔ ní lè, yi i nyɛ canya sirakele ní togoye kpanjɛrɛ ní kpɔrigɔ. Kánmi bee na mɔ a Isirayɛli kpáagi wòolo kolomɔ túgoro tugo.

⁶ Mɔ ga cányi bee foro, mɔ a ní kàri bi sínɛ kàliige lɛʔɛli na bi Zyuda kpáagi wòolo kolomɔ túgoro tugo canya togoye siin fúngo ni, mii n canʔa nibin pye mɔ ma yɛɛbolo.

⁷ Mɔ a mɔ yɛ́ɛgi ní mɔ kɔ̂múgu-yaʔagi yìrige bi wáa Zyerusalɛmi kàbangi na, koro gee taana be tɛ́ɛn kapɛɛnni kánma na lè, mí kérigèle nyaa mi joo gi kánmi na.

⁸ Wéle, mii a mɔ pwɔɔ ní mɛɛngéle ní, koro ga pye mɔ a kɔ́ gbǎn ra wáa da kàragí da máari í, fwɔɔ bi taa mɔ í ba mɔ tɛ́ɛnni canya foro.

⁹ Koro na ki n yɛlɛ mi bile, ní orizye, ní jamilɔ, ní jàyiligēle, ní syɔ̀ɔlɔ, ní fe láa mi le kòdɔɔlɔ ni mi sámaga mɔ búruw bi yɛlɛ ní cányee nyɔ́ɔ ní mɔ a sínɛ lɛ̀ʔɛli na lè. Toro mɔ a ra líi cányi sirakele ní togoye kpanjɛrɛ ní kpɔrigɔ fúngo ni.

¹⁰ Yaliiri mɔ a ra líi lè, mɔ a ra di tímana, ti a pye cúlow tílaya sicɛrɛ wóʔo félege cángi fúngo ni. Toro mɔ a ra líi lǎli bee myɛ ni.

¹¹ Mɔ a ra mɔ logbaagi tímana, ki a pye lítiri cángi ni. Koro mɔ a ra gbo lǎli bee myɛ ni.

¹² Orizye búrupile mɔ a ra líi, mɔ si a ra syɔɔn fire téeri bàā li fwóo, mɔ a ra koro kpéʔele be nyɛnɛ na.»

¹³ A Yawe jo: «Kánmi bee na Isirayɛli ye a ra be yaliinɔnʔɔri líi syɛɛnfeleyi nínge ni, beè mii a be nɛnɛ tórigo lè.»

¹⁴ A mii jo: «Ee Kàfɔw Yawe, mii n niyɛɛ kɔ̀rɔsíi yanɔnʔɔri myɛ na. Mii ga kɔ́ɔ̀ yaweekuugo wàlá yacogaa wogáa-gòrolaa káa í, nlaa mii yìri lè pyà n baa nan níjanʔa na, kaànɔnʔɔrɔ ga kɔ́ɔ̀ jée mii nyɔ́ɔgi ni í.»

¹⁵ A wi mii yari: «Wéle, mii n nìfiri kaan mɔ ma syɔɔn fíri sìndɛʔɛ ni, mɔ a ra mɔ búruw fwóo di na.»

¹⁶ A wi níì mii pye: «Syɔɔn-pya, mii a lìíli ceri bi láʔa Zyerusalɛmi na. Pe a ra wɔʔɔgɔ yaliire líi ní funbɛɛnrɛ ní, dee pe a ra tímana bàā kaangi be ma lè, si wɔ́ɔ ra pe lògbaagi tímana, ki wɔ́ɔ pye ní fûnnyaʔamiya ní.

¹⁷ Kánmi bee na lìíli ní lǒgi a kólogo be ma, pe a pínɛ da káagi, si tɔ̀nɔ́ da fɔ́ɔnri be kolomi kéele na.